వార్నర్ లైవ్ సెషన్:
డేవిడ్ వార్నర్ తాజాగా లైవ్ సెషన్ నిర్వహించగా.. టీమిండియా పేసర్ భువనేశ్వర్ కుమార్ గెస్ట్గా ఎంట్రీ ఇచ్చాడు. ఈ ఇద్దరికి అభిమానుల నుంచి ప్రశ్నలు ఎదురయ్యాయి. ఈ క్రమంలో టీ20 ప్రపంచకప్లో భారత్, ఆస్ట్రేలియా మధ్య ఫైనల్ మ్యాచ్ని ఊహిస్తూ.. ఓ అభిమాని అడిగిన ప్రశ్నని భువీకి వార్నర్ సంధించాడు. అయితే దీనికి భువనేశ్వర్ ఫన్నీగా సమాధానమిచ్చి నవ్వు తెప్పించాడు. భువీ సమాధానంతో లైవ్ సెషన్ మొత్తం కామెడీగా మారిపోయింది. ఇంతకీ భువీని వార్నర్ ఏం అడిగాడంటే..?.
ఫస్ట్ ఓవర్లోనే ఔట్ చేస్తా:
'టీ20 ప్రపంచకప్ ఫైనల్లో ఆస్ట్రేలియా విజయానికి చివరి బంతికి 4 పరుగులు చేయాల్సి ఉంది. నేను క్రీజులో ఉంటే నువ్వు ఏ బంతిని
సంధిస్తావ్?' అని భువనేశ్వర్ కుమార్ను డేవిడ్ వార్నర్ ప్రశ్నించాడు. వార్నర్ అడిగిన ప్రశ్నకి భువనేశ్వర్ సమాధానమిస్తూ ... 'వార్నర్ చివరి ఓవర్లో నేను నీకు బౌలింగ్ చేయను. ఎందుకంటే.. ఆ మ్యాచ్ ఫస్ట్ ఓవర్లోనే నిన్ను ఔట్ చేస్తా?' అని పంచ్ వేశాడు. ఈ ఆన్సర్తో వార్నర్కి ఏం చెప్పాలో అర్థం కాలేదు.
నకుల్ బాల్ సంధిస్తావనుకుంటా:
ఆపై వార్నర్ మళ్లీ అదే ప్రశ్న అడిగి ఓ హింట్ కూడా ఇచ్చాడు. నా అంచనా ప్రకారం మెల్బోర్న్ క్రికెట్ గ్రౌండ్లో బౌండరీ లైన్స్ దూరంగా ఉంటాయి కాబట్టి నకుల్ బాల్ సంధిస్తావనుకుంటున్నా అని అన్నాడు. 'కెప్టెన్, సహచర బౌలర్ల అభిప్రాయాలు తీసుకుని ఆ తర్వాత ఫైనల్ బంతిపై తుది నిర్ణయం తీసుకుంటా' అని భువీ చెప్పుకొచ్చాడు. డేవిడ్ వార్నర్, భువనేశ్వర్ కుమార్ ఇద్దరూ ఐపీఎల్లో సన్ రైజర్స్ హైదరాబాద్ తరపున ఆడుతున్న విషయం తెలిసిందే.
సన్రైజర్స్ కెప్టెన్ వార్నర్:
కరోనా భయంతో ఐపీఎల్ 2020 జరుగుతుందా లేదా అనే సందిగ్ధం ఏర్పడింది. తాజా పరిస్థితుల నడుమ రద్దైయ్యే అవకాశాలే ఎక్కువగా ఉన్నాయి. అయితే టీ20 ప్రపంచకప్ రద్దయితే.. ఆ స్థానంలో ఐపీఎల్ నిర్వహించాలని బీసీసీఐ చూస్తోంది. డేవిడ్ వార్నర్ సన్రైజర్స్ హైదరాబాద్ తరఫున ఆడుతున్న విషయం తెలిసిందే. అంతేకాదు అతడు కెప్టెన్ కూడా. ఐపీఎల్ జరిగితే వార్నర్ ఆడుతాడని అతని మేనేజర్ జేమ్స్ స్పష్టం చేసిన విషయం తెలిసిందే.