IND vs ENG: మూడో టెస్టుకు ముందు టీమిండియాకు బిగ్ షాక్.. కీలక బౌలర్‌కు విశ్రాంతి?

IND vs ENG: భారత్, ఇంగ్లండ్ జట్ల మధ్య జరుగుతున్న ఐదు టెస్టుల సిరీస్‌లో ఇరు జట్లు ఒక్కో విజయం సాధించి సిరీస్‌ను 1-1తో సమం చేశాయి. ఈ నేపథ్యంలో మూడో టెస్ట్ మ్యాచ్ గురువారం(జులై 10) నుంచి చారిత్రాత్మక లార్డ్స్ మైదానంలో ప్రారంభం కానుంది. ఈ మ్యాచ్‌లో భారత స్టార్ బౌలర్ మహ్మద్ సిరాజ్ ఆడతాడా లేదా అనే సందేహం నెలకొంది. తొలి టెస్ట్ మ్యాచ్ జూన్ 20 నుంచి 24 వరకు జరిగింది. ఆ తర్వాత దాదాపు వారం రోజుల విరామం అనంతరం రెండో టెస్ట్ మ్యాచ్ జులై 2 నుంచి 6 వరకు జరిగింది.

ఈ పరిస్థితుల్లో మూడో టెస్ట్ కేవలం 3 రోజుల వ్యవధిలో తిరిగి ప్రారంభం కానుంది. ఇది ఇరు జట్ల ఆటగాళ్లపై ప్రభావం చూపింది. ముఖ్యంగా భారత జట్టులోని స్టార్ ఆటగాడు జస్ప్రీత్ బుమ్రా తొలి టెస్ట్ మొదటి ఇన్నింగ్స్‌లో 25 ఓవర్లు, రెండో ఇన్నింగ్స్‌లో 19 ఓవర్లు చేశాడు. దీని వల్ల బుమ్రాకు పనిభారం పెరుగుతుందనే కారణంతో రెండో టెస్టులో బుమ్రాకు విశ్రాంతినిచ్చి, లార్డ్స్ టెస్టుకు తిరిగి వస్తాడని ప్రకటించారు.

ఈ సమయంలో భారత జట్టుకు చెందిన మరో స్టార్ పేసర్ మహ్మద్ సిరాజ్ మొదటి టెస్ట్‌లో మాత్రమే 41 ఓవర్లు వేశాడు. ఇందులో సిరాజ్ కేవలం రెండు వికెట్లు మాత్రమే పడగొట్టాడు. ఈ క్రమంలో రెండో టెస్టులో సిరాజ్ ప్రధాన బౌలర్‌గా ఉన్నాడు. ఇందులో మహ్మద్ సిరాజ్ 32 ఓవర్లు వేశాడు. మొత్తం మీద మహ్మద్ సిరాజ్ 7 వికెట్లు పడగొట్టాడు.

ఇంత ఎక్కువ ఓవర్లు వేసి మరుసటి మూడో రోజుల్లో మరో టెస్ట్ మ్యాచ్ ఆడటం అసాధ్యం. దీనివల్ల లార్డ్స్ టెస్టులో మహ్మద్ సిరాజ్‌కు విశ్రాంతి ఇవ్వాలని భారత జట్టు మేనేజ్మెంట్ ఆలోచిస్తోంది. దీనికి బదులుగా అర్ష్‌దీప్ సింగ్‌ను తీసుకోవాలని భారత మేనేజ్మెంట్ నిర్ణయించే అవకాశం ఉంది. అయితే మహ్మద్ సిరాజ్ చారిత్రాత్మక లార్డ్స్ టెస్టులో ఆడటానికి ఆసక్తిగా ఉన్నట్లు తెలుస్తోంది.