వీడియో వైరల్: భారీ షాట్‌తో స్టేడియం బయట పడిన బంతి.. ఎత్తుకెళ్లిపోయిన ఫ్యాన్!

టీ20 క్రికెట్ అంటేనే భారీ షాట్లు. మైదానంలోకి వచ్చిన ప్రతి బ్యాటరూ బంతిని బౌండరీ ఆవలకు పంపేందుకే ప్రయత్నిస్తాడు. ఈ క్రమంలో కొందరు ఆటగాళ్లు మరీ గట్టిగా బంతిని బాదడంతో అది స్టేడియం ఆవల పడే అవకాశమూ ఉంటుంది. తాజాగా ఇంటర్నేషనల్ టీ20 లీగ్‌లో కూడా అదే జరిగింది. ఎంఐ ఎమిరేట్స్, డిజర్ట్ వైపర్స్ మధ్య జరిగిన మ్యాచులో భారీ స్కోర్లు నమోదయ్యాయి. ఈ మ్యాచ్‌లో తొలుత బ్యాటింగ్ చేసిన ఎమిరేట్స్ జట్టు ఏకంగా 241 పరుగులు చేసింది.

ఎమిరేట్స్ ఆటగాళ్లలో ఆండ్రీ ఫ్లెచర్, ముహమ్మద్ వసీం, కెప్టెన్ కీరన్ పొలార్డ్ ముగ్గురూ హాఫ్ సెంచరీలతో రాణించారు. ఈ ఇన్నింగ్స్ చివర్లో డాన్ మూస్లీ భారీ షాట్లతో విరుచుకుపడ్డాడు. కేవలం 17 బంతుల్లో 31 పరుగులు చేశాడు. ఈ క్రమంలో అతను కొట్టిన ఒక భారీ సిక్సర్‌లో.. బంతి షార్జా స్టేడియం బయట పడింది. ఇలా పడటం అప్పుడప్పుడూ జరుగుతూనే ఉంటుంది.

అయితే ఆ బంతి ఏమవుతుందో తెలియదు. ఈ మ్యాచ్‌ సమయంలో మాత్రం ఇలా స్టేడియం బయట పడిన బంతిని ఒక వ్యక్తి పరిగెత్తుకుంటూ వెళ్లి తీసుకున్నాడు. మళ్లీ స్టేడియంలోకి రాకుండా పరుగు తీశాడు. మళ్లీ దాన్ని తిరిగి ఇచ్చిందీ లేనిదీ ఎవరికీ తెలియదు.

అలాగే ఆ తర్వాత కీరన్ పొలార్డ్ కూడా భారీ సిక్సర్ బాదాడు. అప్పుడు కూడా బంతి స్టేడియం బయట పడింది. అయితే ఈసారి మాత్రం అటుగా వెళ్లిన ఒక వ్యక్తి బంతిని తీసుకొచ్చి ఇచ్చేశాడు. కాగా ఈ మ్యాచ్‌లో భారీ స్కోరు చేసిన ఎమిరేట్స్ జట్టు.. బౌలింగ్ కూడా చక్కగా చేయడంతో విజయం ఆ జట్టునే వరించింది. ఇలా బంతిని అభిమాని ఎత్తుకుపోయిన వీడియో ఇప్పుడు నెట్టింట తెగ వైరల్ అవుతోంది.