ఆస్ట్రేలియా గడ్డపై 'గంభీర్ శిష్యుడి' దెబ్బ.. తెరపైకి అసలు రహస్యం!

భారత క్రికెట్ జట్టులో తన ఎంపిక పట్ల, ముఖ్యంగా ఆస్ట్రేలియా పర్యటనలో గత మ్యాచ్‌లలోని తన ప్రదర్శన పట్ల విమర్శలు ఎదుర్కొంటున్న యువ పేసర్ హర్షిత్ రాణా.. ఆసీస్‌తో జరిగిన మూడు వన్డేల సిరీస్‌లో చివరిదైన మూడో మ్యాచ్‌లో తన బౌలింగ్ సత్తాను ప్రపంచానికి చాటాడు. సిడ్నీ క్రికెట్ గ్రౌండ్‌లో జరిగిన ఈ మ్యాచ్‌లో హర్షిత్ రాణా ఏకంగా 4 కీలక వికెట్లు పడగొట్టి తన విమర్శకులకు దీటైన సమాధానమిచ్చాడు. అంతేకాక ఈ వన్డే సిరీస్‌లో అత్యధిక వికెట్లు తీసిన బౌలర్‌గా నిలిచాడు. ఈ అద్భుతమైన ప్రదర్శన వెనుక జట్టు ప్రధాన కోచ్ గౌతమ్ గంభీర్ ఇచ్చిన ఓ గట్టి వార్నింగ్ ప్రేరణగా నిలిచిందనే అసలు విషయం ఇప్పుడు బయటకు వచ్చింది.

సిడ్నీలో సత్తా చాటిన హర్షిత్ రాణా
ఢిల్లీకి చెందిన ఈ యువ పేసర్ ఆస్ట్రేలియా బ్యాటర్లను తన వేగంతో, బౌన్స్‌తో ఉక్కిరిబిక్కిరి చేశాడు. సిడ్నీ పిచ్‌ను అద్భుతంగా అర్థం చేసుకున్న హర్షిత్ రాణా.. 8.4 ఓవర్లలో కేవలం 39 పరుగులు మాత్రమే ఇచ్చి.. ఆతిథ్య జట్టు పతనాన్ని శాసించాడు. ఫలితంగా పటిష్టమైన ఆస్ట్రేలియా జట్టు 236 పరుగులకే ఆలౌట్ అయింది.

ఆస్ట్రేలియా పర్యటనలో భాగంగా పెర్త్, అడిలైడ్‌లలో జరిగిన మొదటి రెండు వన్డేల్లో హర్షిత్ రాణా ప్రదర్శన అంతంత మాత్రంగానే ఉంది. దీనితో అర్ష్‌దీప్ సింగ్ వంటి ప్రతిభావంతుడైన బౌలర్‌ను పక్కనపెట్టి మూడో వన్డేలో హర్షిత్ రాణాకు అవకాశం ఇవ్వడంపై పలువురు మాజీ క్రికెటర్లు, అభిమానులు ప్రశ్నలు లేవనెత్తారు. అయినప్పటికీ మూడో మ్యాచ్‌లో హర్షిత్ రాణా తన కెరీర్లో బెస్ట్ పెర్ఫెర్మెన్స్ ఇచ్చి జట్టు మేనేజ్మెంట్ తనపై ఉంచిన నమ్మకాన్ని నిలబెట్టుకున్నాడు.

గంభీర్ వార్నింగ్.. అతిపెద్ద రహస్యం ఇదే..
హర్షిత్ రాణా అద్భుత ప్రదర్శన వెనుక ఉన్న అతిపెద్ద రహస్యాన్ని అతని చిన్ననాటి కోచ్ శరవణ్ వెల్లడించారు. జట్టు ప్రధాన కోచ్ గౌతమ్ గంభీర్, రాణాకు "ప్రదర్శన ఇవ్వు లేదంటే నిన్ను బయట కూర్చోబెడతాను" అంటూ తీవ్ర హెచ్చరిక చేశారట. కోచ్ శరవణ్ చెప్పిన దాని ప్రకారం, గంభీర్ ఇచ్చిన ఈ స్పష్టమైన సందేశమే 23 ఏళ్ల రాణాకు ప్రేరణగా మారింది.కోచ్ శరవణ్ మాట్లాడుతూ, "సిడ్నీలో జరిగిన మ్యాచ్ రాణాకు ఒక పెద్ద పరీక్ష. బయటి విమర్శలన్నింటినీ తన ఆటతోనే సమాధానం చెప్పాలని రాణా కోరుకున్నాడు. గంభీర్ స్వభావం చాలా సూటిగా ఉంటుంది. అది ఎవరికైనా సరే తమ బాధ్యత గురించి స్పష్టమైన సందేశం ఇస్తుంది. అదే రాణాలో కసి పెంచింది" అని వివరించారు.

శ్రీకాంత్ ఆరోపణలకు కోచ్ ఘాటు సమాధానం
రాణా ప్రదర్శనపై విమర్శలు చేసిన వారిలో మాజీ భారత క్రికెటర్ కృష్ణమాచారి శ్రీకాంత్ కూడా ఉన్నారు. హర్షిత్ రాణా కోచ్ గంభీర్‌కు నచ్చిన ఆటగాడు కాబట్టే అతనికి ఆస్ట్రేలియా పర్యటనకు జట్టులో స్థానం దక్కిందని శ్రీకాంత్ ఆరోపించారు. ఈ విమర్శలకు రాణా చిన్ననాటి కోచ్ శరవణ్ గట్టి జవాబిచ్చారు. "రిటైర్మెంట్ తర్వాత యూట్యూబ్ ఛానెళ్ల ద్వారా డబ్బు సంపాదించాలని చూసే క్రికెటర్లు, ఇప్పుడిప్పుడే అంతర్జాతీయ కెరీర్‌ను ప్రారంభిస్తున్న యువ ఆటగాడిని విమర్శించడం సరికాదు. ఆటగాళ్లకు మార్గనిర్దేశం చేసే, మందలించే అధికారం మాజీ ఆటగాళ్లకు ఉంటుంది. కానీ, కేవలం తమ యూట్యూబ్ ఛానెల్ పాపులారిటీ కోసం ఏది పడితే అది మాట్లాడకూడదు" అని శరవణ్ శ్రీకాంత్‌ను పరోక్షంగా విమర్శించారు.

మొత్తంగా ఈ వన్డే సిరీస్‌ను అత్యధిక వికెట్లతో ముగించిన హర్షిత్ రాణా.. ఒత్తిడిలో తన ప్రదర్శనతో అందరి నోళ్లు మూయించాడు. గంభీర్ హెచ్చరికను సానుకూలంగా తీసుకున్న హర్షిత్ రాణా, భారత క్రికెట్‌కు భవిష్యత్తులో ఒక కీలక ఫాస్ట్ బౌలర్‌గా ఎదిగేందుకు తన పటిష్టమైన ఆత్మవిశ్వాసాన్ని ఈ ప్రదర్శన ద్వారా పెంచుకున్నాడు.