'ఇది మంచి పునరాగమనం.. ఫామ్‌ ఇలాగే కొనసాగిస్తా'

ఫామ్‌ ఇలాగే కొనసాగిస్తా:

'ఇది చాలా పెద్ద విజయం. మ్యాచ్‌కు ముందు కొద్దిగా ఒత్తిడికి గురయ్యాను. అయితే ఫించ్ తన మార్క్ బ్యాటింగ్ తో ఒత్తిడి తగ్గించాడు. గత సంవత్సరం నుండి కేవలం టీ-20లు మాత్రమే ఆడడంతో.. ఇన్నింగ్స్ నెమ్మదిగా ఆరంబించా. బాల్ ట్యాంపరింగ్‌ వివాదం అనంతరం తొలి మ్యాచ్ ఆడా. ఇది నాకు మంచి పునరాగమనం. ఈ ఫామ్‌ ఇలాగే కొనసాగిస్తా' అని వార్నర్‌ ఆశాభావం వ్యక్తం చేసాడు.

ఇదే దూకుడు కొనసాగిస్తాం:

'ఆస్ట్రేలియా జట్టు ఇంతకు ముందులా లేదు. అప్పుడు అందరూ అనుభవం ఉన్న ఆటగాళ్లు ఉన్నారు. ప్రస్తుత జట్టుకు మంచి ఎనర్జి ఉంది. జట్టు సభ్యుల మధ్య మంచి వాతావరణం ఉంది. ఈ మ్యాచ్‌ కోసం మేం నాలుగు రోజుల ముందే సన్నద్ధమయ్యాం. అప్పుడే ప్రణాళికలు సిద్ధం చేసుకున్నాం. మిగతా మ్యాచులలో కూడా ఆసీస్‌ ఇదే దూకుడు కనబరుస్తుంది' అని వార్నర్‌ చెప్పుకొచ్చాడు.

వార్నర్‌ అర్ధ సెంచరీ:

2019 ప్రపంచకప్‌లో డిఫెండింగ్‌ ఛాంపియన్‌ ఆస్ట్రేలియా శుభారంభం చేసింది. శనివారం జరిగిన తన తొలి మ్యాచ్‌లో ఆసీస్ 7 వికెట్ల తేడాతో అఫ్గానిస్థాన్‌పై ఘనవిజయం సాధించింది. బౌలింగ్‌లో ప్యాట్‌ కమిన్స్‌ (3/40), ఆడమ్‌ జంపా (3/60), స్టాయినిస్‌ (2/37)ల ధాటికి అఫ్గాన్‌.. 38.2 ఓవర్లలో 207 పరుగులకే ఆలౌటైంది. నజీబుల్లా జాద్రాన్‌ (51; 49 బంతుల్లో 7×4, 2×6) అర్ధ సెంచరీ చేసాడు. అనంతరం ఆసీస్ ఓపెనర్లు డేవిడ్‌ వార్నర్‌ (89 నాటౌట్‌; 114 బంతుల్లో 8×4), ఆరోన్‌ ఫించ్‌ (66; 49 బంతుల్లో 6×4, 4×6) సమయోచిత ఇన్నింగ్స్‌తో లక్ష్యాన్ని ఆసీస్‌ 34.5 ఓవర్లలో 3 వికెట్లు కోల్పోయి ఛేదించింది.