Click it and Unblock the Notifications
షకీబల్ హసన్ మ్యాజిక్..
భారత జట్టు బ్యాటింగ్ చేస్తుండగా అభిమానులకు తొలి షాక్ తగిలింది. ఇది జరిగినప్పుడు బంగ్లా ఫ్యాన్స్ ఆనందంలో మునిగిపోగా.. భారత అభిమానులు నిరాశలో కుంగిపోయారు. క్రీజులో కుదురుకున్నట్లే కనిపించిన రోహిత్ శర్మ (27)ను షకీబల్ పెవిలియన్ చేర్చాడు. అదే ఓవర్లో టీమిండియా స్టార్ విరాట్ కోహ్లీ (9)ని కూడా అవుట్ చేశాడు. షకీబల్ వేసిన బంతిని కవర్ డ్రైవ్ చేసేందుకు కోహ్లీ ప్రయత్నించాడు. అయితే బంగ్లా కెప్టెన్ లిటన్ దాస్ అందుకున్న సూపర క్యాచ్‌కు కోహ్లీ మైదానం వీడాడు. ఈ ఓవర్‌ను భారత అభిమానులు అంత త్వరగా మర్చిపోవడం అసాధ్యం.
కోహ్లీ స్క్రీమర్..
మైదానంలో చురుగ్గా కదులుతూ అసాధ్యమైన క్యాచ్‌లు అందుకోవడం కోహ్లీ స్పెషాలిటీ. బంగ్లాదేశ్ వన్డేలో కూడా అతను అదే చేసి చూపించాడు. బ్యాటింగ్‌లో షకీబల్ బౌలింగ్‌లో లిటన్ దాస్ అందుకున్న సూపర్ క్యాచ్‌కు విరాట్ కోహ్లీ.. ఫీల్డింగ్‌లో ఎవరూ ఊహించని విధంగా తను కూడా సూపర్ క్యాచ్ అందుకొని షకీబల్ హసన్ను పెవిలియన్‌కు పంపాడు. తనను అవుట్ చేసిన బంగ్లా ఆల్‌రౌండర్ షకీబల్ హసన్ను పెవిలియన్ చేర్చాడు. లిటన్ దాస్ అవుటైన తర్వాత నెమ్మదిగా ఇన్నింగ్స్ బిల్డ్ చేసిన షకీబల్.. స్పిన్నర్లను ఒత్తిడిలోకి నెట్టి అడపా దడపా బౌండరీలు కూడా రాబడుతున్నాడు.
అతను క్రీజులో ఉంటే మ్యాచ్ టీమిండియా చేయి జారిపోవడం ఖాయంగా కనిపించింది. అలాంటి సమయంలో వాషింగ్టన్ సుందర్ వేసిన బంతిని ఆఫ్‌సైడ్ ఆడేందుకు షకీబల్ ప్రయత్నించాడు. షార్ట్ కవర్స్‌లో ఉన్న కోహ్లీ తన కుడి చేతి వైపు దూకి ఒంటి చేత్తో క్యాచ్ పట్టేసి భారత జట్టును మళ్లీ పోటీలోకి తీసుకొచ్చాడు.
రాహుల్ వదిలేసిన క్యాచ్
ఈ మ్యాచ్‌లో చాలా ఘటనలు మ్యాచ్‌ను మలుపు తిప్పిన మాట వాస్తవం. కానీ కేఎల్ రాహుల్ వదిలేసిన క్యాచ్ మాత్రం వీటన్నిటిలో టాప్‌లో నిలుస్తుంది. అప్పటికే 9 వికెట్లు కోల్పోయిన బంగ్లా జట్టు ఓటమి అంచున నిలిచింది. అలాంటి సమయంలో మెహదీ హసన్ ఇచ్చిన సులభమైన క్యాచ్‌ను రాహుల్ జారవిడిచాడు.
అది చూసిన భారత అభిమానులు షాకైపోయారు. అంత సులభమైన క్యాచ్ వదిలేయడం ఏంటని తలలు పట్టుకున్నారు. ఈ అవకాశాన్ని ఉపయోగించుకున్న మెహదీ హసన్.. పదో వికెట్‌కు 51 పరుగుల భాగస్వామ్యం నెలకొల్పి బంగ్లాను గెలిపించాడు కూడా. దీంతో భారత అభిమానులు రాహుల్‌పై మండి పడుతున్నారు. ఇంత చెత్తగా ఫీల్డింగ్ చేస్తున్నారేంటి? అని టీమిండియాను తిట్టిపోస్తున్నారు. ఈ క్యాచ్‌ను కూడా భారత అభిమానులు చాలా కాలం మర్చిపోలేరు.
