Harbhajan Singh: అది నా తప్పే.. అందరూ క్షమించండి: హర్భజన్​

ముంబై: ఖలిస్తాన్ తీవ్రవాది జర్నెయిల్​ సింగ్ బింద్రన్‌వాలేని అమరవీరుడిగా పేర్కొంటూ భారత వెటరన్ ఆఫ్ స్పిన్నర్ హర్భజన్ సింగ్ నివాళులు అర్పిస్తూ చేసిన పోస్టుపై సోషల్ మీడియాలో తీవ్ర దుమారం చెలరేగింది. దీంతో ఓ మెట్టు దిగొచ్చిన టర్బోనేటర్.. అభిమానులకు, దేశ ప్రజలకు క్షమాపణలు చెప్పాడు. తాను చేసింది వాట్సాప్‌లో వచ్చిన ఫార్వార్డ్ మెసేజ్ అని, చూడకుండా ఆ పోస్టు పెట్టానని వివరణ ఇచ్చాడు. అంతర్జాతీయ కెరీర్‌లో హర్భజన్ 103 టెస్టుల్లో, 236 వన్డేల్లో, 28 టీ20 మ్యాచ్‌ల్లో భారత జట్టుకు ప్రాతినిధ్యం వహించాడు.

'ఆపరేషన్​ బ్లూస్టార్​'కు 37 ఏళ్లు పూర్తైన సందర్భంగా స్వర్ణ దేవాలయంలో చంపబడ్డ సిక్కు అమరవీరులకు నివాళులర్పిస్తూ హర్భజన్ సింగ్ జూన్ 6న ఒక పోస్ట్ చేశాడు. అయితే అందులో జర్నెయిల్​ సింగ్​ బింద్రన్‌వాలే ఫొటో కూడా ఉంది. దీంతో ఒక తీవ్రవాదిని అమరవీరుడిగా ఎలా అభివర్ణిస్తావంటూ.. హర్భజన్​​ను చాలామంది సోషల్ మీడియాలో ట్రోల్ చేశారు. అభిమానులు, నెటిజన్లు అతడిపై తీవ్ర స్థాయిలో మండిపడ్డారు. విషయం తెలుకున్న టర్బోనేటర్.. పొరపాటును గుర్తించానని ట్విట్టర్​లో మరో పోస్ట్ చేశాడు.

'ఇన్​స్టాగ్రామ్​లో నేను చేసిన పోస్టుకి క్షమాపణలు చెబుతున్నా. అది వాట్సాప్​లో ఫార్వర్డ్​ అయిన మెసేజ్​. కంటెంట్​ను అర్థం చేసుకోకుండా.. సరిగ్గా చూడకుండా పోస్ట్ చేశా. కానీ అందులో ఉన్న ఉద్దేశం నేను గ్రహించలేకపోయా. ఇది ముమ్మాటికీ నా తప్పే. అంగీకరిస్తున్నా. ఆ ఫొటోలోని వ్యక్తుల సిద్ధాంతాలకు నేను కట్టుబడి లేను. ఎట్టి పరిస్థితుల్లోనూ వాటికి మద్ధతు ఇవ్వను. నేను సిక్కును, భారతీయుడను. దేశం​ కోసం పోరాడుతా. వ్యతిరేకంగా కాదు. ప్రజల మనోభావాలను దెబ్బతీసినందుకు క్షమాపణలు చెబుతున్నా. నా దేశ ప్రజలకు హాని చేసే ఏ విద్రోహ శక్తులకు నేను సహకరించలేదు. సహకరించను కూడా' అని హర్భజన్ సింగ్ సోమవారం ట్వీట్ చేశాడు.

హర్భజన్ సింగ్ బేషరతుగా క్షమాపణలు చెప్పినా.. నెటిజన్స్​ మాత్రం శాంతించడం లేదు. 'ఫార్వర్డ్​ మెసేజ్ అయితే చదవకుండా ఎలా పెడతావ్', 'టీమిండియాకు ప్రాతినిథ్యం వహించిన నువ్.. ఎంతో బాధ్యతగా ఉండాలి' అంటూ కామెంట్ల వర్షం కురిపిస్తున్నారు. 'గతంలో పాకిస్తాన్ మాజీ కెప్టెన్ షాహిద్​ అఫ్రిదీ కోసం డొనేషన్లు సేకరించిన భజ్జీ.. ఇప్పుడు మరోసారి దేశ వ్యతిరేక బుద్ధిని చాటుకున్నాడు' అంటూ ఇంకొందరు విరుచుకుపడుతున్నారు. దీంతో హర్భజన్​ సింగ్ పేరు ట్విట్టర్​లో ట్రెండ్ అవుతోంది.