వన్డే ర్యాంకింగ్స్‌.. టాప్‌లోనే కోహ్లీ, బుమ్రా

టాప్‌లో కోహ్లీ:

బ్యాటింగ్‌ విభాగంలో విరాట్ కోహ్లీ అగ్రస్థానంలో ఉండగా.. టీమిండియా ఓపెనర్, వైస్ కెప్టెన్ రోహిత్‌ శర్మ (863) రెండో స్థానంలో కొనసాగుతున్నాడు. బాబర్ ఆజమ్, డుప్లెసిస్, రాస్ టేలర్, కేన్ విలియమ్సన్ వరుసగా ఉన్నారు. కోహ్లీ, రోహిత్ తప్పితే టాప్ -10లో మరో భారత ఆటగాడు లేడు. ఓపెనర్ శిఖర్ ధావన్ 19వ స్థానానికి పడిపోయాడు.

పదో స్థానంలో పాండ్యా:

బౌలింగ్‌లో భారత్‌ నుంచి బుమ్రా మినహా ఎవరూ టాప్‌-10లో చోటు దక్కించుకోలేకపోయారు. న్యూజిలాండ్‌ పేసర్ ట్రెంట్‌ బౌల్ట్‌ 740 పాయింట్లతో రెండో స్థానంలో ఉన్నాడు. ముజీబ్ ఉర్ రెహ్మాన్, కగిసో రబాడ, పాట్ కమ్మిన్స్ టాప్-5లో ఉన్నారు. ఆల్‌రౌండ్‌ ర్యాంకింగ్స్‌లో ప్రపంచకప్ హీరో బెన్ స్టోక్స్‌ 319 పాయింట్లతో టాప్ ర్యాంకును సొంతం చేసుకోగా.. రెండో స్థానంలో అఫ్గాన్ ఆటగాడు మహ్మద్ నబీ ఉన్నాడు. ఈ జాబితాలో హార్దిక్‌ పాండ్యా పదో స్థానంలో నిలిచాడు.

రెండో స్థానంలో భారత్‌:

జట్టు ర్యాంకింగ్స్‌లో ప్రపంచకప్‌ విజేత ఇంగ్లాండ్‌ (125) అగ్రస్థానంలో ఉంది. భారత్‌ (122) రెండో స్థానంలో కొనసాగుతోంది. టెస్ట్ ఫార్మాట్‌లో మొదటి స్థానంలో ఉన్న భారత్.. టీ20ల్లో ఐదో స్థానంలో కొనసాగుతోంది. తాజాగా బంగ్లాతో జరిగిన మూడు టీ20ల సిరీస్‌ను టీమిండియా 2-1తో కైవసం చేసుకున్న సంగతి తెలిసిందే. రెండు టెస్టుల సిరీస్‌లో భాగంగా భారత్‌-బంగ్లాదేశ్‌ మధ్య తొలి టెస్టు నవంబర్‌ 14న ప్రారంభం కానుంది. డిసెంబర్‌లో వెస్టిండీస్‌తో టీమిండియా మూడు టీ-20 సిరీస్ ఆడనుంది. ఈ సిరీస్ డిసెంబర్ 6న ప్రారంభం అవుతుంది.

88 స్థానాలను ఎగబాకాడు:

బంగ్లాతో జరిగిన టీ20 సిరీస్‌లో 8 వికెట్లు తీసి 'మ్యాన్‌ ఆఫ్‌ ద సిరీస్‌' అవార్డు అందుకున్న టీమిండియా పేసర్‌ దీపక్‌ చహర్‌ తన టీ20 ర్యాంక్‌ను మరింత మెరుగుపరుచుకున్నాడు. సోమవారం విడుదల చేసిన బౌలింగ్‌ ర్యాంకింగ్స్‌లో చహర్‌ 42వ స్థానంలో నిలిచాడు. చివరి టీ20లో హ్యాట్రిక్‌తో సహా 6 వికెట్లు పడగొట్టడంతో చహర్‌ ఒకేసారి 88 స్థానాలను ఎగబాకాడు. ఇది చహర్‌కు అత్యుత్తమ టీ20 రాంక్.

ఏడో స్థానాన్ని కాపాడుకున్న రోహిత్‌:

బ్యాట్స్‌మెన్‌ టీ20 ర్యాంకింగ్స్‌లో భారత ఓపెనర్‌ రోహిత్‌ శర్మ ఏడో స్థానాన్ని కాపాడుకున్నాడు. రాజ్‌కోట్ వేదికగా జరిగిన రెండో టీ20లో తృటిలో సెంచరీని మిస్సైన రోహిత్ శర్మ ఈ సిరిస్‌లో మొత్తం 96 పరుగులు చేశాడు. ఫలితంగా టీ20ల్లో తన ర్యాంకుని మరింతగా మెరుగుపరుచుకున్నాడు. దీంతో ఐసీసీ ర్యాంకింగ్స్‌లో మూడు ఫార్మాట్లలో టాప్-10లో చోటు దక్కించుకున్న ఏకైక భారత బ్యాట్స్‌మన్‌గా అరుదైన ఘనత సాధించాడు. ప్రస్తుతం రోహిత్ శర్మ టెస్టుల్లో 10వ ర్యాంకులో, వన్డేల్లో రెండో ర్యాంకులో, టీ20ల్లో 7వ ర్యాంకులో కొనసాగుతున్నాడు.