'మారేది క్యాలెండర్‌ మాత్రమే.. మీ ఉద్యోగం, లక్ష్యాలు ఏమీ మారవు'

మారేది క్యాలెండర్‌ మాత్రమే:

టీమిండియా వెటరన్ స్పిన్నర్ హర్భజన్‌ సింగ్‌ అభిమానులకు నూతన సంవ‌త్స‌ర శుభాకాంక్ష‌లు తెలిపాడు. 'అందరికి నూతన సంవ‌త్స‌ర శుభాకాంక్ష‌లు. కొత్త ఏడాదిలో అంతా మారిపోతుందని ఉత్సాహపడకండి. మారేది కేవలం క్యాలెండర్‌ మాత్రమే. మీ భాగస్వామి, ఉద్యోగం, లక్ష్యాలు ఏమీ మారవు. ఇది గుర్తుచేస్తున్నా' అంటూ హర్భజన్‌ ట్వీట్ చేశారు.

అంతా మంచే జరగాలి:

'ప్రజలందరికి నూతన సంవత్సర శుభాకాంక్షలు. మీకు దేవుడి ఆశీస్సులు ఉండాలని కోరుకుంటున్నా. అంతా మంచే జరగాలని ప్రార్ధించా' అని టీమిండియా కెప్టెన్ విరాట్‌ కోహ్లీ ట్వీట్ చేసాడు. '2019 ప్రతిఒక్కరికి సంతృప్తికరంగా గడిచిందని ఆశిస్తున్నా. 2020 మరింత బాగా ఉండాలని కోరుకుంటున్నా. మీ అందరికీ నూతన సంవత్సర శుభాకాంక్షలు' అని అనుష్క శర్మ పేర్కొంది.

దయ, ప్రేమను పంచడానికి శ్రమించాలి:

'గత దశాబ్దానికి, 2019కి వీడ్కోలు. నూతన సంవ‌త్స‌రంకు ఘన స్వాగతం. ఈ నూతన దశాబ్దంలో ప్రపంచానికి దయ, ప్రేమను పంచడానికి మనం శ్రమించాలి. అందరికీ నూతన సంవత్సర శుభాకాంక్షలు' అని సురేశ్‌ రైనా ట్వీట్ చేసాడు. 'ప్రతిఒక్కరికి ఆ భగవంతుడు శాంతి, ఆనందాన్ని అందిస్తాడని ఆశిస్తున్నా. కొత్త జీవితం, ఉజ్వల భవిష్యత్తుకు స్వాగతం. నూతన సంవత్సర శుభాకాంక్షలు' అని మాజీ ఆటగాడు వీవీఎస్‌ లక్ష్మణ్‌ ట్వీటాడు.

దృఢంగా ఉండండి:

'విజయం దిశగా అడుగులు వేసేటప్పుడు ఎంతో దృఢంగా ఉండండి. లక్ష్యం సాధించే క్రమంలో ఎన్నో కష్టాలు ఉంటాయి. అయితే గెలిచిన తర్వాత వచ్చే ఆనందం కంటే అవి చిన్నవే. అభిమానులకు, మిత్రులకు, కుటుంబ సభ్యులకు నూతన సంవత్సర శుభాకాంక్షలు' అని పేసర్ మహ్మద్‌ షమీ పేర్కొన్నాడు.