IPL 2023 : మార్క్రమ్ కాదు.. సన్‌రైజర్స్ కెప్టెన్‌గా అతనికే నా ఓటు: మాజీ ఓపెనర్

మాజీ ఓపెనర్ నాట్ హ్యాపీ..

అయితే ఇలా మాటిమాటికీ కెప్టెన్లను మార్చడం సరికాదని ఫ్యాన్స్ కొంచెం సీరియస్ అయిన మాట మాత్రం వాస్తవం. కానీ గతేడాది జట్టుకు నాయకత్వం వహించిన కేన్ విలియమ్సన్‌ను కూడా మినీ వేలానికి ముందే రిలీజ్ చేసేసిన ఆ జట్టు.. కొత్త కెప్టెన్‌ను ఎంచుకోక తప్పదు కదా. ఈ క్రమంలోనే వేలంలో కొనుగోలు చేసిన మయాంక్ అగర్వాల్, ఎప్పటి నుంచో ఫ్రాంచైజీతో ఉన్న భువనేశ్వర్ కుమార్ కూడా కెప్టెన్సీ రేసులో ఉన్నట్లు వార్తలు వచ్చాయి. అయితే చివరకు మార్క్రమ్‌కే జట్టు పగ్గాలు అందించాలని సన్‌రైజర్స్ యాజమాన్యం నిర్ణయించింది. ఈ నిర్ణయంపై టీమిండియా మాజీ ఓపెనర్ ఆకాష్ చోప్రా పెదవి విరిచాడు. తానైతే భువనేశ్వర్ కుమార్‌కు పగ్గాలు అందించే వాడినని చెప్పాడు.

భువీకే నా ఓటు..

'ఎయిడెన్ మార్క్రమ్.. సన్‌రైజర్స్ హైదరాబాద్ కెప్టెన్ అయ్యాడు. వాళ్ల దగ్గర భువనేశ్వర్ కుమార్, మయాంక్ అగర్వాల్ రూపంలో మరో రెండు ఆప్షన్లు ఉన్నాయి. నేనైతే భువీకి ఓటేసేవాడిని. అతను ఈ ఫ్రాంచైజీతో చాలా కాలంగా ఉన్నాడు కదా. అతను ఇంకెక్కడా క్రికెట్ ఆడటం లేదు. భారత్ తరఫున వన్డేలు, టీ20లు కూడా ఆడట్లేదు. కాబట్టి మొత్తం ఐపీఎల్ సీజన్‌కు అందుబాటులో ఉంటాడు. గతేడాది కూడా కేన్ విలియమ్సన్ లేని సమయంలో అతనే జట్టుకు కెప్టెన్సీ చేశాడు' అని చోప్రా గుర్తుచేశాడు. జట్టుతో ఇంత కాలంగా ఉన్న భువీని కెప్టెన్ చేసుంటే మాత్రం చాలా బాగుండేదని, తానైతే అదే పని చేసే వాడినని తేల్చి చెప్పాడు.

సౌతాఫ్రికా లీగ్ వల్లనే..

మయాంక్ అగర్వాల్‌కు కెప్టెన్సీ ఇవ్వకపోవడాన్ని మాత్రం చోప్రా సమర్ధించాడు. మయాంక్ అద్భుతమైన బ్యాటర్ అని, అతని ఆటంటే తనకు చాలా ఇష్టమని చెప్పాడు. అయితే కెప్టెన్, బ్యాటర్‌గా గతేడాది అతని ప్రదర్శన చూసిన తర్వాత.. అతనిపై ఎక్కువ భారం పెట్టడం మంచిది కాదని అభిప్రాయపడ్డాడు. కాబట్టి అతన్ని విధ్వంసకర ఓపెనర్‌గా మాత్రమే పరిగణనలోకి తీసుకోవాలని సూచించాడు. సౌతాఫ్రికా టీ20 లీగ్‌లో సన్‌రైజర్స్ జట్టు.. మార్క్రమ్ కెప్టెన్సీలో విజయవంతం కావడంతో హైదరాబాద్ ఫ్రాంచైజీ కెప్టెన్సీ కూడా అతనిక అప్పగించి ఉంటారని పేర్కొన్నాడు.