IND vs ENG: భారత్‌కు ఆసీస్ కెప్టెన్ సాయం.. నితీష్ 2 వికెట్ల వెనుక కథ ఇదే!

IND vs ENG: ఇండియా వర్సెస్ ఇంగ్లండ్ జట్ల మధ్య జరుగుతున్న అండర్సన్-టెండూల్కర్ ట్రోఫీలోని మూడో టెస్ట్ గురువారం ప్రతిష్టాత్మక లార్డ్స్ మైదానంలో ప్రారంభమైంది. మొదటి రోజు ఆటలో టీమిండియా బౌలింగ్ చేసింది. టాస్ గెలిచిన ఇంగ్లండ్ బ్యాటింగ్ చేసింది. జస్ప్రీత్ బుమ్రా, మహ్మద్ సిరాజ్ వంటి ప్రముఖ బౌలర్లు వికెట్లు తీస్తారని ఊహించినప్పటికీ.. యువ ఆల్‌రౌండర్ నితీష్ కుమార్ రెడ్డి తన బౌలింగ్‌తో అందరినీ ఆశ్చర్యపరిచాడు. దీని వెనుక ఆస్ట్రేలియా జట్టు కెప్టెన్ ప్యాట్ కమిన్స్ ఉన్నారట. అది ఎలాగో ఇప్పుడు తెలుసుకుందాం.

నితీష్ కుమార్ రెడ్డి బౌలింగ్ మాయాజాలం
మొదట రోజు ఆట ప్రారంభమైన ఒక గంట తర్వాత భారత కెప్టెన్ శుభ్‌మన్ గిల్ నితీష్ కుమార్ రెడ్డిని బౌలింగ్ చేయడానికి పిలిచాడు. నితీష్ కుమార్ రెడ్డి తన మొదటి ఓవర్లోనే ఇంగ్లండ్ ఓపెనర్లు బెన్ డకెట్, జాక్ క్రాలీలను వరుస బంతుల్లో ఔట్ చేసి భారత జట్టుకు అద్భుతమైన ఆరంభాన్ని అందించాడు. ఇతర పేస్ బౌలర్ల కంటే నితీష్ కుమార్ రెడ్డి బౌలింగ్ పిచ్‌పై ఎక్కువ స్వింగ్ అయింది.

మొదటి రోజు ఆట ముగిసిన తర్వాత నితీష్ కుమార్ రెడ్డి మాట్లాడుతూ.. తన బౌలింగ్ మెరుగుదలకు ఎస్ఆర్‌హెచ్ జట్టు కెప్టెన్, ఆస్ట్రేలియా కెప్టెన్ ప్యాట్ కమిన్స్, భారత జట్టు బౌలింగ్ కోచ్ మోర్నే మోర్కెల్‌కు కృతజ్ఞతలు తెలిపాడు. "ఆస్ట్రేలియా సిరీస్ తర్వాత నా బౌలింగ్‌ను మెరుగుపరచుకోవాల్సిన అవసరాన్ని నేను గ్రహించాను. ఆసీస్ కెప్టెన్ ప్యాట్ కమిన్స్ ఆస్ట్రేలియా, ఇంగ్లండ్ పిచ్‌లపై ఎలా బౌలింగ్ చేయాలనే విషయంపై కొన్ని విలువైన సలహాలు ఇచ్చారు. అది నాకు ఎంతగానో ఉపయోగపడింది." అంటూ నితీష్ కుమార్ రెడ్డి చెప్పుకొచ్చాడు.

బౌలింగ్ కోచ్ మోర్నే మోర్కెల్ గురించి మాట్లాడుతూ.. ఆయనతో కలిసి పనిచేయడం ఎంతగానో ఉపయోగపడిందని నితీష్ చెప్పాడు. గత కొన్ని వారాలుగా బౌలింగ్ స్థిరత్వంపై దృష్టి సారించినట్లు చెప్పుకొచ్చాడు. ఈ క్రమంలోనే మంచి పురోగతి కనిపిస్తోందని అన్నాడు. కష్టపడి పనిచేయడం, ఆత్మవిశ్వాసం కలిగి ఉండటం విజయానికి కీలకమని తాను గ్రహించినట్లు వెల్లడించాడు. మొదటి రోజు ఆట ముగిసే సమయానికి ఇంగ్లండ్ జట్టు 4 వికెట్ల నష్టానికి 251 పరుగులు చేసింది. జో రూట్ 99 పరుగులతో, బెన్ స్టోక్స్ 39 పరుగులతో నాటౌట్‌గా క్రీజులో ఉన్నారు.