ఐపీఎల్‌లో విఫలం.. ఇప్పుడు సెంచరీతో అదరగొట్టాడు!

MLC 2025: మేజర్ లీగ్ క్రికెట్ 2025లో భాగంగా జరిగిన 10వ మ్యాచ్‌లో టెక్సాస్ సూపర్ కింగ్స్ కెప్టెన్ ఫాఫ్ డుప్లెసిస్ బ్యాట్‌తో విజృంభించాడు. ఈ మ్యాచ్‌లో ఫాఫ్ డుప్లెసిస్ 51 బంతుల్లో 100 పరుగులు సాధించాడు. అయితే ఈ మ్యాచ్‌ను శాన్‌ఫ్రాన్సిస్కో యూనికార్న్స్ 7 వికెట్ల తేడాతో గెలుచుకుంది.

ఐపీఎల్‌లో నిరాశపరిచిన తర్వాత ఎంఎల్సీలో ఫాఫ్ మెరుపులు
ఐపీఎల్ 2025లో నిరాశపరిచిన తర్వాత ఫాఫ్ డుప్లెసిస్ మేజర్ లీగ్ క్రికెట్ 2025లో అద్భుతాలు చేస్తున్నాడు. 40 ఏళ్ల వయసులో కూడా ఫాఫ్ డుప్లెసిస్‌లో 21-22 ఏళ్ల క్రికెటర్ లాంటి చురుకుదనం కనిపిస్తోంది. టెక్సాస్ సూపర్ కింగ్స్, శాన్‌ఫ్రాన్సిస్కో యూనికార్న్స్ మధ్య జరిగిన మ్యాచ్‌లో అద్భుతమైన బ్యాటింగ్ ప్రదర్శనతో ఫాఫ్ డుప్లెసిస్ సెంచరీ సాధించాడు. అయితే అతని జట్టు ఈ మ్యాచ్‌లో విజయం సాధించలేకపోయింది.

ఫాఫ్ డుప్లెసిస్ సెంచరీ
ఈ మ్యాచ్‌లో తొలుత బ్యాటింగ్ చేసిన టెక్సాస్ సూపర్ కింగ్స్ 20 ఓవర్లలో 5 వికెట్లు కోల్పోయి 198 పరుగులు చేసింది. ఈ క్రమంలో ఫాఫ్ డుప్లెసిస్ బ్యాట్ నుంచి సెంచరీ వచ్చింది. ఫాఫ్ డుప్లెసిస్ 51 బంతుల్లో 100 పరుగులు చేశాడు. తన ఇన్నింగ్స్‌లో ఫాఫ్ డుప్లెసిస్ 6 ఫోర్లు, 7 సిక్సర్లు కొట్టాడు. ఈ సమయంలో ఫాఫ్ డుప్లెసిస్ స్ట్రైక్ రేట్ 196.08గా ఉంది. బ్యాటింగ్‌తో పాటు ఫాఫ్ డుప్లెసిస్ మేజర్ లీగ్ క్రికెట్‌లో తన ఫీల్డింగ్‌తో కూడా అందరి దృష్టిని ఆకర్షిస్తున్నాడు.

శాన్‌ఫ్రాన్సిస్కో యూనికార్న్ 7 వికెట్ల తేడాతో విజయం
ఈ మ్యాచ్‌లో టెక్సాస్ సూపర్ కింగ్స్ శాన్ ఫ్రాన్సిస్కో యూనికార్న్స్ ముందు 199 పరుగులు లక్ష్యాన్ని నిర్ధేశించింది. శాన్ ఫ్రాన్సిస్కో యూనికార్న్స్ ఈ లక్ష్యాన్ని 3 వికెట్లు కోల్పోయి 16.1 ఓవర్లలోనే ఛేదించింది. శాన్ ఫ్రాన్సిస్కో యూనికార్న్స్ తరఫున బ్యాటింగ్ చేసిన ఫిన్ అలెన్ అత్యధికంగా 35 బంతుల్లో 78 పరుగులు చేశాడు. ఇందులో 8 సిక్సర్లు, 4 ఫోర్లు ఉన్నాయి. వీరితో పాటు మాథ్యూ షార్ట్ 29 బంతుల్లో 61 పరుగులు చేశాడు. ఇందులో 6 ఫోర్లు, 4 సిక్సర్లు ఉన్నాయి. అలాగే జేక్ ఫ్రేజర్ 25 బంతుల్లో 3 ఫోర్లు, 2 సిక్సర్లతో 37 పరుగులు చేశాడు.దీంతో శాన్ ఫ్రాన్సిస్కో యూనికార్న్స్ ఈ మ్యాచ్‌ను 7 వికెట్ల తేడాతో గెలుచుకుంది. అంతకుముందు శాన్ ఫ్రాన్సిస్కో యూనికార్న్స్ తరపున బౌలింగ్ చేసిన జేవియర్ బార్ట్‌లెట్, హారిస్ రౌఫ్ చెరో 2 వికెట్లు పడగొట్టారు.