అతడే నాకు స్ఫూర్తి: కోహ్లీ మనసులో మాట ఇదే

లోపాలను సరిచూసుకోవడం వల్లే

'బలం బలహీనతలను చాలా బాగా అర్థం చేసుకున్నా కాబట్టే బాగా ఆడగలుగుతున్నా. ఈ రెండింటి మధ్య సమతుల్యం తీసుకురావడం చాలా ముఖ్యం. లోపాలను సరిచూసుకోవడంతో పాటు నా బలమేమిటో కూడా అర్థం చేసుకున్నాను. అయితే నాలో ఎలాంటి లోపాలు లేవని అభిమానులు భావిస్తారు. కానీ అది సరికాదు. ప్రతి ఒక్కరికీ సమస్యలు ఉంటాయి. అయితే వాటిని గుర్తించగలిగితేనే నిలకడ సాధ్యమవుతుంది. అందుకే టెస్టుల్లో నేను భారీగా పరుగులు సాధించాను' అని అన్నాడు.

క్రిస్టియానో రొనాల్డోను ప్రేరణగా తీసుకున్నా

ఈ విషయంలో తాను స్టార్‌ పుట్ బాలర్ క్రిస్టియానో రొనాల్డోను ప్రేరణగా తీసుకున్నానని చెప్పాడు. ‘కొన్నేళ్లుగా రొనాల్డో అగ్ర ఆటగాడిగా కొనసాగుతున్నాడు. అది కఠిన శ్రమ వల్లే సాధ్యమైంది. ఫుట్‌బాలర్లందరిలోకెల్లా ఎక్కువ కష్టపడే ఆటగాడు రొనాల్డోనేనని విన్నాను. ఆటలో మెస్సి మేధావి. కానీ తన అంకిత భావంతో రొనాల్డో అతడికి దీటుగా నిలుస్తున్నాడు. అతడే నాకు స్ఫూర్తి' అని కోహ్లి అన్నాడు.

ఒత్తిడి నుంచి దూరంగా పారిపోవడం ఎవరికీ సాధ్యం కాదు

ఇక ఒత్తిడి నుంచి దూరంగా పారిపోవడం ఎవరికీ సాధ్యం కాదని అన్నాడు. ఒత్తిడి అనేది పరిస్థితిని బట్టి ఉంటుందని కోహ్లీ తెలిపాడు. బ్యాటింగ్ చేస్తున్నప్పుడు స్లిప్‌లో నలుగురు ఫీల్డర్లు ఉంటారు. దాన్ని ఒత్తిడిగా భావిస్తే బౌండరీ కొట్టలేమని, కొన్నిసార్లు అదనపు ఒత్తిడి కూడా మనపై ఉంటుందని అన్నాడు.

కఠిన పరిస్థితులు ఎదురైనప్పుడు ఎదురొడ్డి నిలవడం ఇష్టం

కాబట్టి దీని నుంచి పారిపోకుండా ఒత్తిడిని తాను ఆస్వాదించడం మొదలుపెట్టానని చెప్పాడు. ముఖ్యంగా మైదానంలో కఠిన పరిస్థితులు ఎదురైనప్పుడు ఎదురొడ్డి నిలవడం తనకు ఎంతో ఇష్టమని చెప్పిన కోహ్లీ అలాంటి పరిస్థితికి తలొగ్గితే అపజయం మనల్ని వెంటాడుతుందని అన్నాడు.