మాజీ క్రికెటర్‌కు తృటిలో తప్పిన ప్రమాదం.. కారు ముక్కలైనా!

ఆస్ట్రేలియా మాజీ కెప్టెన్ మైఖేల్ క్లార్క్ ఐపీఎల్ 2026 ఫైనల్ ముగిసిన తర్వాత ఆ రోజు రాత్రి తనకు ఎదురైన ఓ భయానక రోడ్డు ప్రమాదం గురించి సంచలన విషయాలను పంచుకున్నాడు. ఐపీఎల్ ముగించుకుని ఆయన ఎయిర్పోర్టుకు వెళ్తుండగా.. ప్రయాణిస్తున్న కారు ఓ భారీ ట్రక్కును బలంగా ఢీకొట్టింది. ఈ ప్రమాదంలో కారు ముందు భాగం పూర్తిగా ధ్వంసమైంది. ఓ క్రికెట్ పాడ్‌కాస్ట్‌లో పాల్గొన్న మైఖేల్ క్లార్క్ ఈ చేదు అనుభవాన్ని గుర్తు చేసుకుంటూ.. తాను ప్రాణాలతో సురక్షితంగా ఇంటికి చేరడం తన అదృష్టమని పేర్కొన్నాడు. అలాగే ప్రమాదం జరిగిన సమయంలో తనకు సహాయం చేసిన భారతీయులకు క్లార్క్ ప్రత్యేకంగా కృతజ్ఞతలు తెలిపాడు.

ట్రక్కు కిందకు దూసుకెళ్లిన కారు.. నిద్రలోనే ఒక్కసారిగా షాక్
ప్రమాదం జరిగిన సమయానికి సంబంధించిన వివరాలను మైఖేల్ క్లార్క్ వివరిస్తూ.. అహ్మదాబాద్ స్టేడియంలో ఐపీఎల్ ఫైనల్ మ్యాచ్ ముగిసిన తర్వాత సుదీర్ఘ ప్రయాణం కారణంగా తాను కారులోనే నిద్రపోయానని చెప్పారు. అయితే ఒక్కసారిగా పెద్ద శబ్దంతో కారు ట్రక్కును ఢీకొట్టడంతో తనకు మెలకువ వచ్చిందని, కారు ముందు భాగం ఓ భారీ ట్రక్కు కిందకు దూసుకెళ్లడం చూసి తాను తీవ్ర దిగ్భ్రాంతికి గురయ్యానని పేర్కొన్నారు. ట్రక్కుకు సంబంధించిన బ్రేక్ లైట్లు పనిచేయకపోవడం వల్లే సమయానికి బ్రేక్ వేయలేకపోయామని.. అందుకే ఈ ప్రమాదం జరిగిందని డ్రైవర్ తనకు తర్వాత చెప్పినట్లు క్లార్క్ వివరించాడు. ఈ ప్రమాదంలో కారు మళ్లీ బాగుచేయలేనంతగా డ్యామేజ్ అయింది.

డ్రైవర్ ఆరోగ్యంపై మైఖేల్ క్లార్క్ ఆందోళన
ఈ ప్రమాదంలో మైఖేల్ క్లార్క్‌కు స్వల్ప గాయాలైనప్పటికీ.. ఆయన తన కారు డ్రైవర్ పరిస్థితిని చూసి తీవ్ర ఆందోళన చెందారు. ప్రమాద తీవ్రతకు డ్రైవర్ కాలుకు బలమైన గాయమై ఉంటుందని క్లార్క్ భావించాడు. ప్రమాదం జరిగిన తర్వాత డ్రైవర్ భయాందోళనలో కనిపించాడని ఆయన చెప్పాడు. డ్రైవర్ తన ఆరోగ్యం గురించి మాత్రమే కాకుండా, తాను పనిచేస్తున్న కంపెనీ కారు పూర్తిగా ధ్వంసమవ్వడంపై ఉద్యోగం ఎక్కడ పోతుందోనని ఎక్కువగా భయపడ్డాడని క్లార్క్ తెలిపాడు. ఆ సమయంలో క్లార్క్ అతనికి ధైర్యం చెప్పి, వెంటనే మెడికల్ ట్రీట్‌మెంట్ తీసుకోవాల్సిందిగా కోరాడు.

భారత ప్రజలకు, బీసీసీఐకి ప్రత్యేక ధన్యవాదాలు
ఈ క్లిష్ట సమయంలో తనకు అండగా నిలిచిన స్థానిక ప్రజలను, అధికారులను మైఖేల్ క్లార్క్ ఎంతగానో అభినందించాడు. ముఖ్యంగా ప్రమాదం జరిగిన విషయం తెలియగానే బీసీసీఐ ప్రతినిధులు వెంటనే స్పందించి, తనతో పాటు డ్రైవర్ క్షేమసమాచారాలను అడిగి తెలుసుకున్నారని చెప్పాడు. అంత పెద్ద ప్రమాదం జరిగి భయాందోళనలో ఉన్నప్పటికీ.. క్లార్క్ సమయానికి ఎయిర్‌పోర్టుకు చేరుకుని ఆస్ట్రేలియాకు ఫ్లైట్ ఎక్కగలిగాడు. ఈ ప్రమాదం ఒక పీడకల లాంటిదే అయినప్పటికీ, ఐపీఎల్ 2026 సీజన్‌ను కవర్ చేయడం తనకు ఎప్పటికీ గుర్తుండిపోయే ఓ మంచి అనుభవమని క్లార్క్ ముగించాడు.