IND vs ENG: ఇంటికి వెళ్లాల్సిందేనా?.. ఇద్దరు కోచ్‌లపై బీసీసీఐ వేటు!

IND vs ENG: ఇంగ్లండ్ జట్టుతో జరుగుతున్న టెస్ట్ సిరీస్‌లో టీమిండియా గెలుపొందే అవకాశాన్ని కోల్పోవడంతో జట్టు శిబిరంలో తీవ్ర చర్చలు మొదలయ్యాయి. మాంచెస్టర్‌లో జరిగిన నాలుగో టెస్టు డ్రాగా ముగియడంతో సిరీస్‌లో భారత్ 1-2తో వెనుకబడింది. శుభ్‌మన్ గిల్ కెప్టెన్‌గా వ్యవహరించిన తొలి సిరీస్ ఇది. చివరి మ్యాచ్‌లో తప్పనిసరిగా గెలిస్తేనే సిరీస్‌ను సమం చేయగలిగే స్థితిలో టీమిండియా ఉంది. ఈ నేపథ్యంలో బీసీసీఐ ఒక కీలకమైన నిర్ణయం తీసుకున్నట్లు సమాచారం లీక్ అయింది.

కోచ్‌ల పనితీరుపై బీసీసీఐ అసంతృప్తి
గతంలో కొన్ని నెలలుగా గౌతమ్ గంభీర్ భారత జట్టు ప్రధాన కోచ్‌గా బాధ్యతలు చేపట్టిన తర్వాత టెస్ట్ క్రికెట్‌లో జట్టు ప్రదర్శన ఆశించిన స్థాయిలో లేదు. న్యూజిలాండ్, ఆస్ట్రేలియా సిరీస్‌లలో పరాజయం పాలైన భారత్, ఇప్పుడు ఇంగ్లండ్ సిరీస్‌ను గెలుచుకునే అవకాశాన్ని కూడా చేజార్చుకుంది. ఈ వరుస వైఫల్యాల కారణంగా బీసీసీఐ ఉన్నతాధికారులు సహనం కోల్పోయినట్లు తెలుస్తోంది.

మోర్నే మోర్కెల్, ర్యాన్‌లకు ఉద్వాసన!
'టెలిగ్రాఫ్' పత్రిక అందించిన సమాచారం ప్రకారం.. భారత జట్టు బౌలింగ్ కోచ్ మోర్నే మోర్కెల్, అసిస్టెంట్ కోచ్ ర్యాన్ టెన్ డోస్చేట్లను వారి పదవుల నుండి తొలగించాలని బీసీసీఐ నిర్ణయం తీసుకుంది. ఇంగ్లండ్ సిరీస్ ముగిసిన వెంటనే దీనిపై ఒక సమగ్ర సమీక్ష నిర్వహించనున్నట్లు సమాచారం. సెప్టెంబర్‌లో జరగనున్న ఆసియా కప్ 2025కు సమయం తక్కువగా ఉన్నందున.. ఈ మార్పులు కొంత ఆలస్యం కావచ్చని తెలుస్తోంది. అయితే, అక్టోబర్‌లో వెస్టిండీస్‌తో జరగనున్న తదుపరి టెస్ట్ సిరీస్‌కు ముందే ఈ మార్పులు ఖచ్చితంగా జరుగుతాయని బలంగా భావిస్తున్నారు.

ఇప్పటికే బ్యాటింగ్ కోచ్ అభిషేక్ నాయర్‌ను పదవి నుంచి తొలగించిన విషయం తెలిసిందే. అదే విధంగా మోర్నే మోర్కెల్, ర్యాన్ లను కూడా తొలగించే అవకాశాలు ఎక్కువగా ఉన్నాయి. భారత జట్టులో ఆటగాళ్ల స్థాయిలో ఇప్పటికే అనేక మార్పులు జరుగుతున్న నేపథ్యంలో ప్రధాన కోచ్ పదవిలో ఎలాంటి మార్పులను బీసీసీఐ ప్రస్తుతానికి కోరుకోవడం లేదు. అందువల్ల గౌతమ్ గంభీర్ తన ప్రధాన కోచ్ పదవిలో కొనసాగుతారు.

మోర్నే మోర్కెల్ నిర్ణయాలపై విమర్శలు
బౌలింగ్ కోచ్ మోర్నే మోర్కెల్ కొంతకాలంగా బీసీసీఐ నిఘాలో ఉన్నట్లు సమాచారం. ఇంగ్లండ్‌తో జరిగిన నాలుగో టెస్టులో కొత్త బంతితో కేవలం గంటకు 120 కిలోమీటర్ల వేగంతో మాత్రమే బౌలింగ్ చేసిన యువ బౌలర్ అన్షుల్ కంబోజ్‌ను ఆడించిన నిర్ణయం అతని పదవికి చిక్కులు తెచ్చి పెట్టింది. అంతర్జాతీయ స్థాయిలో టెస్ట్ మ్యాచ్‌లో అరంగేట్రం చేసే ఆటగాడి నుంచి ఇంత తక్కువ వేగం ఆశించదగినది కాదు.అంతేకాకుండా, ప్రపంచ స్థాయి స్పిన్నర్ కుల్దీప్ యాదవ్‌ను జట్టులోకి తీసుకోకపోవడం కూడా అనేక ప్రశ్నలను లేవనెత్తింది. ఈ విషయంపై బీసీసీఐ అధికారి ఒకరు మాట్లాడుతూ.. కోచ్‌లు ఎప్పుడూ జట్టు సమతుల్యత గురించి మాట్లాడుతుంటారు. కానీ, కుల్దీప్ యాదవ్ వంటి గొప్ప ఆటగాడిని పక్కన పెట్టడం భారత జట్టుకు తీవ్ర నష్టాన్ని కలిగించిందని వ్యాఖ్యానించారు. కుల్దీప్ స్పిన్ నైపుణ్యం ఇంగ్లండ్ పిచ్‌లపై మరింత ప్రభావం చూపే అవకాశం ఉన్నా, అతన్ని పక్కన పెట్టడం విమర్శలకు దారితీసింది.

గంభీర్ ఎంపికలపై అప్పటి నుంచే వ్యతిరేకత
మోర్నే మోర్కెల్, ర్యాన్ టెన్ డోస్చేట్ ఇద్దరూ గతేడాది గౌతమ్ గంభీర్ ద్వారా అతని కోచింగ్ బృందానికి ఎంపిక చేయబడ్డారు ఆ సమయంలోనే బీసీసీఐలోని ఉన్నతాధికారులు వారి నియామకాన్ని వ్యతిరేకించారు. అయితే గంభీర్ పట్టుబట్టడంతో వారు టీమిండియా కోచింగ్ స్టాఫ్‌లో స్థానం పొందారు. ప్రస్తుతం భారత జట్టు వరుసగా టెస్టుల్లో పేలవమైన ప్రదర్శన కనబరుస్తున్నందున.. వారిని తొలగించడానికి బీసీసీఐ సిద్ధమవుతున్నట్లు స్పష్టంగా తెలుస్తోంది. ఇది భారత క్రికెట్‌లో తదుపరి కీలక మార్పులకు సంకేతం కావచ్చు.