హైదరాబాదు అభిమానులను నిరాశపరిచిన సచిన్, లక్ష్మణ్

హైదరాబాద్: హైదరాబాదులోని ఉప్పల్ స్టేడియంలో భారత్, న్యూజిలాండు టెస్టులో అభిమానులు మూడు విషయాల్లో అసంతృప్తికి గురికాగా ఒక్క విషయంలో మాత్రం ఆనందంగా ఉన్నారు. విలక్షణ హైదరాబాదీ బ్యాట్సుమెన్ వివిఎస్ లక్ష్మణ్ తో సొంత మైదానంలో సెంచరీ చేస్తాడను చాలామంది అభిమానులు ఎదురు చూశారు. అయితే లక్ష్మణ్ ఆ కొరతను తీర్చలేకపోయాడు. 22 సంవత్సరాల తర్వాత హైదరాబాదులో జరుగుతున్న టెస్టు కావడం, లక్ష్మణ్ కు సొంత మైదానంలో మొదటి టెస్టు కావటం అందరి దృష్టి సెంచరీవైపు మరలింది. అయితే లక్ష్మణ్ 74 పరుగులు చేసి ఎల్బీగా అవుటయ్యాడు. సెంచరీ చేయటంలో నిరాశపరిచిన జట్టును మళ్లీ పటిష్ట స్థాయిలో ఉంచటంలో తన పాత్రను పోషించాడు.

ఇక మాస్టర్ బ్లాస్టర్ సచిన్ టెండుల్కర్ సెంచరీల అర్థ సెంచరీ కోసం హైదరాబాది అభిమానులు ఎదురు చూశారు. హైదరాబాదులో సచిన్ సెంచరీ సాధించి తన యాభయ్యవ సెంచరీ సాధిస్తాడని గంపెడాశలు పెట్టుకున్నారు. సెంచరీని పక్కన పెడితే సచిన్ తన ఆటతీరునే ప్రదర్శించలేక పోయాడు. 13 పరుగులకే అవుటయి అభిమానులను తీవ్ర నిరాశకు గురిచేశాడు. అహ్మదాబాదులోనే తన సెంచరీల అర్ధ సెంచరీ పూర్తి చేస్తాడనుకున్నప్పటికీ అక్కడా నిరాశపరిచాడు. కాగా సచిన్ మాత్రం తనకు యాభయ్యవ సెంచరీకన్నా వేరే ప్రాధాన్యాలున్నాయని అంటున్నాడు.

ఇక అహ్మదాబాదులో జరిగిన మొదటి టెస్టులో లక్ష్మణ్ తో కలిసి వీరోచిత బ్యాటింగ్ చేసిన హర్భజన్ సింగ్ హైదరాబాదులో మళ్లీ విజృంభించి అలరిస్తాడా అని అందరూ ఎదురు చూశారు. అయితే ఆ ఎదురుచూపులను భజ్జీ నిరాశపర్చలేదు. రెండో టెస్టులను 111 పరుగులు చేశాడు. దీంతో వరుసగా రెండు సెంచరీలు చేసిన ఎనిమిదో నంబరు బ్యాట్సుమన్ గా భజ్జీ రికార్డు సాధించాడు. అహ్మదాబాదులో భజ్జీ ఏదో అల్లాటప్పాగా అడలేదని హైదరాబాదులో నిరూపించుకున్నాడు. భజ్జీ ఇప్పుడు ఆల్ రౌండర్ అన్నమాట. రెండో ఇన్నింగ్సులో మెక్ కల్లం భారత బౌలర్లను మూడు చెరువుల నీరు తాగించి డబుల్ సెంచరీ సాధించాడు. అతను 225 పరుగులు చేశాడు. రెండో టెస్టు మ్యాచ్ డ్రాగా ముగిసింది.