IND vs ENG: భారత్‌కు విజయం దక్కాలంటే.. ఈ 5 వ్యూహాలే కీలకం!

IND vs ENG: ఓవల్ మైదానంలో జరుగుతున్న భారత్, ఇంగ్లాండ్ జట్ల మధ్య చివరి టెస్ట్ మ్యాచ్ రెండు జట్లకు జీవన్మరణ పోరాటంగా మారింది. మూడు రోజుల ఆట ముగిసిన తర్వాత నాలుగో రోజు మ్యాచ్ ఉత్కంఠను రేపుతోంది. భారత జట్టు నిర్దేశించిన 374 పరుగుల కఠిన లక్ష్యాన్ని ఛేదించేందుకు ఇంగ్లాండ్ జట్టు ఆడుతోంది. ఈ నేపథ్యంలో ఈ మ్యాచ్‌లో భారత జట్టు విజయం సాధించి సిరీస్‌ను సమం చేయడానికి ఏం చేయాలి? విజయావకాశాలు ఎలా ఉన్నాయి? అనే అంశాలను వివరంగా పరిశీలిద్దాం.

ఈ మ్యాచ్ మొదటి ఇన్నింగ్స్‌లో భారత జట్టు 224 పరుగులు చేయగా.. ఇంగ్లాండ్ 247 పరుగులు చేసింది. రెండో ఇన్నింగ్స్‌లో భారత జట్టు 396 పరుగులు సాధించి, ఇంగ్లాండ్‌కు 374 పరుగుల విజయ లక్ష్యాన్ని నిర్దేశించింది. మూడో రోజు ఆట ముగిసే సమయానికి, ఇంగ్లాండ్ జట్టు తమ రెండో ఇన్నింగ్స్‌లో 1 వికెట్ నష్టానికి 50 పరుగులు చేసింది. ఓపెనర్ జాక్ క్రాలీ(14) వికెట్‌ను ఆట చివరి బంతికి మహ్మద్ సిరాజ్ తన అద్భుతమైన యార్కర్‌తో పడగొట్టి ఒక కీలక మలుపును అందించాడు. ప్రస్తుతం బెన్ డకెట్ 34 పరుగులతో క్రీజులో ఉన్నాడు. ఇంగ్లాండ్ జట్టు విజయానికి ఇంకా 324 పరుగులు అవసరం.

భారత్‌కు అవసరమైన 9 వికెట్లు!
ఈ మ్యాచ్‌లో టీమిండియా విజయం సాధించడానికి ఇంకా 9 వికెట్లు పడగొట్టాలి. ఇంగ్లండ్ జట్టులోని కీలక ఫాస్ట్ బౌలర్ క్రిస్ వోక్స్ మొదటి రోజే భుజం గాయం కారణంగా ఈ టెస్ట్ నుంచి పూర్తిగా నిష్క్రమించాడు. దీంతో ఇంగ్లండ్ జట్టు ఒక బ్యాటర్ తక్కువగా ఆడుతుంది. ఇది భారత జట్టుకు చాలా పెద్ద సానుకూలాంంశం కావడం గమనార్హం. అందువల్ల భారత జట్టు 8 వికెట్లు తీస్తేనే విజయం దాదాపుగా ఖాయమైపోతుంది.

గెలుపు కోసం భారత జట్టు వ్యూహం ఎలా ఉండాలి?
ఆరంభ వికెట్లు కీలకం: నాలుగో రోజు ఆట ప్రారంభంలోనే వికెట్లు తీయడం చాలా ముఖ్యం. ముఖ్యంగా క్రీజులో దూకుడుగా ఆడే బెన్ డకెట్ వికెట్‌ను త్వరగా పడగొట్టగలిగితే ఇంగ్లండ్ జట్టుపై తీవ్ర ఒత్తిడిని పెంచవచ్చు. కొత్త బంతితో మహ్మద్ సిరాజ్, ప్రసిద్ధ్ కృష్ణ తమ అద్భుతమైన బౌలింగ్‌ను ప్రదర్శించాలి.

సిరాజ్, ప్రసిద్ధ్ కృష్ణ పాత్ర: మొదటి ఇన్నింగ్స్‌లో చెరో 4 వికెట్లు తీసి ఇంగ్లండ్ జట్టును నియంత్రించిన సిరాజ్, ప్రసిద్ధ్ కృష్ణ రెండో ఇన్నింగ్స్‌లోనూ తమ దాడిని కొనసాగించాలి. సిరాజ్ ఖచ్చితమైన యార్కర్లు, ప్రసిద్ధ్ వేసే బౌన్సర్లు ఇంగ్లండ్ బ్యాటర్లకు ఖచ్చితంగా సవాలుగా నిలుస్తాయి.

స్పిన్నర్ల ప్రభావం: నాలుగో, ఐదో రోజుల్లో పిచ్ స్పిన్ బౌలింగ్‌కు అనుకూలంగా మారే అవకాశం ఉంది. రవీంద్ర జడేజా, వాషింగ్టన్ సుందర్ ఈ అవకాశాన్ని సద్వినియోగం చేసుకోవాలి. రవీంద్ర జడేజా ఖచ్చితమైన లైన్ అండ్ లెంగ్త్, సుందర్ వైవిధ్యమైన స్పిన్ బౌలింగ్ మిండిల్ ఓవర్లలో వికెట్లు తీయడానికి సహాయపడతాయి.

బజ్ బాల్‌కు ప్రతిఘటన: ఇంగ్లండ్ జట్టు "బజ్ బాల్‌" అనే దూకుడు శైలిని అనుసరిస్తోంది కాబట్టి భారత బౌలర్లు నిదానంగా ఉండాలి. పరుగులు ఇస్తున్నారని ఆందోళన పడకుండా సరైన దిశలో నిరంతరం బౌలింగ్ చేసి బ్యాటర్లపై ఒత్తిడి తేవడం ద్వారా వికెట్లు తీయగలరు.

ఖచ్చితమైన ఫీల్డింగ్: మొదటి ఇన్నింగ్స్‌లో ఇంగ్లండ్ జట్టు 6 క్యాచ్‌లను వదిలేసింది. అలాంటి పొరపాట్లను భారత ఆటగాళ్లు చేయకుండా, లభించిన ప్రతి అవకాశాన్ని సద్వినియోగం చేసుకోవాలి. ఒక మంచి క్యాచ్ కూడా మ్యాచ్ గతిని మార్చే సామర్థ్యం కలిగి ఉంటుంది.

ఓవల్ మైదానం చరిత్ర భారత్‌కు అనుకూలమా?
ఓవల్ మైదానంలో నాలుగో ఇన్నింగ్స్‌లో 263 పరుగులకు మించి ఛేదించి విజయం సాధించడం 120 సంవత్సరాల క్రితం జరిగింది. కాబట్టి, 374 పరుగుల కఠిన లక్ష్యాన్ని చేరుకోవడం ఇంగ్లాండ్‌కు అంత తేలికైన పని కాదు. భారత బౌలర్లు తమ ప్రణాళికలను సరిగ్గా అమలు చేస్తే, ఈ మ్యాచ్‌లో భారత జట్టు విజయం సాధించి, సిరీస్‌ను 2-2తో సమం చేసి, చారిత్రాత్మక విజయాన్ని నమోదు చేయడం దాదాపుగా ఖాయం.