వద్దన్నా రికార్డులే.. ముంబైని ముంచుతున్న హార్దిక్ పాండ్యా!

ఐపీఎల్ 2026 సీజన్‌లో సన్‌రైజర్స్ హైదరాబాద్ జట్టుతో జరిగిన మ్యాచ్‌లో ముంబై ఇండియన్స్ ఘోర పరాజయాన్ని చవిచూసింది. ముంబై ఇండియన్స్ నిర్దేశించిన 244 పరుగుల భారీ లక్ష్యాన్ని సన్‌రైజర్స్ జట్టు మరో 8 బంతులు మిగిలి ఉండగానే ఛేదించింది. అయితే ఈ పరాజయంతో ముంబై ఇండియన్స్ కెప్టెన్ హార్దిక్ పాండ్యా పేరిట ఓ చెత్త రికార్డు నమోదైంది. గత 18 ఏళ్ల ఐపీఎల్ చరిత్రలో ముంబైని నడిపించిన 8 మంది కెప్టెన్లకు ఎదురుకాని పరిస్థితిని హార్దిక్ పాండ్యా కేవలం 9 మ్యాచ్‌ల్లోనే రెండు సార్లు ఎదుర్కోవాల్సి వచ్చింది.

200 పరుగుల రక్షణలో ముంబై వైఫల్యం
ముంబై ఇండియన్స్‌కు ఇప్పటివరకు లక్ష్యాన్ని డిఫెండ్ చేయడంలో తిరుగులేని రికార్డు ఉంది. గతంలో సచిన్ టెండూల్కర్, హర్భజన్ సింగ్, షాన్ పోలాక్, రికీ పాంటింగ్, రోహిత్ శర్మ వంటి ఉద్దండులు ముంబైకి నాయకత్వం వహించారు. రోహిత్ శర్మ హయాంలో ముంబై కేవలం 129 పరుగులు చేసి కూడా ఫైనల్ గెలిచిన సందర్భాలు ఉన్నాయి. కానీ హార్దిక్ పాండ్యా కెప్టెన్సీలో గత 9 మ్యాచ్‌లను పరిశీలిస్తే.. ప్రత్యర్థి జట్లు ముంబైపై రెండుసార్లు 200 పైచిలుకు పరుగుల లక్ష్యాన్ని విజయవంతంగా ఛేదించాయి. ఐపీఎల్ 2025 క్వాలిఫైయర్-2లో పంజాబ్ కింగ్స్ మొదటిసారి ముంబైపై 200+ స్కోరును ఛేదించగా.. ఇప్పుడు సన్‌రైజర్స్ 244 పరుగుల భారీ లక్ష్యాన్ని ఛేదించి ముంబై బౌలింగ్ బలహీనతను బయటపెట్టింది.

అప్పట్లో 196 పరుగులే గరిష్టం.. ఇప్పుడేమో?
హార్దిక్ కెప్టెన్సీ కంటే ముందు ముంబై ఇండియన్స్‌పై నమోదైన అత్యధిక రన్ ఛేజ్ 196 పరుగులు మాత్రమే. 2020లో రాజస్థాన్ రాయల్స్ జట్టు బెన్ స్టోక్స్ సెంచరీ సాయంతో ఈ విజయాన్ని అందుకుంది. కానీ హార్దిక్ సారథ్యంలో ముంబై బౌలింగ్ విభాగం భారీ స్కోర్లను కాపాడుకోవడంలో పూర్తిగా విఫలమవుతోంది. 2024 సీజన్‌లో పాయింట్ల పట్టికలో అట్టడుగున నిలిచిన ముంబై, 2025లో ప్లేఆఫ్స్ చేరినప్పటికీ, 2026లో మళ్లీ పాత దారిలోనే నడుస్తోంది. ప్రస్తుత సీజన్‌లో 9 మ్యాచ్‌లు ఆడిన ముంబై కేవలం 2 విజయాలతో 9వ స్థానంలో కొట్టుమిట్టాడుతోంది.

కెప్టెన్సీ మార్పుపై మళ్లీ చర్చ
గుజరాత్ టైటాన్స్‌ను విజేతగా నిలిపిన హార్దిక్ పాండ్యాను.. ఐదుసార్లు ఛాంపియన్ రోహిత్ శర్మను తప్పించి మరీ ముంబై యాజమాన్యం కెప్టెన్‌గా నియమించింది. అయితే ముంబై లెగసీని కాపాడటంలో హార్దిక్ పాండ్యా విఫలమవుతున్నాడని గణాంకాలు చెబుతున్నాయి. లక్ష్యాలను డిఫెండ్ చేయడంలో ముంబైకి ఉన్న పట్టు సడలిపోవడం, వరుస పరాజయాలతో ప్లేఆఫ్స్ అవకాశాలు సంక్లిష్టంగా మారడంతో అభిమానులు హార్దిక్ కెప్టెన్సీపై తీవ్ర అసంతృప్తి వ్యక్తం చేస్తున్నారు.