వారిద్దరూ నా టెక్నిక్‌లో సమస్యేమీ లేదన్నారు: శిఖర్ ధావన్‌

100% ప్రదర్శన ఇస్తా:

త్వరలో ఇంగ్లాండ్ వేదికగా ప్రపంచకప్‌-2019 జరగనున్న నేపథ్యంలో ధావన్‌ ఓ ఇంటర్వ్యూలో మాట్లాడాడు. 'నా ఐసీసీ టోర్నీ ప్రదర్శన గురించే ఎక్కువగా మాట్లాడతారు. ఐసీసీ టోర్నీలలో ఒకలా.. మామూలు టోర్నీలలో మరోలా ఆడను. ప్రతిసారీ 100% ప్రదర్శన ఇవ్వడానికి ప్రయత్నిస్తా. విమర్శలను ఎప్పుడూ పట్టించుకోను. ఈ సారీ ఐసీసీ టోర్నీలో రాణిస్తానన్న నమ్మకముంది' అని ధావన్ తెలిపారు.

నా టెక్నిక్‌లో సమస్యేమీ లేదు:

'మ్యాచ్ ఆడేటప్పుడు ఎక్కువగా ఒత్తిడికి గురికాను. కొన్నిమ్యాచుల్లో పరుగులు చేయకున్నా.. ఆ విషయం పెద్దగా ఆలోచించను. పత్రికలు చదవను, టీవీ చూడను. సోషల్ మీడియాను సందర్భాన్ని బట్టి వాడతాను. దీంతో నా టెక్నిక్‌ గురించి రాసే సంగతి నాకు తెలిసే అవకాశం లేదు. రికీ పాంటింగ్‌, సౌరవ్‌ గంగూలీలు నా టెక్నిక్‌లో సమస్యేమీ లేదన్నారు. టెస్టు అరంగేట్రానికి ముందు 9 సంవత్సరాలు దేశవాళీ క్రికెట్‌ ఆడాను. అప్పుడు కూడా ఒకేలా ఆడాను' అని ధావన్‌ చెప్పుకొచ్చారు.

సంగీతమంటే ఇష్టం:

'సంగీతమంటే చాలా ఇష్టం. ఖాళీ సమయం దొరుకుతే సాధన చేస్తుంటాను. పాటలు కూడా వింటాను. వీటితో ఒత్తిడి దూరమవుతుంది. సిరీస్‌ల మధ్య గ్యాప్ ఉంటే కుటుంబంతో గడపడానికి ఇష్టపడతా. సిరీస్‌లలో జట్టు యాజమాన్యం అవకాశం ఇస్తే వారు నా వెంటే ఉంటారు. ఎక్కడ ఉన్నా కూడా వారు నాకు అండగా ఉంటారు' అని ధావన్ పేర్కొన్నారు.