గుజరాత్ జట్టుకు తృటిలో తప్పిన ప్రమాదం!

ఆర్సీబీతో ఆదివారం రాత్రి జరిగిన ఐపీఎల్ 2026 ఫైనల్ మ్యాచ్‌లో ఓడిపోయిన అనంతరం గుజరాత్ టైటాన్స్ జట్టుకు తీవ్ర దిగ్భ్రాంతికర సంఘటన ఎదురైంది. అహ్మదాబాద్‌లోని నరేంద్ర మోదీ స్టేడియం నుంచి మ్యాచ్ ముగించుకుని హోటల్‌కు తిరిగి వెళ్తుండగా గుజరాత్ టైటాన్స్ జట్టు బస్సులో అకస్మాత్తుగా భారీ అగ్నిప్రమాదం సంభవించింది. అయితే బస్సు డ్రైవర్ సమయస్ఫూర్తితో వ్యవహరించడంతో కెప్టెన్ శుభ్‌మన్ గిల్‌తో సహా ఆటగాళ్లు, కోచ్‌లు, సపోర్ట్ స్టాఫ్ అందరూ సురక్షితంగా బయటపడ్డారు. దీంతో ఓ పెద్ద ప్రమాదం తృటిలో తప్పినట్లయింది.

షార్ట్ సర్క్యూట్ కారణంగా బస్సులో చెలరేగిన మంటలు
సమాచారం ప్రకారం.. మ్యాచ్ ముగిసిన అనంతరం ఆదివారం అర్ధరాత్రి దాటిన తర్వాత ఈ ఘటన చోటుచేసుకుంది. స్టేడియం నుంచి హోటల్‌కు వెళ్తుండగా మార్గమధ్యలో బస్సులో అకస్మాత్తుగా షార్ట్ సర్క్యూట్ అయింది. దాంతో బస్సులోంచి దట్టమైన పొగలు, మంటలు రావడం ప్రారంభమయ్యాయి. డ్రైవర్ వెంటనే అప్రమత్తమై బస్సును నిలిపివేయగా.. ఆటగాళ్లందరినీ త్వరత్వరగా కిందకు దించేశారు. ఈ ప్రమాదంలో ఆటగాళ్లకు ఎలాంటి గాయాలు కాలేదు, అందరూ క్షేమంగా ఉన్నారు. అయితే ఈ అగ్నిప్రమాదం కారణంగా గుజరాత్ టైటాన్స్ ఆటగాళ్లు దాదాపు గంటపాటు రోడ్డుపైనే ఉండిపోవాల్సి వచ్చింది. ఆ తర్వాత వారి కోసం ప్రత్యామ్నాయ వాహనాన్ని ఏర్పాటు చేశారు.

గుజరాత్ టైటాన్స్‌కు తీరని నిరాశ.. ఆపై భయాందోళన
గుజరాత్ టైటాన్స్ జట్టుకు ఈ ఆదివారం రాత్రి ఓ పీడకలలా మిగిలిపోయింది. మొదట మైదానంలో ఆర్సీబీ చేతిలో 5 వికెట్ల తేడాతో ఓడిపోయి ఐపీఎల్ 2026 ట్రోఫీని చేజార్చుకున్నారు. ఆ పరాజయం బాధ నుంచి కోలుకోకముందే.. బస్సు ప్రమాదం వారిని మరింత మానసిక ఆందోళనకు గురిచేసింది. స్టేడియంలో శారీరక శ్రమ, ఓటమి బాధ, ఆపై ఈ ప్రమాదం ఆటగాళ్లను తీవ్ర భయాందోళనలకు గురిచేసాయి.

అలసట వల్లే గుజరాత్ ఓడిపోయిందా?
ఫైనల్ మ్యాచ్‌కు ముందు గుజరాత్ టైటాన్స్ జట్టు వరుస మ్యాచ్‌లు, ప్రయాణాల వల్ల అలసిపోవడం వల్లే ఓడిపోయిందా అనే ప్రశ్నకు గుజరాత్ టైటాన్స్ క్రికెట్ డైరెక్టర్ విక్రమ్ సోలంకి స్పందించారు. మ్యాచ్ అనంతరం ఆయన మాట్లాడుతూ, "మేము ఎక్కువ మ్యాచ్‌లు ఆడామని, అలసిపోయామని చెప్పి ఆర్సీబీ విజయాన్ని తక్కువ చేయదలుచుకోలేదు. మా జట్టు ఇలాంటి సాకులు చెప్పదు. ఈ పిచ్‌పై 155 పరుగుల స్కోరు చాలా తక్కువ అనేది నిజం, అయినప్పటికీ మా బౌలర్లు చివరి వరకు పోరాడారు. మేము ఎక్కడ తప్పు చేశామో సమీక్షించుకుంటాం, కానీ ప్రత్యర్థి జట్టు మా కంటే మెరుగ్గా ఆడిందనే విషయాన్ని ఒప్పుకోవాలి" అని విక్రమ్ సోలంకి పేర్కొన్నారు.