ప్రపంచకప్‌ తొలి మ్యాచ్.. నాలుగో స్థానం రాహుల్‌దేనా?

రాయుడు విఫలం:

ఆస్ట్రేలియా సిరీస్‌, ఐపీఎల్-12లో రాయుడు అంతగా ఆకట్టుకోలేకపోయాడు. ఇదే సమయంలో పంజాబ్ తరపున పరుగుల వరద పారిస్తూ కేఎల్‌ రాహుల్‌ ఆకట్టుకున్నాడు. దీంతో ప్రపంచకప్‌ జట్టు నాలుగో స్థానంలో విజయ్ శంకర్, కేఎల్‌ రాహుల్‌లను బీసీసీఐ ఎంపిక చేసింది. ఇద్దరు రేసులో ఉన్నా.. నం.4లో ఎవరు ఆడుతారో అని కెప్టెన్ కోహ్లీ, కోచ్ స్పష్టత ఇవ్వలేదు.

రాహుల్‌ మెరుపు శతకం:

నం.4లో ఎక్కువగా వినిపిస్తున్న పేరు విజయ్ శంకర్. అయితే ప్రాక్టీస్‌ మ్యాచ్‌లకు ముందు శంకర్ గాయపడడంతో.. తొలి ప్రాక్టీస్‌ మ్యాచ్‌లో కేఎల్‌ రాహుల్‌ అవకాశం దక్కించుకున్నాడు. మ్యాచ్‌లో రాహుల్‌ 10 బంతులు ఆడి 6 పరుగులు చేసి బోల్డ్ అయ్యాడు. రెండవ ప్రాక్టీస్‌ మ్యాచ్‌లో 94 బంతుల్లో (108; 99 బంతుల్లో 12×4, 4×6) మెరుపు శతకం చేసాడు. మరోవైపు శంకర్ (2) విఫలమయ్యాడు.

నెట్స్‌లో ప్రాక్టీస్:

ప్రపంచకప్‌లో భాగంగా టీమిండియా బుధవారం దక్షిణాఫ్రికాతో తొలి మ్యాచ్‌ ఆడనుంది. తొలి మ్యాచ్‌కు ఇంకా ఒక్క రోజు మాత్రమే సమయం ఉండడంతో టీమిండియా ఆటగాళ్లు అందరూ నెట్స్‌లో శ్రమిస్తున్నారు. సెంచరీ చేసి మంచి ఊపుమీదున్న రాహుల్ కూడా నెట్స్‌లో బ్యాటింగ్ ప్రాక్టీస్ చేస్తున్నాడు. డిఫెన్స్, స్ట్రోక్స్‌, స్ట్రయిట్ షాట్స్ ఆడుతూ రాహుల్‌ మంచి టచ్ లో ఉన్నాడు. మరోవైపు ఎంఎస్ ధోనీ కూడా బ్యాటింగ్ ప్రాక్టీస్ చేసాడు.

నాలుగో స్థానం రాహుల్‌దే:

రాహుల్ బ్యాటింగ్ ప్రాక్టీస్ వీడియోను బీసీసీఐ తన అధికారిక ట్విటర్‌లో షేర్ చేసింది. దీంతో దక్షిణాఫ్రికాతో జరిగే మ్యాచ్‌లో రాహుల్ నాలుగో స్థానంలో బరిలోకి దిగుతాడనే సంకేతాలు వచ్చాయి. ఇక నాలుగో స్థానంలో రాహుల్‌ను ఆడించాలని కెప్టెన్‌ విరాట్ కోహ్లీతో పాటు టీం మేనేజిమెంట్ భావిస్తోందని సమాచారం తెలుస్తోంది.