మెరిసిన స్టోక్స్‌, ఆర్చర్‌.. ప్రపంచకప్‌లో ఇంగ్లాండ్ శుభారంభం

ఆర్చర్‌ మెరుపులు:

భారీ లక్ష్య ఛేదనలో దక్షిణాఫ్రికా ఇన్నింగ్స్‌ను పేలవంగా ఆరంభించింది. 8వ ఓవర్లో మార్‌క్రమ్‌ (11)ను ఔట్‌ చేసిన ఆర్చర్‌.. తన తర్వాతి ఓవర్లో కెప్టెన్ డుప్లెసిస్‌ (5)నూ పెవిలియన్ చేర్చాడు. మరోవైపు ఓపెనర్ ఆమ్లా కూడా రిటైర్డ్‌హర్ట్‌గా వెనుదిరిగి ఉండడంతో దక్షిణాఫ్రికా కష్టాల్లో పడింది. నాలుగో ఓవర్లో ఆర్చర్‌ బౌన్సర్‌ హెల్మెట్‌కు బలంగా తగలడంతో ఆమ్లా గాయపడ్డాడు.

78 పరుగులకే 8 వికెట్లు:

మరో ఓపెనర్ డికాక్‌కు దుసెన్‌ అండగా నిలవడంతో దక్షిణాఫ్రికా మంచి స్థితిలో నిలిచింది. 22 ఓవర్లలో 125/2తో పటిష్టంగా ఉంది. డికాక్‌ (68)ను ఔట్‌ చేసిన ప్లంకెట్‌.. 95 పరుగుల మూడో వికెట్‌ భాగస్వామ్యానికి తెరదించాడు. ఆపై డుమిని (8), ప్రిటోరియస్ (1), దుసెన్‌ (50) అవుట్ అయ్యారు. ఆ తర్వాత ఒక్క బ్యాట్స్‌మనూ క్రీజులో నిలవలేకపోయాడు. ఆమ్లా (13) మళ్లీ బ్యాటింగ్‌కు వచ్చినా ఫలితం లేకపోయింది. దక్షిణాఫ్రికా 78 పరుగులకే తన చివరి ఎనిమిది వికెట్లు చేజార్చుకుని ఓడిపోయింది.

రెండో వికెట్‌కు 106 పరుగులు:

అంతకుముందు టాస్‌ ఓడి తొలుత బ్యాటింగ్‌కు దిగిన ఇంగ్లండ్‌కు ఆదిలోనే షాక్ తగిలింది. ఓపెనర్‌ బెయిర్‌ స్టో తొలి ఓవర్‌లోనే డకౌట్‌ అయ్యాడు. మరో ఓపెనర్ జేసన్‌ రాయ్‌ (54: 53 బంతుల్లో 8 ఫోర్లు), జో రూట్‌(51: 59 బంతుల్లో 5 ఫోర్లు)లు ఆదుకున్నారు. ఈ జోడి రెండో వికెట్‌కు 106 పరుగులు సాధించిన తర్వాత జేసన్‌ రాయ్‌ పెవిలియన్‌ చేరగా, ఆపై స్వల్ప వ్యవధిలో రూట్‌ కూడా ఔటయ్యాడు. ఆ తరుణంలో మోర్గాన్‌-బెన్‌ స్టోక్స్‌ల జోడి ఇన్నింగ్స్‌ను గాడిలో పెట్టారు.

స్టోక్స్‌ సమయోచిత ఇన్నింగ్స్:

ఇయాన్‌ మోర్గాన్‌ (57: 60 బంతుల్లో 4 ఫోర్లు, 3 సిక్సర్లు), బెన్‌ స్టోక్స్‌ ( 89: 79 బంతుల్లో 9 ఫోర్లు)లు రాణించి జట్టు స్కోరు సాధించడంలో తోడ్పడ్డారు. వీరిద్దరూ నాల్గో వికెట్‌కు మరో 106 పరుగుల భాగస్వామ్యాన్ని జత చేసారు. అనంతరం జోస్‌ బట్లర్‌ (18), మొయిన్‌ అలీ (3)లు నిరాశపరిచారు. అయితే బెన్‌ స్టోక్స్‌ సమయోచితంగా ఆడి స్కోరును మూడొందలు దాటించి 49 ఓవర్‌ చివరి బంతికి ఔటయ్యాడు.