IND vs ENG: ఏ కోచ్ చేయనిది గంభీర్ చేయబోతున్నాడు.. !

IND vs ENG: టీమిండియా త్వరలో ఇంగ్లాండ్‌తో 5 మ్యాచ్‌ల టెస్ట్ సిరీస్ ఆడనుంది. ఈ నేపథ్యంలోనే అనుభవజ్ఞులైన ఆటగాళ్లు రోహిత్ శర్మ, విరాట్ కోహ్లీ ఒకరి తర్వాత ఒకరు భారత టెస్ట్ జట్టు నుంచి రిటైర్ అయ్యారు. ఈ ఇద్దరు కీలక ఆటగాళ్లు లేకపోవడంతో భారత టెస్ట్ జట్టు ఇంగ్లాండ్‌లో ఎలా రాణిస్తుందనే ప్రశ్న తలెత్తుతోంది. ఈ పరిస్థితిలో టీమిండియా ప్రధాన కోచ్ గౌతమ్ గంభీర్ ఇంతకు ముందు ఏ భారత జట్టు కోచ్ చేయని పనిని చేయబోతున్నాడు. ఇండియా ఏ జట్టుతో కలిసి జూన్ 6న గౌతమ్ గంభీర్ ఇంగ్లాండ్‌కు వెళ్లనున్నాడు. భారత జట్టు జూన్ 20న ఇంగ్లాండ్‌తో తొలి టెస్ట్ మ్యాచ్ ఆడనుంది.

గతంలో కూడా సీనియర్ భారత జట్టు పోటీలలో పాల్గొనేందుకు వెళ్లినప్పుడల్లా కోచ్ జట్టుతో ప్రయాణించేవారు. రోహిత్-కోహ్లీ రిటైర్మెంట్ తర్వాత ఇండియా జట్టును గాడిలో పెట్టేందుకు గంభీర్ ప్రయత్నిస్తున్నట్లు తెలుస్తోంది. ఇండియా ఏ జట్టు ప్రాక్టీస్ మ్యాచ్‌లు ఆడటానికి ఇంగ్లాండ్‌కు వెళుతుంది. ఇందులో ఒకరిద్దరు భారత టెస్టు జట్టు ఆటగాళ్లు కూడా ఉంటారు. అయితే ఈ సారి భారత్ టెస్ట్ జట్టుకు ఎంపిక కానున్న చాలా మంది యువ ఆటగాళ్లను ఇండియా ఏ జట్టు తరఫున ఆడించాలని నిర్ణయించారు. గౌతమ్ గంభీర్ ఇండియా ఏ జట్టు ఆడే మ్యాచ్‌లను దగ్గరగా చూడాలని నిర్ణయించుకున్నాడు. ఇదిలా ఉండగా.. విరాట్ కోహ్లీ, రోహిత్ శర్మల రిటైర్మెంట్ల వెనుక గౌతమ్ గంభీర్ హస్తం ఉందని భారత క్రికెట్ వర్గాల్లో విస్తృతంగా చర్చ జరుగుతోంది.

సీనియర్ ఆటగాళ్లు రిటైర్ అయ్యేలా చేసింది గంభీర్ అని చాలా మంది విమర్శలు కూడా గుప్పిస్తున్నారు. ఈ క్రమంలో ఇంగ్లాండ్ టెస్ట్ సిరీస్‌లో భారత జట్టు గణనీయమైన విజయాలు సాధించకపోతే.. అది గంభీర్‌పై భారీ ఒత్తిడిగా మారుతుంది. దేశవ్యాప్తంగా క్రికెట్ అభిమానులు రోహిత్ శర్మ, విరాట్ కోహ్లీలను రిటైర్మెంట్ గురించి మాట్లాడుకోవడం ప్రారంభిస్తారు. సోషల్ మీడియాలో తీవ్ర విమర్శలు వస్తాయి. అలా జరగకుండా ఉండాలంటే ఇంగ్లాండ్‌తో జరిగే టెస్ట్ సిరీస్‌లో టీమిండియా ఏదో ఒక విధంగా మంచి ప్రదర్శన ఇవ్వాలి. కనీసం రెండు మ్యాచ్‌లు అయినా గెలవాలి. సిరీస్ గెలిచినా మంచి ప్రదర్శనలు ముఖ్యం. అందుకే గౌతమ్ గంభీర్ ఇండియా ఏ జట్టుతో ప్రయాణించాలని నిర్ణయించుకున్నాడు. గౌతమ్ గంభీర్ ప్లాన్ సక్సెస్ అవుతుందో లేదో వేచి చూడాల్సిందే.