IND vs AFG: కొండంత స్కోరుతో డిక్లేర్.. బౌలింగ్‌లోనూ భారత్ ఊచకోత!

IND vs AFG: ముల్లాన్‌పూర్‌లోని మహారాజా యాదవీంద్ర సింగ్ అంతర్జాతీయ క్రికెట్ స్టేడియం వేదికగా ఆఫ్ఘనిస్థాన్‌తో జరుగుతున్న ఏకైక చారిత్రాత్మక టెస్ట్ మ్యాచ్‌పై టీమిండియా పూర్తి పట్టు సాధించింది. మ్యాచ్ రెండో రోజైన ఆదివారం (జూన్ 7) ఆట ముగిసే సమయానికి ఆఫ్ఘనిస్థాన్ తన తొలి ఇన్నింగ్స్‌లో 5 వికెట్ల నష్టానికి 113 పరుగులు చేసి పీకల్లోతు కష్టాల్లో పడింది. ప్రస్తుతం క్రీజులో రహ్మత్ షా (43 పరుగులు) ఒంటరి పోరాటం చేస్తుండగా.. తొలి ఇన్నింగ్స్ పరంగా ఆఫ్ఘన్ జట్టు ఇంకా 451 పరుగుల భారీ వెనుకంజలో ఉంది.

అంతకుముందు టాస్ గెలిచి బ్యాటింగ్ ఎంచుకున్న భారత జట్టు తన తొలి ఇన్నింగ్స్‌ను 8 వికెట్ల నష్టానికి 564 పరుగుల భారీ స్కోరు వద్ద డిక్లేర్ చేసింది. కెప్టెన్ శుభ్‌మన్ గిల్ (126 పరుగులు), ఓపెనర్ కేఎల్ రాహుల్ (100 పరుగులు) అద్భుత శతకాలతో టీమిండియా భారీ స్కోరుకు బలమైన పునాది వేశారు. యువ బ్యాటర్ సాయి సుదర్శన్ (81), వికెట్ కీపర్ రిషబ్ పంత్ (81), ఆల్‌రౌండర్ వాషింగ్టన్ సుందర్ (52 నాటౌట్) హాఫ్ సెంచరీలతో కీలక సహకారం అందించారు. ఆఫ్ఘనిస్థాన్ బౌలర్లలో మహ్మద్ సలీమ్ సఫీ 6 వికెట్లతో అత్యుత్తమ ప్రదర్శన కనబరిచాడు.

అనంతరం కొండంత లక్ష్యంతో బరిలోకి దిగిన ఆఫ్ఘనిస్థాన్ జట్టు తొలి ఇన్నింగ్స్ ఆరంభం నుంచే తడబడింది. ఈ మ్యాచ్ ద్వారా అంతర్జాతీయ అరంగేట్రం చేసిన భారత యువ స్పిన్నర్ మానవ్ సుతార్ స్పిన్ మాయాజాలంతో ఆఫ్ఘన్ బ్యాటర్ల వెన్ను విరిచాడు. ఓపెనర్ అబ్దుల్ మాలిక్ (16)ను ఔట్ చేయడం ద్వారా తన కెరీర్‌లో మొదటి టెస్ట్ వికెట్ సాధించిన మానవ్ సుతార్, ఆ తర్వాత ప్రమాదకర బ్యాటర్ రహ్మానుల్లా గుర్బాజ్ (12), రెండో రోజు ఆట ముగిసే చివరి నిమిషంలో అఫ్సర్ జజాయ్ (3) వికెట్లను పడగొట్టి మొత్తం 3 వికెట్లతో ఆఫ్ఘన్‌ను దెబ్బతీశాడు.

మరోవైపు భారత పేసర్ ప్రసిద్ధ్ కృష్ణ కూడా తన వంతు పాత్ర పోషిస్తూ అద్భుతమైన బంతితో సెదికుల్లా అటల్ (17)ను క్లీన్ బౌల్డ్ చేయడమే కాకుండా, క్రీజులో నిలదొక్కుకునేలా కనిపించిన ఆఫ్ఘన్ కెప్టెన్ హష్మతుల్లా షాహిదీ (20)ని ఎల్బీడబ్ల్యూగా ఔట్ చేసి పెవిలియన్ పంపాడు. భారత బౌలర్ల ధాటికి ఆఫ్ఘన్ టాపార్డర్ కుప్పకూలడంతో కేవలం 113 పరుగులకే 5 వికెట్లు కోల్పోయింది. మ్యాచ్ ఇంకా మూడు రోజుల ఆట మిగిలి ఉన్న నేపథ్యంలో, భారత్ ఈ మ్యాచ్‌పై పూర్తి ఆధిపత్యాన్ని ప్రదర్శిస్తోంది.