నెరవేరిన మెస్సీ కల: వరుసగా రెండోసారి ప్రపంచ కప్ ఫైనల్‌కు అర్జెంటీనా!

FIFA World Cup 2026: ఫుట్‌బాల్ చరిత్రలో అర్జెంటీనా జట్టు ఓ సువర్ణాధ్యాయాన్ని లిఖించింది. ఫిఫా ప్రపంచ కప్ 2026 రెండో సెమీ-ఫైనల్లో లియోనెల్ మెస్సీ నేతృత్వంలోని అర్జెంటీనా.. ప్రపంచ కప్ గెలవాలన్న ఇంగ్లాండ్ కలను చెదరగొట్టి, వరుసగా రెండోసారి ఫైనల్‌లో తమ స్థానాన్ని సురక్షితం చేసుకుంది. ఒకానొక దశలో ఇంగ్లాండ్ ఫైనల్లో స్థానాన్ని ఇప్పటికే ఖాయం చేసుకున్నట్లు అనిపించింది. కానీ మ్యాచ్ చివరి 7 నిమిషాల్లో డిఫెండింగ్ ఛాంపియన్ అర్జెంటీనా సత్తాను నిరూపించుకుంది. లియోనెల్ మెస్సీ అందించిన రెండు అద్భుతమైన పాస్‌ల పుణ్యమా అని.. అర్జెంటీనా 2-1 తేడాతో ఇంగ్లాండ్‌ను ఓడించి వరుసగా రెండోసారి ఫిఫా ప్రపంచ కప్ ఫైనల్‌కు చేరుకుంది. అర్జెంటీనా ఇప్పుడు ఆదివారం న్యూజెర్సీలో జరిగే ఫైనల్‌లో స్పెయిన్‌తో తలపడనుంది.

FIFA World Cup 2026 ఫైనల్లో స్పెయిన్.. ఫ్రాన్స్ ఖేల్‌ఖతమ్!

మెర్సిడెస్-బెంజ్ స్టేడియంలో మ్యాచ్ ప్రారంభమైనప్పటి నుంచి స్టేడియంలో ఇరు దేశాల అభిమానుల మధ్య తీవ్ర ఉద్రిక్తత, విపరీతమైన కోలాహలం నెలకొంది. మొదటి అర్థభాగంలో చాలా వరకు ఫౌల్స్‌తోనే అంతరాయం కలిగింది. మూడో నిమిషంలో ఎంజో ఫెర్నాండెజ్ చేసిన ఫౌల్ ఆటగాళ్ల మధ్య తీవ్ర వాగ్వాదానికి దారితీసింది. ఇంగ్లాండ్ జట్టు లియోనెల్ మెస్సీని ముట్టడించి స్వేచ్ఛగా ఆడే అవకాశాన్ని ఏ మాత్రం ఇవ్వలేదు. అర్జెంటీనాకు చెందిన మార్టినెజ్, ఇంగ్లాండ్‌కు చెందిన ఇలియట్ అండర్సన్ కూడా యెల్లో కార్డులు అందుకున్నారు. పరిమిత అవకాశాల మధ్య మొదటి అర్ధభాగం 0-0 డ్రాతో ముగిసింది.

రెండో భాగంలో కథ పూర్తిగా మారిపోయింది. 55వ నిమిషంలో ఇంగ్లాండ్ ఆటగాడు మోర్గాన్ రోడ్జర్స్ అందించిన అద్భుతమైన పాస్‌ను ఆంథోనీ గోర్డాన్ అద్భుతంగా గోల్‌గా మలిచాడు. ఈ గోల్‌తో ఇంగ్లాండ్ 1-0 ఆధిక్యాన్ని సాధించింది. అర్జెంటీనాపై ఒత్తిడి స్పష్టంగా కనిపించింది. సమయం గడుస్తున్న కొద్దీ ఇంగ్లాండ్ విజయం ఖాయమని అనిపించింది.

హర్మన్‌ప్రీత్ కౌర్‌కు చెక్? భారత కెప్టెన్సీపై స్మృతి మంధాన ఓపెన్ టాక్!

7 నిమిషాల్లో మారిపోయిన కథ
అర్జెంటీనా అభిమానులు ఆశ కోల్పోతున్న సమయంలో, 'ఫుట్‌బాల్ దేవుడు' లియోనెల్ మెస్సీ బాధ్యతలు స్వీకరించాడు. 85వ నిమిషంలో మెస్సీ డిఫెండర్లను తప్పించుకుని బంతిని ఎంజో ఫెర్నాండెజ్‌కు పాస్ చేశాడు. ఫెర్నాండెజ్ బాక్స్ బయటి నుంచి బుల్లెట్ లాంటి షాట్ కొట్టడంతో స్కోరు 1-1తో సమమైంది. మ్యాచ్ అదనపు సమయం వైపు వెళుతున్నప్పుడు ఇంజ్యూరీ టైమ్‌లో మెస్సీ మరో కచ్చితమైన పాస్ ఇవ్వగా.. లౌటారో మార్టినెజ్ ఎలాంటి పొరపాటు చేయకుండా దానిని గోల్‌గా మలిచాడు. కేవలం 7 నిమిషాల్లోనే స్కోరు 1-0 నుంచి 2-1కి మారిపోయింది.

తుది విజిల్ మోగినప్పుడు అట్లాంటాలోని మైదానంలో లియోనెల్ మెస్సీ మోకాళ్లపై కూర్చున్నాడు, అతని కళ్లలో నీళ్లు నిండిపోయాయి. ఆ తర్వాత అతను తన సహచర ఆటగాళ్లను కౌగిలించుకున్నాడు. మరో చిరస్మరణీయమైన పునరాగమనంతో తన జట్టును విజయపథంలో నడిపించిన ఈ 39 ఏళ్ల ఆటగాడు.. ఇప్పుడు వరుసగా తన రెండో ఫిఫా ప్రపంచ కప్‌ను గెలవడానికి కేవలం ఒక్క అడుగు దూరంలో ఉన్నాడు.