ఇంగ్లండ్‌తో మ్యాచ్.. ఆరెంజ్‌ జెర్సీలో కోహ్లీసేన

త్వరలో టీమిండియా జెర్సీ మారనుంది. ప్రపంచకప్‌లో ఇప్పటి వరకు బ్లూ జెర్సీతో బరిలోకి దిగిన కోహ్లీసేన.. తొలిసారి ఆరెంజ్‌ జెర్సీతో బరిలోకి దిగనుంది. కేవలం ఇంగ్లండ్‌తో జరిగే మ్యాచ్‌కు మ్రాతమే కోహ్లీసేన ఆరెంజ్‌ జెర్సీతో ఆడనుంది. ఎడ్జ్ బాస్టన్ వేదికగా ఈ నెల 30న కోహ్లిసేన ఆరెంజ్‌ జెర్సీలో ఆడనుంది. ఇన్ని రోజులు బ్లూ జెర్సీలో కనిపించిన భారత ఆటగాళ్లు.. రెంజ్‌ జెర్సీలో అభిమానులను అలరించనున్నారు.

ఐసీసీ క్రికెట్ వరల్డ్‌కప్-2019 ప్రత్యేక వార్తల కోసం

ప్రపంచకప్‌లో ఇంగ్లాండ్ బ్లూ జెర్సీతో బరిలోకి దిగుతున్న విషయం తెలిసిందే. భారత్‌ జట్టు జెర్సీ రంగు కూడా బ్లూ కావడంతో అభిమానులతో సహా అందరూ అయోమయానికి గురయ్యే అవకాశం ఉంది. ఈ నేపథ్యంలో ఐసీసీ జెర్సీ రంగులు క్లాష్‌ కాకుండా ఒక్కో జట్టుకు ప్రత్యామ్నాయ జెర్సీలకు అవకాశం ఇచ్చింది. ఇప్పుడు ఈ ప్రత్యామ్నాయ జెర్సీనే కోహ్లీసేన వాడనుంది

ఐసీసీ ఈవెంట్స్‌లో పాల్గొనే జట్లు అన్నీ విభిన్న రంగులున్న రెండు జెర్సీలను కలిగి ఉండాలి. ఈ విషయంలో ఆతిథ్య జట్టుకు మినహాయింపు ఉంది. జట్లన్నీ ఒక రంగునే టోర్నీ మొత్తం కొనసాగించాలి. ఒకే రంగు జెర్సీ కలిగిన జట్లు తలపడినప్పడు మాత్రం ప్రత్యామ్నాయ జెర్సీని ఎంచుకోవాలి. ఇక ప్రపంచకప్‌ టోర్నీకి ఇంగ్లండ్‌ ఆతిథ్యమివ్వడంతో ఆ జట్టు అదే జెర్సీతో బరిలోకి దిగనుంది కాబట్టి.. భారత్ ప్రత్యామ్నాయ జెర్సీతో బరిలోకి దిగాలి.

శనివారం జరిగే అఫ్గానిస్తాన్‌ మ్యాచ్‌కే భారత జట్టు ఆరెంజ్‌ జెర్సీలో మ్యాచ్ ఆడాలి. కానీ ఆ మ్యాచ్‌కు అఫ్గాన్‌ జట్టే ప్రత్యామ్నాయ జెర్సీతో బరిలోకి దిగుతుండటంతో.. భారత్‌ తన బ్లూ జెర్సీతోనే బరిలోకి దిగుతోంది. టోర్నీలో ఇప్పటికే కొన్ని జట్లు కొత్త జెర్సీతో బరిలోకి దిగగా.. మరిన్ని జట్లు కొత్త జెర్సీలతో ఆడనున్నాయి.