3rd ODI: గాల్లోకి లేచి మరీ హార్ధిక్ పాండ్యా సూపర్ క్యాచ్ (వీడియో)

ఇన్నింగ్స్ 17వ ఓవర్‌లో

ఇన్నింగ్స్ 17వ ఓవర్ వేసిన మణికట్టు స్పిన్నర్ చాహల్ బౌలింగ్‌లో న్యూజిలాండ్ కెప్టెన్ కేన్ విలియమ్సన్ (28) క్రీజు వెలుపలికి వచ్చి బంతిని మిడ్ వికెట్‌ దిశగా బాదేందుకు ప్రయత్నించాడు. తన‌ ఎడమవైపు వేగంగా వెళ్తున్న బంతిపైకి కళ్లుచెదిరే రీతిలో డైవ్ చేసిన హార్దిక్ పాండ్యా గాల్లోనే బంతిని చక్కగా ఒడిసిపట్టుకున్నాడు.

క్రీజు వెలుపలికి వచ్చి మరీ

హార్దిక్‌ పాండ్యా నుంచి బంతిని తప్పించేందుకే క్రీజు వెలుపలికి వచ్చి మరీ షాట్ ఆడిన విలియమ్సన్.. ఊహించని రీతిలో అతని చేతికే చిక్కడంతో నిరాశగా పెవిలియన్‌వైపు నడిచాడు. ప్రస్తుతం 28 ఓవర్లకు గాను న్యూజిలాండ్ 3 వికెట్లు కోల్పోయి 118 పరుగులు చేసింది. క్రీజులో రాస్ టేలర్(38), టామ్ లాథమ్(28) పరుగులతో ఉన్నారు.

రెండు మార్పులతో బరిలోకి

భారత్ తుది జట్టులో రెండు మార్పులు చోటు చేసుకున్నాయి. తొడ కండాలు పట్టేయడంతో ధోనికి విశ్రాంతినిచ్చిన కెప్టెన్ కోహ్లీ అతని స్థానంలో వికెట్ కీపర్‌గా దినేశ్ కార్తీక్‌ని తీసుకున్నాడు. ఇక గత రెండు వన్డేలోనూ చెప్పుకోదగ్గ ప్రదర్శన చేయలేకపోయిన ఆల్‌రౌండర్ విజయ్ శంకర్‌ స్థానంలో హార్దిక్ పాండ్యాకి అవకాశమిచ్చాడు.

2-0 ఆధిక్యంలో టీమిండియా

నేపియర్ వేదికగా జరిగిన తొలి వన్డేలో కివీస్‌ని 157 పరుగులకే కుప్పకూల్చి 8 వికెట్ల తేడాతో అలవోక విజయాన్ని అందుకున్న టీమిండియా.. మౌంట్‌ మాంగనుయ్‌‌లో జరిగిన రెండో వన్డేలోనూ 234కే ఆలౌట్ చేసి 90 పరుగుల తేడాతో గెలుపొందింది. దీంతో.. ఐదు వన్డేల సిరీస్‌లో 2-0తో ఆధిక్యంలో కొనసాగుతుంది.