ప్రపంచకప్‌కు ముందే ఆస్ట్రేలియాకు భారీ షాక్...

ఖవాజాకు గాయం:

ఆస్ట్రేలియా టాప్‌ ఆర్డర్‌ బ్యాట్స్‌మన్‌ ఉస్మాన్‌ ఖవాజా గాయపడ్డాడు. సోమవారం శ్రీలంకతో జరుగుతున్న వార్మప్‌ మ్యాచ్‌లో ఫీల్డింగ్‌ చేస్తుండగా అతడికి ఎడమ మోకాలికి బంతి తగిలింది. దీంతో వెంటనే ఆసీస్‌ వైద్యుడు వచ్చి చికిత్స చేసినా ఫలితం లేకపోవడంతో ఖవాజా మైదానాన్ని వీడాడు. గాయం తీవ్రతపై ఇంకా పూర్తి సమాచారం అందలేదు. అయితే అనంతరం అతడు బ్యాటింగ్ చేసాడు. దీంతో గాయం తీవ్రత పెద్దది కాదని తెలుస్తోంది. ఇపుడు బాగానే ఉన్నా.. అసలు పోరు వరకు గాయం ఏమైనా తిరుగబడుతుందో అని ఆసీస్ ఆందోళనలో ఉంది.

తొలి వార్మప్‌ మ్యాచ్‌లో కూడా:

గత బుధవారం ఇంగ్లాండ్‌తో జరిగిన తొలి వార్మప్‌ మ్యాచ్‌లోనూ ఖవాజాకు గాయమైంది. ఆసీస్‌ బ్యాటింగ్‌ చేస్తుండగా.. ఖవాజా దవడకి బంతి బలంగా తగిలింది. దీంతో రిటైర్డ్‌ హర్ట్‌గా వెనుదిరిగాడు. అనంతరం అతడిని ఆస్పత్రికి తరలించి వైద్యం అందించారు. స్కానింగ్‌లో ఎముక విరగలేదని తేలడంతో ఆసీస్ ఊపిరి పీల్చుకుంది. సోమవారం మరలా గాయం అవ్వడంతో ఆసీస్ జట్టు ఆందోళనకు గురైంది.

శ్రీలంకపై విజయం:

రెండవ వార్మప్‌ మ్యాచ్‌ల్లో ఆస్ట్రేలియా 5 వికెట్లతో శ్రీలంకపై విజయం సాధించింది. తొలుత శ్రీలంక 8 వికెట్లకు 239 పరుగులు చేసింది. తిరిమన్నే (56), డిసిల్వా (43)లు రాణించారు. ఆసీస్ స్పిన్నర్ జంపా 2 వికెట్లు తీసాడు. అనంతరం ఆస్ట్రేలియా 44.5 ఓవర్లలో 5 వికెట్లకు 241 పరుగులు చేసి గెలిచింది. ఖవాజా (83) అర్ధ సెంచరీ చేసాడు.