మరో 6 పరుగులు చేస్తే.. ఆ రికార్డు క్రిస్‌ గేల్‌దే!!

ఆరు పరుగులు చేస్తే:

క్రిస్ గేల్ వెస్టిండిస్ తరఫున మరో సరికొత్త రికార్డు నెలకొల్పడానికి సిద్ధంగా ఉన్నాడు. ప్రపంచకప్‌లో మరో ఆరు పరుగులు చేస్తే.. వెస్టిండిస్ తరఫున మెగా టోర్నీలో వెయ్యికి పైగా పరుగులు పూర్తి చేసిన మూడో ఆటగాడిగా క్రిస్ గేల్ నిలువనున్నాడు. విండీస్ మాజీ దిగ్గజ ఆటగాళ్లు బ్రియన్ లారా, వివ్ రిచర్డ్స్ తర్వాత ఈ అరుదైన ఫీట్ అందుకోనున్న మూడో క్రికెటర్ గేల్.

52వ అర్ధ శతకం:

పాకిస్థాన్‌తో మ్యాచ్‌లో 33 బంతుల్లో 6ఫోర్లు, 3సిక్సర్లతో క్రిస్ గేల్ మెరుపు అర్ధ శతకం చేసాడు. వన్డే కెరీర్‌లో గేల్‌కు 52వ అర్ధ శతకం. పాకిస్థాన్‌తో మ్యాచ్ ఆరంభానికి ముందు గేల్ 1000 పరుగులు పూర్తి చేయడానికి 56 పరుగుల దూరంలో ఉన్నాడు. ఈ మ్యాచ్‌లో అర్ధ శతకం చేసి అవుట్ అయ్యాడు. దీంతో మరో సరికొత్త రికార్డుకు ఆరు పరుగుల దూరంలో నిలిచాడు.

వెస్టిండీస్‌ విజయం:

పాకిస్థాన్‌తో జరిగిన మ్యాచ్‌లో వెస్టిండీస్‌ 7 వికెట్ల తేడాతో విజయం సాధించింది. విండీస్ పేస్‌ బౌలర్లు ఒషేన్‌ థామస్‌ (4/27), జేసన్‌ హోల్డర్‌ (3/42), రసెల్‌ (2/4)ల ధాటికి విలవిల్లాడిన పాకిస్థాన్‌.. 21.4 ఓవర్లలో 105 పరుగులకే ఆలౌటైంది. ఫకర్‌ జమాన్‌ (22), బాబర్‌ అజామ్‌ (22) టాప్‌ స్కోరర్లు. స్వల్ప లక్ష్యాన్ని వెస్టిండీస్‌ 13.4 ఓవర్లలో 3 వికెట్లు కోల్పోయి సునాయాసంగా ఛేదించింది. గేల్‌ (50; 34 బంతుల్లో 6×4, 3×6) మెరుపు అర్ధ శతకం చేసాడు. నికోలస్‌ పూరన్‌ 34 పరుగులతో అజేయంగా నిలిచాడు.