GT vs MI: ముంబై కలను చెదరగొట్టగల గుజరాత్ ఆటగాళ్లు వీరే..!

GT vs MI: ఇండియన్ ప్రీమియర్ లీగ్ 2025లో భాగంగా శుక్రవారం(నేడు) ఎలిమినేటర్ మ్యాచ్ ముల్లన్‌పూర్‌లో గుజరాత్ టైటాన్స్, ముంబై ఇండియన్స్ మధ్య జరగనుంది. ఐపీఎల్ 2025 ఎలిమినేటర్ మ్యాచ్ కేవలం గెలవడం గురించి మాత్రమే కాదు.. చరిత్రను మార్చడం గురించి కూడా. ముంబై ఇప్పటివరకు ఎలిమినేటర్ నుంచి ఫైనల్‌కు చేరుకోలేదు. అయితే గుజరాత్ టైటాన్స్ ఈ సీజన్‌లో రెండు సార్లు ముంబైని ఓడించింది. ఇప్పటికే ముంబై జట్టు 5 సార్లు ఐపీఎల్ ట్రోఫీని గెలుచుకున్న సంగతి తెలిసిందే. 6వ ఐపీఎల్ టైటిల్‌ను గెలుచుకోవాలని ఆశతో ముంబై ఇవాళ గుజరాత్ జట్టుతో తలపడుతోంది. నేడు జరిగే మ్యాచ్‌లో ఓడిన జట్టు ఐపీఎల్ నుంచి నిష్క్రమించాల్సిందే. ఈ క్రమంలో 6వ ఐపీఎల్ ట్రోఫీని గెలుచుకోవాలనే ముంబై ఇండియన్స్ కలను చెదరగొట్టగల 5గురు గుజరాత్ ఆటగాళ్ల గురించి తెలుసుకుందాం.

శుభ్‌మన్ గిల్
గుజరాత్ టైటాన్స్ కెప్టెన్ శుభ్‌మన్ గిల్ తన బ్యాటింగ్‌తో అద్భుతంగా రాణిస్తున్నాడు. గిల్(649) ఆరెంజ్ క్యాప్ రేసులో సాయి సుదర్శన్ కంటే వెనుకబడి ఉన్నాడు. శుభ్‌మన్ గిల్ 156.39 స్ట్రైక్ రేట్‌తో పరుగులు చేశాడు. ఈ కీలక మ్యాచ్‌లో కెప్టెన్ ఇన్నింగ్స్ ఆశించబడుతుంది.

సాయి సుదర్శన్
యువ ఓపెనర్ సాయి సుదర్శన్ తన బ్యాటింగ్ తో ఈ సీజన్‌లో అదరగొడుతున్నాడు. సాయి సుదర్శన్ నిలకడగా బ్యాటింగ్ చేస్తున్నాడు. సాయి సుదర్శన్ ఇప్పటివరకు ఐపీఎల్ 2025లో 679 పరుగులతో అత్యధిక స్కోరర్‌గా నిలిచాడు. అతను ముంబైపై పెద్ద ఇన్నింగ్స్ ఆడగలడు.

షెర్పేన్ రూథర్‌ఫోర్డ్
ఐపీఎల్ 2025లో గుజరాత్ టైటాన్స్ తరఫున మిడిల్ ఆర్డర్‌లో కీలక పాత్ర పోషించాడు. షెర్పేన్ రూథర్‌ఫోర్డ్ 12 మ్యాచ్‌ల్లో 267 పరుగులు చేశాడు. 157.06 స్ట్రైక్ రేట్‌తో బ్యాటింగ్ చేశాడు. అతను గుజరాత్ తరఫున కొన్ని మంచి ఇన్నింగ్స్‌లు ఆడాడు. అతను ముంబైకి ఒక పీడకలగా మారవచ్చు.

ప్రసిద్ధ్ కృష్ణ
గుజరాత్ టైటాన్స్ ఫాస్ట్ బౌలర్ ప్రసిద్ధ కృష్ణ కూడా ముంబై ఇండియన్స్ జట్టుకు అతిపెద్ద ముప్పుగా మారే అవకాశం ఉంది. ఈ సీజన్‌లో ఇప్పటివరకు అతను రెండో అత్యధిక వికెట్లు తీసుకున్న బౌలర్‌గా ఉన్నాడు. ప్రసిద్ధ్ కృష్ణ 14 మ్యాచ్‌ల్లో 23 వికెట్లు సాధించాడు.

మహమ్మద్ సిరాజ్
ఈ సీజన్‌లో గుజరాత్ టైటాన్స్ విజయం వెనుక మహమ్మద్ సిరాజ్ ఉన్నాడు. అతను ఇప్పటివరకు 14 మ్యాచ్‌ల్లో 15 వికెట్లు పడగొట్టాడు. ముంబైపై అతను కొత్త బంతితో బాగా రాణించగలడు.