ఆసీస్‌కు కష్టమే!: వర్షంతో బంగ్లా మ్యాచ్ రద్దు (ఫోటోలు)

బంగ్లా 44.3 ఓవర్లలో 182 పరుగులకే ఆలౌట్

ఈ మ్యాచ్‌లో తొలుత బ్యాటింగ్ చేసిన బంగ్లాదేశ్ మిచెల్‌ స్టార్క్‌ (4/29), ఆడమ్‌ జంపా (2/13)లతో పాటు మిగతా బౌలర్లూ రాణించడంతో బంగ్లాదేశ్‌ 44.3 ఓవర్లలో 182 పరుగులకే ఆలౌటైంది. ఓపెనర్‌ తమీమ్‌ ఇక్బాల్‌ (114 బంతుల్లో 95; 6 ఫోర్లు, 3 సిక్సర్లు) మరోసారి అద్భుత ఇన్నింగ్స్‌తో ఆదుకునే ప్రయత్నం చేసినా సహచరుల నుంచి సహకారం లభించలేదు.

రాణించిన తమీమ్ ఇక్బాల్

తమీమ్ ఇక్బాల్ తర్వాత ఆ జట్టులో షకిబ్‌ ఉల్ హాసన్ (29), మెహదీ హసన్‌ (14) మాత్రమే రెండంకెల స్కోరు సాధించారు. ఓ దశలో 141/4తో మెరుగైన స్థితిలోనే ఉన్న బంగ్లాదేశ్ ఆ తర్వాత తక్కువ వ్యవధిలో మిగతా ఆరు వికెట్లు కోల్పోయింది.

ఆసీస్ విజయ లక్ష్యం 183

అనంతరం 183 పరుగుల లక్ష్యంతో బరిలోకి దిగిన ఆసీస్‌.. 16 ఓవర్లలో వికెట్‌ నష్టానికి 83 పరుగులు చేసిన దశలో వర్షం వల్ల మ్యాచ్ ఆగిపోయింది. వర్షంతో ఆట నిలిచే సమయానికి క్రీజులో వార్నర్‌ (44 బంతుల్లో 40 నాటౌట్‌; 2 ఫోర్లు), స్మిత్‌ (25 బంతుల్లో 22 నాటౌట్‌; 1 ఫోర్‌) ఉన్నారు. ఫించ్‌ (19) అవుటయ్యాడు.

మరో నాలుగు ఓవర్లు మ్యాచ్‌ కొనసాగి ఉంటే విజయం ఆసీస్‌దే

డక్‌వర్త్‌/లూయిస్‌ పద్ధతి ప్రకారం ఆసీస్‌ విజయానికి అవసరమైన పరుగులు సాధించింది. మరో నాలుగు ఓవర్లు మ్యాచ్‌ కొనసాగి ఉంటే ఈ మ్యాచ్‌లో విజయం ఆసీస్‌ను వరించేది. కానీ రెండో ఇన్నింగ్స్‌లో కనీసం 20 ఓవర్ల ఆట అయితే తప్ప ఈ పద్ధతిలో విజేతను ప్రకటించరు.

ఇరు జట్లకు చెరో పాయింట్

కానీ వరుణుడు ఎంతకు తెరిపినివ్వకపోవడంతో అంఫైర్లు ఇక మ్యాచ్‌ జరగడం వీలుకాదని తేల్చేసి ఇరు జట్లకు చెరో పాయింట్ ఇచ్చారు. కాగా, తన తొలి మ్యాచ్‌లో భాగంగా న్యూజిలాండ్‌తో ఆస్ట్రేలియా కష్టాల్లో ఉండగా వర్షం పడటంతో మ్యాచ్‌ రద్దయి ఆ జట్టుకు ఒక పాయింట్‌ వచ్చిన సంగతి తెలిసిందే.