ఇంగ్లాండ్‌ Vs విండీస్‌: తొలి డే-నైట్‌ టెస్టుకి సర్వం సిద్ధం

హైదరాబాద్: ఇంగ్లాండ్‌-వెస్టిండీస్‌ జట్ల మధ్య బర్మింగ్‌హమ్‌ వేదికగా తొలి డే-నైట్ టెస్టు గురువారం ప్రారంభం కానుంది. ఇంగ్లాండ్, వెస్టిండిస్ జట్ల మధ్య డే-నైట్ టెస్టు మ్యాచ్ జరగడం ఇదే తొలిసారి. రాత్రిపూట జరిగే ఈ టెస్టు మ్యాచ్‌లో గులాబి రంగు బంతితో ఆడతారు.

దీంతో ఈ టెస్టు అభిమానుల్లో ఆసక్తిని రేపుతోంది. ఆస్ట్రేలియాతో మొట్టమొదటిసారి డే-నైట్ టెస్టు మ్యాచ్ ఆడిన ఇంగ్లండ్ స్వదేశంలో తొలిసారి ప్రయోగాత్మకంగా తొలిసారి డే-నైట్ టెస్టుకు ఆతిథ్యమిస్తోంది. టెస్టు క్రికెట్ చరిత్రలో ఇది ఐదో డే-నైట్ టెస్టు మ్యాచ్ కావడం విశేషం.

ఈ ఐదు టెస్టుల్లో ఆస్ట్రేలియా మూడు టెస్టు మ్యాచ్‌లు ఆడింది. 2015లో న్యూజిలాండ్‌తో ఆస్ట్రేలియా మొట్టమొదటి డే-నైట్‌ టెస్టు మ్యాచ్ ఆడగా... ఆ తర్వాత దక్షిణాఫ్రికా, పాకిస్థాన్‌లతో ఆడింది. క్రికెట్ అభిమానుల కోరిక మేరకు ఐసీసీ డే-నైట్ టెస్టు మ్యాచ్‌లను నిర్వహిస్తోంది.

డే-నైట్ టెస్టుల్లో ఎర్రబంతికి బదులుగా గులాబి బంతిని వాడతారు. ఎందుకంటే ప్లడ్ లైట్ల వెలుగుల్లో అటు బ్యాట్స్ మెన్లతో పాటు ఫీల్డర్లకు స్పష్టంగా కనిపిస్తుంది కాబట్టి. అంతకుముందు ఆస్ట్రేలియా డే-నైట్ టెస్టులు ఆడిన సందర్భంలో గులాబి కోకాబుర్రా బంతులను వాడితే ఇంగ్లండ్ మాత్రం గులాబి డూక్స్ బంతులను వాడుతుండటం విశేషం.