కొత్త మైదానంలో రాజస్థాన్‌తో మ్యాచ్: చెన్నైకి కలిసొచ్చేనా?

టోర్నీ ఆరంభం నుంచి సమష్టిగా రాణిస్తోన్న చెన్నై

టోర్నీ ఆరంభం నుంచి చెన్నై సమష్టిగా రాణిస్తుంది. అయితే ఆ జ్టటుని గాయాల బెడద తీవ్రంగా వేధిస్తోంది. తొలి మ్యాచ్‌లో కేదార్‌ జాదవ్‌ గాయం కారణంగా టోర్నీ మొత్తానికి దూరం కాగా, రెండో మ్యాచ్‌లో సురేశ్ రైనా గాయపడ్డాడు. దీంతో రైనాకు పది రోజుల విశ్రాంతి అవసరమని ఆ జట్టు యాజమాన్యం ప్రకటించింది.

వెన్నునొప్పితో బాధపడుతోన్న ధోని

ఇక పంజాబ్‌తో జరిగిన మ్యాచ్‌లో ధోని వెన్నునొప్పితో బాధపడ్డాడు. దీంతో రాజస్థాన్‌తో జరిగే మ్యాచ్‌లో వీరిద్దరూ తుది జట్టులో ఉంటారా లేదా అన్నది అనుమానంగా మారింది. అయితే శుక్రవారం నిర్వహించిన ప్రాక్టీస్ సెషన్‌లో వీరిద్దరూ పాల్గొన్నారు. వీరితో పాటు డుప్లెసిస్ కూడా రాజస్థాన్‌ మ్యాచ్‌కు అందుబాటులో ఉంటే చెన్నై బ్యాటింగ్ పటిష్టంగా ఉన్నట్లే.

చెన్నై బౌలింగ్ లైనప్ గురించి చెప్పాల్సిన పనిలేదు

వీరికి తోడు షేన్ వాట్సన్‌, డ్వే బ్రావో, అంబటి రాయుడు అద్భుతమైన ఫామ్‌లో ఉన్నారు. ఇక చెన్నై బౌలింగ్ లైనప్ గురించి చెప్పాల్సిన పనిలేదు. స్పిన్నర్‌ ఇమ్రాన్‌ తాహీర్‌ పుణె పిచ్‌పై అద్భుతమైన రికార్డుని కలిగి ఉన్నాడు. అతనికి తోడు వాట్సన్, శార్దూల్ ఠాకూర్‌ రెచ్చిపోతే రాజస్థాన్‌కు కష్టాలు తప్పవు. అనుభవం కలిగిన హర్భజన్, జడేజా సత్తా చాటితే చెన్నై విజయం నల్లేరు మీద నడకే.

రాజస్థాన్ రాయల్స్ కెప్టెన్ రహానే నేతృత్వంలోని రాజస్థాన్ లీగ్

ఆరంభంలో నిరాశపర్చినా.. రెండు వరుస విజయాలతో జోరుని పెంచింది. కానీ చివరి మ్యాచ్‌లో కోల్‌కతా చేతిలో ఓడటంతో ఆత్మవిశ్వాసం దెబ్బతింది. మిడిల్‌ ఆర్డర్‌లో సంజూ శాంసన్‌ మినహా మిగతా బ్యాట్స్‌మెన్‌ గొప్పగా రాణించలేకపోతున్నారు.

బెన్‌ స్టోక్స్‌ నుంచి ఇప్పటివరకూ లేని మెరుపు ఇన్నింగ్స్‌

జనవరిలో జరిగిన ఐపీఎల్ వేలంలో రూ. 12.5 కోట్లకు కొనుగోలు చేసిన బెన్‌ స్టోక్స్‌ నుంచి ఇప్పటివరకూ మెరుపు ఇన్నింగ్స్‌ రాలేదు. బట్లర్‌ ఆడుతున్నా కీలక సమయంలో ఔట్‌ అవుతుండటం ప్రతికూలంగా మారింది. ఇక, కెప్టెన్ రహానే విలువైన పరుగులు జోడిస్తున్నా.. భారీ ఇన్నింగ్స్ ఆడలేకపోతున్నాడు.

స్థాయికి తగ్గ ప్రదర్శన చేయలేకపోతున్న ఉనాద్కత్‌

మరోవైపు బౌలింగ్‌లో ఉనాద్కత్‌ కూడా స్థాయికి తగ్గ ప్రదర్శన చేయలేకపోతున్నాడు. ధావళ్‌ కులకర్ణి మాత్రమే ఉన్నంతలో మెరుగ్గా రాణిస్తున్నాడు. పేరున్న స్పిన్నర్లు లేకపోవడం కూడా రాజస్థాన్‌కు లోటే. అయితే యువ స్పిన్నర్‌ కృష్ణప్ప గౌతమ్‌ కోల్‌కతాతో మ్యాచ్‌లో ఆకట్టుకున్నాడు. అయితే చెన్నైతో జరిగే మ్యాచ్‌లో పేసర్లు రాణిస్తే రాజస్థాన్‌కు తిరుగుండదు.