WI vs AUS 5th T20: లూయిస్‌ సిక్సుల వర్షం, చెలరేగిన కాట్రెల్.. విండీస్ చేతిలో మరోసారి చిత్తయిన ఆస్ట్రేలియా!

సెంట్‌ లూసియా: శుక్రవారం ఆస్ట్రేలియాతో జరిగిన ఐదో టీ20 మ్యాచ్‌లో వెస్టిండీస్ 16 పరుగుల తేడాతో విజయం సాధించింది. ఇటీవలి కాలంలో టెస్ట్, వన్డేల్లో మోస్తరు ప్రదర్శనకే పరిమితమైన విండీస్.. టీ20ల్లో మాత్రం తాము ప్రపంచ ఛాంపియన్ అని నిరూపించుకుంది. ఆల్‌రౌండ్ ప్రదర్శనతో అదరగొట్టిన విండీస్ పొట్టి సిరీస్‌ను 4-1 తేడాతో కైవసం చేసుకుంది. పటిష్ట ఆస్ట్రేలియా విండీస్ ముందు పూర్తిగా తేలిపోయింది. బ్యాటింగ్, బౌలింగ్‌లో సత్తాచాటాని ఫించ్ సేనకు టీ20 ప్రపంచకప్ ముందు ఈ సిరీస్ ఓ పీడకలగా మారింది. ఇక ఇరు జట్ల మధ్య మూడు టీ20ల సిరీస్ మంగళవారం ప్రారంభం కానుంది.

సెంట్‌ లూసియా వేదికగా శుక్రవారం జరిగిన ఐదవ టీ20లో మొదట బ్యాటింగ్‌ చేసిన వెస్టిండీస్‌ నిర్ణీత 20 ఓవర్లలో 8 వికెట్ల నష్టానికి 199 పరుగుల భారీ స్కోరు నమోదు చేసింది. విండీస్‌ బ్యాటింగ్‌లో ఓపెనర్ ఆండ్రీ ఫ్లెచర్ (12) విఫలమయినా.. మరో ఓపెనర్ ఎవిన్​ లూయిస్‌ (79, 34 బంతులు; 4 ఫోర్లు, 9 సిక్సర్లు) ఆకాశమే హద్దుగా చెలరేగాడు. లూయిస్‌ సిక్సులు వర్షం కురిపించాడు. ఏకంగా 9 సిక్సులు బాదాడు. ఆపై నికోలస్ పూరన్‌ (31), క్రిస్ గేల్‌ (21), లెండిల్ సిమన్స్‌ (21) కూడా ధాటిగా ఆడడంతో విండీస్ భారీ స్కోర్ చేసింది. లూయిస్‌ దెబ్బకు బెహ్రెండోర్ఫ్ 3 ఓవెన్లలోనే 46 పరుగులు ఇచ్చాడు.

అనంతరం బ్యాటింగ్‌కు దిగిన ఆస్ట్రేలియా 20 ఓవర్లు ముగిసేసరికి 9 వికెట్ల నష్టానికి 183 పరుగులు చేసి.. 16 పరుగుల తేడాతో ఓటమి పాలైంది. ఇన్నింగ్స్ ఆరంభంలోనే ఆస్ట్రేలియాకు భారీ షాక్ తగిలింది. జోష్ ఫిలిప్ డకౌట్ అయ్యాడు.అయితే కెప్టెన్ ఆరోన్‌ ఫించ్‌ (34), మిచెల్‌ మార్ష్‌ (30) జట్టును ఆదుకున్నారు. మార్ష్‌ ఔట్ అయినా.. మొయిసెస్ హెన్రిక్స్ (21) సాయంతో ఆసీస్ ఇన్నింగ్స్‌ను ఫించ్ ముందుకు నడిపాడు. కొద్ది వ్యవధిలో ఈ ఇద్దరూ పెవిలియన్ చేరడంతో ఆసీస్ మ్యాచుపై ఆశలు వదిలేసుకుంది. మాథ్యూ వెడ్ (26) కాసేపు అలరించాడు. విండీస్ బౌలర్ షెల్డన్ కాట్రెల్ మూడు వికెట్లతో చెలరేగాడు. తన కోటా నాలుగు ఓవర్లలో 28 పరుగులు ఇచ్చాడు. అయితే అతడు ఏకంగా 11 వైడ్లు వేయడం విశేషం.

ఈ మ్యాచులో వెస్టిండీస్‌ ఆల్‌రౌండర్‌ ఫాబియెన్‌ అలెన్‌ కళ్లు చెదిరే క్యాచ్‌తో మెరిశాడు. ఆసీస్‌ బ్యాటింగ్‌ సమయంలో ఇన్నింగ్స్‌ 10వ ఓవర్‌ను హెడెన్‌ వాల్ష్‌ వేశాడు. అప్పటికే క్రీజులో పాతుకుపోయిన ఫించ్‌.. ఓవర్‌ రెండో బంతిని లాంగాన్‌ మీదుగా భారీ షాట్‌ ఆడాడు. ఫాబియెన్‌ అలెన్‌ కొన్ని గజాల దూరం నుంచి పరిగెత్తుకు వచ్చి డైవ్‌ చేస్తూ ఎడమ చేత్తో స్టన్నింగ్‌ క్యాచ్‌ అందుకున్నాడు. అంతే ఫించ్‌ నిరాశగా పెవిలియన్‌కు చేరాడు. దీనికి సంబందించిన వీడియో ట్విటర్‌లో షేర్ చేయడంతో వైరల్‌గా మారింది. దీనికి ముందు కూడా అలెన్‌ మూడో టీ20లోనూ ఇలాంటి ఫీట్‌ను నమోదు చేశాడు. దీన్ని దృష్టిలో ఉంచుకొని ఐసీసీ అలెన్‌ పట్టిన కొన్ని అద్భుత క్యాచ్‌లను వీడియో రూపంలో షేర్‌ చేసింది.