ENGvsPAK: ప్రపంచకప్ ఫైనల్‌కు ముందు.. పాక్‌పై ఇంగ్లండ్ రికార్డు ఎలా ఉందంటే?

టీ20 క్రికెట్‌లో..

ఇంగ్లండ్, పాకిస్తాన్ రెండు జట్లు కూడా పొట్టి ఫార్మాట్‌లో బలంగానే ఉన్నాయి. అయితే ఈ రెండు జట్లు తలపడినప్పుడు మాత్రం ఎక్కువ సార్లు ఇంగ్లండ్‌ పైచేయి సాధించింది. ఇప్పటి వరకు ఈ రెండు జట్లు 28 అంతర్జాతీయ టీ20 మ్యాచులు ఆడాయి. వీటిలో 18 మ్యాచుల్లో ఇంగ్లండ్ విజయం సాధించగా.. పాకిస్తాన్ కేవలం 8 మ్యాచుల్లోనే గెలిచింది. ఒక మ్యాచ్ ఎలాంటి ఫలితం లేకుండానే ముగిసింది. ఈ రెండు జట్లు చివరగా తలపడిన మ్యాచ్‌లో పాక్ బౌలింగ్‌ను తుత్తునియలు చేసిన ఇంగ్లండ్.. 209 పరుగుల భారీ స్కోరు చేసింది. ఛేజింగ్‌లో బాబర్ సేన చతికిల పడటంతో ఆ మ్యాచ్‌ను ఇంగ్లండ్ జట్టు 67 పరుగుల తేడాతో గెలుచుకుంది.

టీ20 ప్రపంచకప్‌లో..

కేవలం ఈ ఫార్మాట్‌లోనే కాదు.. టీ20 ప్రపంచకప్‌లో కూడా పాకిస్తాన్‌పై ఇంగ్లండ్‌దే పైచేయి. ఈ రెండు జట్లు 2009లో ఒకసారి, 2010లో ఒకసారి టీ20 ప్రపంచకప్ టోర్నీల్లో ఈ రెండు జట్లు తలపడ్డాయి. ఈ రెండు సార్లూ విజయం ఇంగ్లండ్‌నే వరించింది. మరి ముచ్చటగా మూడోసారి కూడా ఇంగ్లండ్ గెలిస్తే ఈసారి విజయంతో పాటు ట్రోఫీ కూడా ఆ జట్టుకే దక్కుతుంది.

ఇంగ్లండ్‌లో..

చివరగా స్వదేశంలో పాకిస్తాన్‌తో ఆడిన ఐదు టీ20 మ్యాచుల్లో కూడా ఇంగ్లండ్‌కే మెరుగైన రికార్డు ఉంది. ఈ ఐదు మ్యాచుల్లో ఇంగ్లండ్ జట్టు మూడింట విజయం సాధించింది. వీటిలో మూడు మ్యాచులు గతేడాదే జరిగాయి. వీటిలో తొలి మ్యాచ్‌లో పాకిస్తాన్ జట్టు 31 పరుగుల తేడాత విజయం సాధించగా.. ఆ తర్వాత వరుసగా రెండు మ్యాచుల్లోనూ ఇంగ్లండ్ గెలిచింది.

పాకిస్తాన్‌లో..

పాక్ గడ్డపై కూడా ఈ రెండు జట్లు తలపడినప్పుడు ఇంగ్లండ్ జట్టే పైచేయి సాధించింది. ఈ టీ20 ప్రపంచకప్ ప్రారంభానికి ముందు పాకిస్తాన్ పర్యటనకు ఇంగ్లండ్ వెళ్లిన సంగతి తెలిసిందే. ఈ సిరీస్‌ను ఇంగ్లండే గెలుచుకుంది. చివరగా పాక్ గడ్డపై ఇంగ్లండ్‌తో జరిగిన ఐదు టీ20 మ్యాచుల్లో పాకిస్తాన్ రెండింట మాత్రమే గెలిచింది.