కాకతాళీయంగా పట్టాను: ‘క్యాచ్‌ ఆఫ్‌ ది సెంచరీ’పై బెన్ స్టోక్స్ (వీడియో)

35వ ఓవర్‌లో

సఫారీ ఇన్నింగ్స్ 35వ ఓవర్‌లో ఈ అద్భుతం చోటు చేసుకుంది. రషీద్‌ బౌలింగ్‌లో ఫెలుక్వాయో బంతిని డీప్‌ మిడ్‌వికెట్ మీదగా ఆడాడు. అదే సమయంలో బౌండరీ వద్ద ఫీల్డింగ్ చేస్తోన్న స్టోక్స్ సూపర్ మ్యాన్‌లా గాల్లో వెనక్కి ఎగురుతూ ఒంటి చేత్తో బంతిని ఒడిసిపట్టుకున్నాడు.

‘క్యాచ్‌ ఆఫ్‌ ది సెంచరీ’గా అభివర్ణన

దీనిని పలువురు మాజీ క్రికెటర్లు ‘క్యాచ్‌ ఆఫ్‌ ది సెంచరీ'గా అభివర్ణించారు. ఈ సందర్భంగా బెన్ స్టోక్స్ మాట్లాడుతూ "ఆ క్యాచ్‌ని కాకతాళీయంగా పట్టాను. నిజానికి ఆ సమయంలో నేను సరైన స్థితిలో లేను. నేను గానీ సరిగ్గా ఉంటే అది మామూలు క్యాచే. అయితే క్యాచ్‌ పట్టినపుడు.. ప్రేక్షకులు కొట్టిన చప్పట్లు మాత్రం అద్భుతంగా అనిపించాయి" అని తెలిపాడు.

దక్షిణాఫ్రికా ఓటమిలో కీలకపాత్ర

కాగా, ఈ మ్యాచ్‌లో ఇంగ్లాండ్‌ ఆల్‌రౌండర్‌ బెన్‌స్టోక్స్‌ అద్భుత ప్రదర్శనతో దక్షిణాఫ్రికా ఓటమిలో కీలకపాత్ర పోషించాడు. బ్యాటింగ్‌, బౌలింగ్‌, ఫీల్డింగ్‌ ఇలా... మూడు విభాగాల్లో రాణించాడు. బ్యాటింగ్‌లో 79 బంతుల్లో 89 పరుగులు చేసిన బెన్ స్టోక్స్‌.. అనంతరం రెండు వికెట్లు, రెండు క్యాచ్‌లు, ఒక రనౌట్‌తో సత్తా చాటాడు.

క్రికెట్‌ చరిత్రలో అతి గొప్ప క్యాచ్‌ల్లో ఒకటిగా

మ్యాచ్ అనంతరం ఇంగ్లాండ్‌ మాజీ కెప్టెన్‌ నాసిర్‌ హుస్సేన్‌ అయితే ఈ క్యాచ్‌ను క్రికెట్‌ చరిత్రలో అతి గొప్ప క్యాచ్‌ల్లో ఒకటిగా అభివర్ణించాడు. ఈ మ్యాచ్‌లో తొలుత బ్యాటింగ్ చేసిన ఇంగ్లాండ్ నిర్ణీత 50 ఓవర్లలో 8 వికెట్లకు 311 పరుగులు చేసింది. అనంతరం లక్ష్యఛేదనలో దక్షిణాఫ్రికా 39.5 ఓవర్లలో 207 పరుగులకు ఆలౌటైంది. దీంతో ఇంగ్లాండ్ 104 పరుగుల తేడాతో విజయం సాధించింది.