INDvsAUS : కోహ్లీ బ్యాటింగ్‌ తీరుపై కీలక వ్యాఖ్యలు చేసిన గంభీర్!

కోహ్లీ సూపర్ బ్యాటింగ్..

ఈ మ్యాచ్ రెండో ఇన్నింగ్స్‌లో కోహ్లీ స్టంప్ అవుట్ అయ్యాడు. తన టెస్టు కెరీర్‌లో కోహ్లీ ఇలా అవుట్ అవడం ఇదే తొలిసారి. ఈ ఇన్నింగ్స్‌లపై టీమిండియా మాజీ ఓపెనర్, లెజెండరీ బ్యాటర్ గౌతమ్ గంభీర్ స్పందించాడు. 'సుదీర్ఘకాలం ఆడినప్పుడు అన్ని రకాలుగా అవుటవడం సహజమే. కానీ ఇక్కడ మంచి విషయం ఏంటంటే.. ఫస్ట్ ఇన్నింగ్స్‌లో అతని కంట్రోల్. ఈ టెస్టులో విరాట్ కోహ్లీ అత్యద్భుతంగా బ్యాటింగ్ చేశాడు. అఫ్‌కోర్స్ అతను చేసింది 60-65 పరుగులే కానీ.. అతని బ్యాటింగ్ మాత్రం అద్భుతం' అని మెచ్చుకున్నాడు.

భారీ పరుగులు ఖాయం..

ఆస్ట్రేలియాతో జరిగే మిగతా రెండు టెస్టుల్లో కోహ్లీ ఇదే పట్టుదల ప్రదర్శించాలని, మరిన్ని కీలకమైన ఇన్నింగ్సులు ఆడాలని గంభీర్ ఆశించాడు. 'ఇంతకుముందు కూడా నేను ఇదే మాట చెప్పా. ఆటగాడికి కాన్ఫిడెన్స్ ఇచ్చేది పరుగులే. కానీ ఇంతకాలం ఆడినప్పుడు ఎలా ఆడుతున్నాం అనేది కూడా చాలా ముఖ్యం.

కాబట్టి కోహ్లీ కనుక ఇదే రిథమ్‌లో ఆడితే.. మిగతా మ్యాచుల్లో కచ్చితంగా భారీగా పరుగులు చేస్తాడు' అని గంభీర్ అంచనా వేశాడు. రెండో టెస్టులో ఫర్వాలేదనిపించిన కోహ్లీ.. అత్యంత వేగంగా 25 వేల అంతర్జాతీయ పరుగులు చేసిన బ్యాటర్‌గా సచిన్ టెండూల్కర్ రికార్డును అధిగమించిన సంగతి తెలిసిందే.

ఇది చూసి నేర్చుకోవాలి..

కోహ్లీ బ్యాటింగ్‌ను తను కూడా మెచ్చుకున్న మాజీ లెజెండ్ మహమ్మద్ కైఫ్.. అతని ఇన్నింగ్స్ అద్భుతంగా సాగిందన్నాడు. 'ఎవరైనా చిన్న కుర్రాడు టెస్టు క్రికెట్‌లో టెక్నిక్ నేర్చుకోవాలి అనుకుంటే.. ఇలానే ఆడాలి. ఇక్కడ నువ్వు పరుగులు చేస్తావా? చెయ్యవా? అనేది పాయింట్ కాదు.

అందరూ ఎల్బీడబ్ల్యూగా వెనుతిరుగుతున్న టర్నింగ్ ట్రాక్‌పై కోహ్లీ ఆటతీరు, ఒక ప్రణాళిక ప్రకారం బ్యాటింగ్ చేయడం సూపర్' అని మెచ్చుకున్నాడు. ముఖ్యంగా కోహ్లీ తన ఫుట్‌వర్క్‌లో కచ్చితత్వం చూపించాడని కొనియాడాడు.