‘సిక్స్‌‌’తో గంగూలీ రికార్డుని బద్దలు కొట్టిన ధోని

హైదరాబాద్: ఛాంపియన్స్ ట్రోఫీలో భాగంగా ది ఓవల్ వేదికగా శ్రీలంకతో జరిగిన మ్యాచ్‌లో టీమిండియా మాజీ కెప్టెన్ మహేంద్ర సింగ్ ధోని అరుదైన ఘనత సాధించాడు. ఈ మ్యాచ్‌లో యువరాజ్ సింగ్ అవుటైన తర్వాత క్రీజులోకి వచ్చిన ధోని అద్భుత ప్రదర్శన చేశాడు.

ఛాంపియన్స్ ట్రోఫీ స్పెషల్ | ఫోటోలు | స్కోరు కార్డు

52 బంతుల్లో 7 ఫోర్లు, 2 సిక్సుల సాయంతో 63 పరుగులతో అర్ధ సెంచరీని సాధించాడు. వన్డే కెరీర్‌లో ధోనికి ఇది 62వ అర్ధ సెంచరీ. శ్రీలంకతో జరిగిన మ్యాచ్‌లో 33.3 ఓవర్లకు గాను 3 వికెట్లు కోల్పోయి 179 పరుగులు చేసింది. యువీ అవుటైన తర్వాత ఐదో స్ధానంలో బ్యాటింగ్‌కి వచ్చిన ధోనిపై ఒత్తిడి ఉంటుందని అంతా భావించారు.

అయితే సిక్స్‌తో పరుగులు ఖాతా తెరిచిన ధోని చివరి ఓవర్ వరకూ శ్రీలంక బౌలర్లను సమర్ధవంతంగా ఎదుర్కొన్నాడు. ఈ మ్యాచ్‌లో రెండు సిక్స్‌లు కొట్టిన ధోని విదేశీ గడ్డపై అత్యధిక సిక్సర్లు కొట్టిన భారత బ్యాట్స్ మెన్‌గా రికార్డు సృష్టించాడు. ఇప్పటి వరకు ఈ రికార్డు మాజీ కెప్టెన్ గంగూలీ పేరిట ఉండేది.

కాగా, 49.2వ ఓవర్లో చండీమాల్‌ బౌలింగ్‌లో ధోనీ అవుటైన సంగతి తెలిసిందే. 296 మ్యాచ్‌లాడిన గంగూలీ 159 సిక్సర్లు బాదగా, 281 మ్యాచ్‌ల్లోనే ధోని 161 సిక్స్‌లతో ఆ రికార్డుని అధిగమించాడు. ఈ జాబితాలో పాకిస్థాన్ క్రికెటర్ అఫ్రిది 402 సిక్సర్లతో అగ్రస్థానంలో కొనసాగుతున్నాడు.