ప్రతీకా స్థానంలో ఎవరు ఓపెనింగ్ చేస్తారు? మిథాలీ రాజ్ మాటల్లో సమాధానం!

ICC Womens World Cup 2025: ప్రముఖ భారత మహిళా బ్యాటర్ ప్రతీకా రావల్ ఐసీసీ మహిళల ప్రపంచకప్‌లో అద్భుతమైన ఫామ్‌ను కొనసాగించింది. ప్రతీకా ఆరు ఇన్నింగ్స్‌లలో ఒక సెంచరీతో సహా 51.33 సగటుతో 308 పరుగులు చేసి జట్టుకు కీలకంగా నిలిచింది. అయితే ఆదివారం బంగ్లాదేశ్ జట్టుతో జరిగిన మ్యాచ్‌లో డీప్ మిడ్ వికెట్‌లో ఫీల్డింగ్ చేస్తున్నప్పుడు తడి అవుట్ ఫీల్డ్‌లో పాదం ఇరుక్కుపోయి చీలమండ తిరగడం వల్ల ఆమె గాయపడింది. ఈ తీవ్రమైన గాయం కారణంగా గురువారం ఆస్ట్రేలియాతో జరగబోయే కీలకమైన సెమీఫైనల్ మ్యాచ్‌కు ప్రతీకా దూరమయ్యే అవకాశం ఉంది. ఇది భారత జట్టుకు పెద్ద ఎదురుదెబ్బగా పరిణమించింది. ఇప్పుడు జట్టు యాజమాన్యం స్మృతి మంధానతో కలిసి ఇన్నింగ్స్ ప్రారంభించేందుకు సరైన ఓపెనర్‌ను కనుగొనే సవాలును ఎదుర్కొంటోంది.

హర్లీన్ డియోల్‌కు మిథాలీ రాజ్ మద్దతు
ప్రతీకా రావల్ స్థానంలో ఎవరు ఓపెనింగ్ చేస్తారనే చర్చ జరుగుతున్న తరుణంలో మాజీ భారత కెప్టెన్ మిథాలీ రాజ్ తన అభిప్రాయాన్ని స్పష్టం చేశారు. ఆమె యువ బ్యాటర్ హర్లీన్ డియోల్‌కు గట్టి మద్దతు పలికారు. మిథాలీ రాజ్ ప్రకారం.. ప్రతీకా రావల్ ఆడటానికి ఫిట్‌గా లేకపోతే నంబర్ 3 బ్యాటర్ అయిన హర్లీన్ డియోల్‌ను ఓపెనర్‌గా ప్రమోట్ చేయడం మొదటి ఎంపిక కావాలి. హర్లీన్ డియోల్ తరచుగా త్వరగా క్రీజులోకి రావడం, కొత్త బంతిని సులభంగా ఎదుర్కోగల సామర్థ్యం దీనికి కారణంగా మిథాలీ రాజ్ వివరించారు. ఈ నిర్ణయం ద్వారా హర్లీన్, స్మృతి మంధానతో కలిసి మైదానంలో మంచి సమన్వయాన్ని ఏర్పరచుకోవడానికి అవకాశం ఉంటుందని మిథాలీ రాజ్ అభిప్రాయపడ్డారు.

అమన్‌జోత్ ఓపెనింగ్‌పై మిథాలీ ఆందోళన
బంగ్లాదేశ్‌తో జరిగిన మ్యాచ్‌లో ప్రతీకా రావల్ గాయపడిన తర్వాత అమన్‌జోత్ కౌర్ స్మృతి మంధానతో కలిసి ఇన్నింగ్స్ ప్రారంభించడంపై మిథాలీ రాజ్ ఆశ్చర్యం వ్యక్తం చేశారు. అమన్‌జోత్‌కు క్రీజులో సమయం అవసరమే అయినప్పటికీ.. ఆమెను ఓపెనింగ్‌కు పంపడం సరైన వ్యూహం కాదని మిథాలీ రాజ్ పేర్కొన్నారు. బంగ్లాదేశ్ మ్యాచ్‌లో హర్లీన్ డియోల్‌కు ఓపెనింగ్ అవకాశం ఇచ్చి ఉంటే, అది ఆమెకు స్మృతి మంధానతో సమన్వయం ఏర్పరచుకోవడానికి మంచి అవకాశంగా ఉండేదని ఆమె సూచించారు. బదులుగా అమన్‌జోత్‌ను నంబర్ 3 లేదా అంతకంటే తక్కువ స్థానంలో ఆడించి ఉండవలసిందని మిథాలీ అభిప్రాయం వ్యక్తం చేశారు.

ప్రత్యామ్నాయ కీపింగ్ ఎంపిక.. ఉమా చెత్రీ
ఓపెనర్ ఎంపికతో పాటు మిథాలీ రాజ్ మరో ప్రత్యామ్నాయం గురించి కూడా ప్రస్తావించారు. అది వికెట్ కీపర్-బ్యాటర్ అయిన ఉమా చెత్రీ. ఆమె బంగ్లాదేశ్‌తో జరిగిన మ్యాచ్‌లో రిచా ఘోష్ స్థానంలో జట్టులోకి వచ్చింది. అయితే ఉమా చెత్రీని సెమీఫైనల్ ప్లేయింగ్ XIలో చేర్చుకోవడం అనేది జట్టు సమతుల్యతపై ఆధారపడి ఉంటుందని మిథాలీ తెలిపారు.ఒకవేళ రిచా ఘోష్ వికెట్ కీపర్‌గా తిరిగి జట్టులోకి వస్తే ఉమా చెత్రీని పక్కన పెట్టాల్సి వస్తుందని ఆమె పేర్కొన్నారు. తుది జట్టు కూర్పు అనేది ప్రతీక రావల్ స్థానాన్ని భర్తీ చేసే ఆటగాళ్లను, వికెట్ కీపింగ్ ఎంపికను బట్టి మారుతుందని దీని ద్వారా అర్థమవుతోంది.