చాలా కాలంగా ఇదే తప్పు చేస్తున్నాం: హర్మన్ ప్రీత్ కౌర్

మహిళల టీ20 ప్రపంచ కప్‌లో భాగంగా ఆస్ట్రేలియాతో జరిగిన కీలక లీగ్ మ్యాచ్‌లో ఓడిపోయి టీ20 ప్రపంచకప్ టోర్నమెంట్ నుంచి నిష్క్రమించిన అనంతరం భారత మహిళల క్రికెట్ జట్టు కెప్టెన్ హర్మన్‌ప్రీత్ కౌర్ తీవ్ర ఆవేదన వ్యక్తం చేశారు. మ్యాచ్ ముగిసిన అనంతరం హర్మన్ ప్రీత్ మాట్లాడుతూ.. జట్టు ప్రదర్శనను, మైదానంలో జరిగిన లోపాలను ముక్కుసూటిగా విశ్లేషించారు.

బోర్డుపై మంచి స్కోరే ఉంచాం.. కానీ!
"రోజు ముగిసే సమయానికి మేము స్కోరు బోర్డుపై ఒక మంచి లక్ష్యాన్నే ఉంచగలిగాం. నేను బ్యాటింగ్ చేస్తున్న సమయంలో ఒక దశలో కొన్ని పరుగులు తక్కువగా చేశామేమో అనిపించింది. కానీ ఆఖరి ఓవర్లలో మా బ్యాటర్లు బాగా రాణించి స్కోరును పెంచారు. ఆస్ట్రేలియా బ్యాటర్లు పరుగులు చేయడానికి గట్టిగానే ప్రయత్నించినప్పటికీ.. మా బౌలర్లు వారిని కొంతవరకు అడ్డుకోగలిగారు. ఇదొక మంచి మ్యాచ్ అయినప్పటికీ, దురదృష్టవశాత్తూ మేము విజయ తీరాలకు చేరలేకపోయాం" అని హర్మన్‌ప్రీత్ పేర్కొన్నారు.

బలమైన జట్లపై అత్యుత్తమ ఆట అవసరం
ఈ టోర్నమెంట్‌లో జట్టు ప్రదర్శనను విశ్లేషిస్తూ.. పెద్ద జట్లతో ఆడేటప్పుడు భారత్ మరింత మెరుగవ్వాలని హర్మన్‌ప్రీత్ అభిప్రాయపడ్డారు. "ఈ మొత్తం టోర్నీ గురించి నేను ఆలోచిస్తే, బలమైన జట్లతో ఆడినప్పుడు మేము ఆశించిన స్థాయిలో రాణించలేకపోయాం. ప్రపంచంలోనే అత్యుత్తమ జట్లతో తలపడేటప్పుడు ఎప్పుడైనా సరే మన బెస్ట్ పర్ఫార్మెన్స్ ఇవ్వాలి. ఆస్ట్రేలియా ప్రపంచంలోనే అత్యంత బలమైన జట్లలో ఒకటి. వారు తమ ప్రణాళికలకు అనుగుణంగానే చక్కగా బౌలింగ్ చేశారు. మేము వికెట్లు పెద్దగా కోల్పోనప్పటికీ.. ఆశించిన స్థాయిలో వేగంగా పరుగులు రాబట్టలేకపోయాం. ఈ విషయంలో మేము కూర్చొని మళ్లీ ఆలోచించుకోవాల్సిన అవసరం ఉంది" అని ఆమె అన్నారు.

ఆ క్యాచ్‌లే దెబ్బతీశాయి.. వ్యూహాలు మార్చుకోవాలి
మైదానంలో జరిగిన పొరపాట్లు, జట్టుగా మార్చుకోవాల్సిన వ్యూహాల గురించి కెప్టెన్ నిర్మొహమాటంగా మాట్లాడారు. "మేము చేజార్చిన కొన్ని క్యాచ్‌లు మా విజయ అవకాశాలను దెబ్బతీశాయి, అయినప్పటికీ ఈరోజు మ్యాచ్‌లో మేము చివరివరకు గట్టి పోటీలోనే ఉన్నాం. కానీ, నిజం చెప్పాలంటే మేము మా సొంత ప్రమాణాలకు తగ్గట్టుగా ఆడలేదు. ఒక జట్టుగా మేము చాలా విషయాల గురించి మళ్లీ ఆలోచించాల్సి ఉంది. ముఖ్యంగా పెద్ద జట్లతో తలపడేటప్పుడు ఎలాంటి వ్యూహాలతో వెళ్లాలో సమీక్షించుకోవాలి. ఎందుకంటే చాలాసార్లు మేము మ్యాచ్‌పై పట్టు సాధించినట్లే కనిపించి.. చివరి ఓవర్లలో ప్రత్యర్థి జట్టుకు భారీగా పరుగులు సమర్పించుకుంటున్నాం. ఒకవేళ మేము చేజ్ చేస్తుంటే, బ్యాటింగ్‌లో ఆ లక్ష్యాన్ని అందుకోలేకపోతున్నాం. ఇది ఏదో ఈరోజే కాదు, చాలా కాలంగా జరుగుతోంది. ఈ బలహీనతను కచ్చితంగా మార్చుకోవాలి" అని హర్మన్‌ప్రీత్ కౌర్ స్పష్టం చేశారు.