అంతర్జాతీయ క్రికెట్‌కు రిటైర్మెంట్ ప్రకటించిన మరో స్టార్ క్రికెటర్

Heinrich Klassen: ఆస్ట్రేలియా స్టార్ బ్యాటర్ గ్లెన్ మ్యాక్స్‌వెల్ ఇటీవల వన్డే క్రికెట్ నుంచి రిటైర్మెంట్ ప్రకటించాలని నిర్ణయించుకున్నాడు. మ్యాక్స్‌వెల్ తర్వాత ఇప్పుడు మరో లెజెండరీ ఆటగాడు అంతర్జాతీయ క్రికెట్ నుంచి రిటైర్మెంట్ ప్రకటించాడు. దక్షిణాఫ్రికా స్టార్ వికెట్ కీపర్, బ్యాటర్ హెన్రిచ్ క్లాసెన్ జూన్ 2న అంతర్జాతీయ క్రికెట్ నుంచి రిటైర్ కావడం ద్వారా క్రికెట్ ప్రపంచాన్ని ఆశ్చర్యపరిచాడు. 33 ఏళ్ల స్టార్ క్రికెటర్ హెన్రిచ్ క్లాసెన్ అంతర్జాతీయ క్రికెట్‌కు వీడ్కోలు పలుకుతున్నట్లు ఇన్‌స్టాగ్రామ్ వేదికగా ప్రకటించాడు. ఇకపై కుటుంబం, భవిష్యత్తుపై దృష్టి పెడతానని క్లాసెన్ చెప్పుకొచ్చాడు.

దక్షిణాఫ్రికాకు ప్రాతినిధ్యం వహించడం తనకు లభించిన అతిపెద్ద గౌరవమని హెన్రిచ్ క్లాసెన్ పేర్కొన్నాడు. అది తన చిన్ననాటి కల అంటూ క్లాసెన్ చెప్పుకొచ్చాడు. ఇన్నాళ్లు తనకు మద్దతుగా నిలిచిన సహచరులతో పాటు ప్రతి ఒక్కరికీ కృతజ్ఞతలు తెలిపాడు. హెన్రిచ్ క్లాసెన్ ఇలా అన్నాడు. "ఇది నాకు చాలా విచారకరమైన రోజు ఎందుకంటే అంతర్జాతీయ క్రికెట్‌కు దూరంగా ఉండాలని నిర్ణయించుకున్నాను. భవిష్యత్‌లో నాకు, నా కుటుంబానికి ఏది ఉత్తమమో నిర్ణయించుకోవడానికి నాకు చాలా సమయం పట్టింది. ఇది నిజంగా చాలా కష్టమైన నిర్ణయం, కానీ నేను పూర్తిగా ప్రశాంతంగా ఉన్నాను." అని క్లాసెన్ పేర్కొన్నాడు.

హెన్రిచ్ క్లాసెన్ చివరగా ఇలా అన్నాడు. "నా ఛాతిపై ప్రోటీస్ బ్యాడ్జితో ఆడటం నా కెరీర్‌లో అతిపెద్ద గౌరవం. నా కుటుంబంతో ఎక్కువ సమయం గడపాలని నేను ఎదురుచూస్తున్నాను.నేను ఎల్లప్పుడూ ప్రోటీస్‌కు పెద్ద మద్దతుదారుడిని. నా కెరీర్‌లో నాకు, నా సహచరులకు మద్దతు ఇచ్చిన ప్రతి ఒక్కరికీ కృతజ్ఞతలు. దక్షిణాఫ్రికా జట్టుకు ఎల్లప్పుడూ మద్దతు ఇస్తా." అని పేర్కొన్నాడు. ఐపీఎల్ 2025లో సన్‌రైజర్స్ హైదరాబాద్ తరఫున క్లాసెన్ అత్యంత ఖరీదైన ఆటగాడు. అతను ప్రపంచవ్యాప్తంగా టీ20 లీగ్‌లలో ఆడటం కొనసాగించాలని భావిస్తున్నారు.

అద్భుతమైన కెరీర్‌ను కలిగి ఉన్న హెన్రిచ్ క్లాసెన్
హెన్రిచ్ క్లాసెన్ దక్షిణాఫ్రికా తరఫున మూడు ఫార్మాట్లలో 102 మ్యాచ్‌ల్లో ఆడాడు. క్లాసెన్ 2018లో అరంగేట్రం చేసినప్పటి నుంచి 3145 పరుగులు చేశాడు. ఇందులో క్లాసెన్ నాలుగు అంతర్జాతీయ వన్డే సెంచరీలు చేశాడు. క్లాసెన్ సౌతాఫ్రికా తరఫున 4 టెస్టులు ఆడి 104 పరుగులు మాత్రమే చేశాడు. క్లాసెన్ 60 వన్డేల్లో 2141 పరుగులు, 58 టీ20లు ఆడి 1000 పరుగులు చేశాడు. క్లాసెన్ 2023లో ఆస్ట్రేలియాపై 83 బంతుల్లో అజేయంగా 174 పరుగులు చేయడం ద్వారా వన్డే క్రికెట్‌లో అత్యధిక వన్డే స్కోరును నమోదు చేశాడు.