కివీస్‌తో బంగ్లా ఢీ: షకీబ్ అరుదైన ఘనత

ఉత్సాహంతో బంగ్లా:

బంగ్లా తాజాగా భారత్‌తో ప్రాక్టీస్‌ మ్యాచ్‌లో ఓడినా.. తొలి మ్యాచ్‌లో సఫారీలను మట్టికరిపించింది. తొలి మ్యాచ్‌లో తమీమ్ ఇక్బాల్ విఫలమయినా.. ముష్పికర్ రహీం, సౌమ్యా సర్కార్, మహ్మదుల్లా, ఆల్‌రౌండర్‌ షకిబ్‌ అల్‌ హసన్‌లు రాణించారు. మిథున్, షబ్బీర్ రెహమాన్లతో బ్యాటింగ్ లైనప్ బాగానే ఉంది. ముస్తఫిజుర్ రెహమాన్, సైఫుద్దీన్ లు పేస్ విభాగంలో చెలరేగేందుకు సిద్ధంగా ఉన్నారు. మోర్తజా, షకిబ్‌లు బౌలింగ్ భారం మోయనున్నారు. పటిష్టంగా ఉన్న బంగ్లా రెండో మ్యాచ్‌లో నెగ్గాలని చూస్తోంది.

పటిష్ట బ్యాటింగ్:

ప్రస్తుతం కివీస్‌ అసాధారణ ఫామ్‌లో ఉంది. బౌలింగ్, బ్యాటింగ్‌లో సమతూకంతో ఉంది. తొలి మ్యాచ్‌లో శ్రీలంకను 136 పరుగులకే పరిమితం చేసిన కివీస్ బౌలర్లు దూకుడుమీదున్నారు. పేసర్లు హెన్రీ, బౌల్ట్, ఫెర్గుసన్ నిప్పులు చెరిగే బంతులతో బెంబేలెత్తిస్తున్నారు. లక్ష్యాన్ని ఓపెనర్ బ్యాట్స్‌మన్‌లే ఛేదించారు. గుప్తిల్, మున్రోలు అర్ధ శతకాలతో రాణించారు. వీరికి తోడు విలియం సన్, టేలర్, లాతమ్, నీషంలు ఉన్నారు. ఈ నేపథ్యంలో బంగ్లాకు ఇది క్లిష్టమైన మ్యాచే.

గత రికార్డులు:

ప్రపంచకప్‌లో బంగ్లాదేశ్‌, న్యూజిలాండ్‌ 4 మ్యాచ్‌లు ఆడగా.. అన్నింట్లో కివీసే గెలిచింది. మొత్తంగా బంగ్లా, కివీస్‌లు 35 వన్డేలు ఆడాయి. న్యూజిలాండ్‌ 24 గెలవగా.. బంగ్లా 10 గెలిచింది. ఒక మ్యాచ్‌ రద్దయింది. చివరి 3 మ్యాచ్‌ల్లో కివీస్‌ విజయం సాధించింది. సాయంత్రం 6 నుంచి మ్యాచ్ ప్రారంభం కానుంది.

షకీబ్‌ @ 200:

షకిబ్‌ అల్‌ హసన్‌కు ఇది 200వ వన్డే. బంగ్లాదేశ్‌ తరఫున 200 మ్యాచ్‌లు పూర్తి చేసుకోనున్న మూడో క్రికెటర్‌గా షకీబ్‌ గుర్తింపు పొడనున్నాడు. ఈ జాబితాలో బంగ్లాదేశ్‌ కెప్టెన్‌ మష్రఫె మొర్తజా (208 మ్యాచ్‌లు), ముష్ఫికర్‌ రహీమ్‌ (206 మ్యాచ్‌లు) తొలి రెండు స్థానాల్లో ఉన్నారు. గత మ్యాచ్‌లో సత్తా చాటిన షకిబ్‌.. ఈ మ్యాచ్‌లోనూ రాణించాలని బంగ్లా కోరుకుంటోంది.