10వ టైటిల్: ఫ్రెంచ్ ఓపెన్‌లో చరిత్ర సృష్టించిన నాదల్

హైదరాబాద్: ఫ్రెంచ్‌ ఓపెన్‌లో క్లే కోర్టు రారాజు తనకు తిరుగు లేదని రఫెల్ నాదల్ మరోసారి నిరూపించుకున్నాడు. ఫ్రెంచ్ ఓపెన్‌ ఫైనల్స్‌లో విజేతగా నిలిచాడు. ఈ విజయంతో పదిసార్లు ఫ్రెంచ్‌ ఓపెన్‌ గెలిచిన ఆటగాడిగా చరిత్ర సృష్టించాడు. మరోవైపు అత్యధిక గ్రాండ్‌స్లామ్స్‌ గెలిచిన రెండో ఆటగాడిగా చరిత్ర సృష్టించాడు.

నాలుగో సీడెడ్‌గా బరిలోకి దిగిన రఫెల్ నాదల్ పురుషుల సింగిల్స్‌ ఫైనల్‌లో స్విట్జర్లాండ్‌కు చెందిన వావ్రింకాపై 6-2, 6-3, 6-1 తేడాతో వరుస సెట్లలో విజయం సాధించాడు. పైనల్‌లో రఫెల్ నాదల్ తన అత్యుత్తమ ప్రదర్శన కనబర్చాడు. రెండేళ్ల విరామం తర్వాత తిరిగి నాదల్ ఫ్రెంచ్ ఓపెన్‌ను గెలిచాడు.

గత 12 సంవత్సరాలుగా రొనాల్డ్ గారొస్‌లో తన విజయ పరంపరను కొనసాగిస్తున్నాడు. 2005-09 మధ్య కాలంలో రఫెల్ నాదల్ నాలుగు సార్లు ఫ్రెంచ్ ఓపెన్ టైటిల్‌ను గెలిచాడు. ప్రెంచ్ ఓపెన్ ఎరాలో 10 సార్లు గ్రాండ్ స్లామ్ టైటిళ్లు గెలిచిన ఒకే ఒక్క ఆటగాడిగా నాదల్ రికార్డు సృష్టించాడు.