‘కాఫీ విత్‌ కరణ్‌ షో’ వ్యాఖ్యలు: పాండ్యా, రాహుల్‌పై కేసు నమోదు

అసలేం జరిగింది?

బాలీవుడ్ ప్రముఖ నిర్మాత్ కరణ్ జోహార్‌ వ్యాఖ్యాతగా వ్యవహరిస్తున్న 'కాఫీ విత్ కరణ్' షోకి ఇటీవల హార్దిక్ పాండ్యా, కేఎల్ రాహుల్ వెళ్లారు. ఈ టాక్ షోలో కేఎల్ రాహుల్ ఆచితూచి బదులిచ్చినప్పటికీ పాండ్య మాత్రం నోటికి ఏదొస్తే అది మాట్లాడాడు. ముఖ్యంగా కరణ్ జోహార్ హార్ధిక్ పాండ్యా లవ్‌స్టోరీ గురించి అడగ్గా "నేను ఈ మధ్యకాలంలో మూడు విషయాలను తెలుసుకున్నా. మొదటి విషయం ఏంటంటే.. ఒక అమ్మాయిని చూడటం. రెండోది డేటింగ్‌. మూడోది రిలేషన్‌షిప్‌" అని సమాధానమిచ్చాడు.

కండోమ్‌ ప్యాకెట్ గురించి వివరించి కేఎల్ రాహుల్

మరోవైపు కేఎల్ రాహుల్ కూడా తన జేబులో కండోమ్‌ ప్యాకెట్ గురించి వివరిస్తూ వివాదాస్పదంగా చెప్పుకొచ్చాడు. ఈ షో ఇటీవల ప్రసారంకాగా పెద్ద ఎత్తున విమర్శలు చెలరేగాయి. దీంతో పాండ్యా ట్విట్టర్‌లో క్షమాపణ కూడా చెప్పాడు. భారత క్రికెట్ జట్టుకు ఆడుతూ హుందాగా వ్యవహరించాల్సిన ఇద్దరు క్రికెటర్లు ఇలా మాట్లాడటంపై సోషల్ మీడియాలో అభిమానులు మండిపడ్డారు. దీంతో వీరిద్దరిపై నిషేధం విధిస్తూ బీసీసీఐ చర్యలు తీసుకున్న విషయం తెలిసిందే.

నిషేధం ఎత్తివేత

అంతేకాదు వీరిద్దరిని ఆస్ట్రేలియా పర్యటన నుంచి అకస్మాత్తుగా స్వదేశానికి పిలిపించింది. తొలుత బీసీసీఐ పాలకుల కమిటీ (సీఓఏ) చీఫ్‌ వినోద్‌ రాయ్‌ రెండు మ్యాచ్‌ల నిషేధంతో సరిపెట్టాలని భావించినప్పటికీ, మరో సభ్యురాలు డయానా ఎడుల్జీ న్యాయ సలహాకు పట్టుబట్టడంతో వీరిద్దరిని సస్పెండ్ చేయడం జరిగింది. ఆ తర్వాత కొన్ని రోజులకు కోర్టు సహాయకుడిగా మాజీ అదనపు సొలిసిటర్ జనరల్ పీఎస్ నర్సింహ బాధ్యతలు చేపట్టడంతో అతనితో చర్చించి వీర్దదరిపై ఉన్న సస్పెన్షన్‌‌ని సీఓఏ ఎత్తివేసింది.

న్యూజిలాండ్ పర్యటనలో పాండ్యా

నిషేధం ఎత్తివేత అనంతరం హార్ధిక్ పాండ్యా న్యూజిలాండ్‌ పర్యటనలో పాల్గొనడంతో పాటు ఐదో వన్డేలో టీమిండియా విజయంలో కీలకపాత్ర పోషించాడు. ఈ మ్యాచ్‌లో అటు బ్యాటింగ్ లోనూ, ఇటు బౌలింగ్ లోనూ అద్భుత ప్రదర్శన చేశాడు. మరోవైపు రాహుల్‌ భారత్‌-ఏ జట్టు తరపున ఇంగ్లండ్‌ బ్లూ జట్టుతో ఆడుతున్నాడు. ఈ నేపథ్యంలో ముగిసిపోయిందనుకున్న ఈ వివాదంపై మళ్లీ కేసు నమోదు కావడం చర్చనీయాంశమైంది.