పాకిస్తాన్‌కు'డూ ఆర్ డై' పరీక్ష!

ENG vs PAK: టీ20 ప్రపంచకప్ 2026 సూపర్-8 పోరు రసవత్తరంగా మారుతోంది. సెమీఫైనల్ బెర్తులే లక్ష్యంగా జట్లు హోరాహోరీగా తలపడుతున్నాయి. ఈ క్రమంలో గ్రూప్ దశలో ఒడిదుడుకులు ఎదుర్కొన్న ఇంగ్లాండ్.. ఇప్పుడు పాకిస్థాన్‌ను ముంచేయడానికి సిద్ధమైంది. మంగళవారం జరగనున్న ఈ కీలక మ్యాచ్‌కు ముందు ఇంగ్లీష్ ఆల్‌రౌండర్ లియామ్ డాసన్ ఆత్మవిశ్వాసం వ్యక్తం చేస్తూ ప్రత్యర్థికి సవాల్ విసిరారు.

ఆత్మవిశ్వాసంలో ఇంగ్లాండ్.. ఆందోళనలో పాక్
సూపర్-8లో తమ మొదటి మ్యాచ్‌లో శ్రీలంకను 51 పరుగుల తేడాతో ఓడించిన ఇంగ్లాండ్ మంచి ఊపులో ఉంది. కేవలం 146 పరుగుల స్వల్ప లక్ష్యాన్ని కాపాడుకుంటూ లంకను 95 పరుగులకే కుప్పకూల్చడం ఆ జట్టు బౌలింగ్ బలాన్ని నిరూపించింది. మరోవైపు న్యూజిలాండ్‌తో జరగాల్సిన పాకిస్తాన్ తొలి మ్యాచ్ వర్షం కారణంగా రద్దు కావడంతో ఆ జట్టుకు కేవలం ఓ పాయింట్ మాత్రమే లభించింది. సెమీస్ రేసులో నిలవాలంటే పాకిస్తాన్‌కు ఇంగ్లాండ్‌పై విజయం అత్యవసరం.

పిచ్ పరిస్థితులు.. స్పిన్ మంత్రం
పల్లెకెలె పిచ్ స్పిన్నర్లకు అనుకూలిస్తుండటంతో ఇంగ్లాండ్ తన స్పిన్ అస్త్రాలను సిద్ధం చేసుకుంది. శ్రీలంకపై ఇంగ్లాండ్ స్పిన్నర్లు 10 వికెట్లకు గాను 7 వికెట్లు పడగొట్టి సత్తా చాటారు. దీనిపై లియామ్ డాసన్ మాట్లాడుతూ.. "మా జట్టులో విభిన్న రకాల స్పిన్నర్లు ఉన్నారు. విల్ జాక్స్, ఆదిల్ రషీద్, నేను (డాసన్) ముగ్గురం భిన్నమైన శైలిలో బౌలింగ్ చేస్తాం. పాకిస్తాన్‌పై బ్యాటింగ్‌కు అనుకూలమైన వికెట్ లభించినా, దానికి తగ్గట్లుగా మా వ్యూహాలు సిద్ధంగా ఉన్నాయి" అని ధీమా వ్యక్తం చేశారు.

పాక్ స్పిన్ అటాక్ కూడా తక్కువేం కాదు!
పాకిస్తాన్ కూడా స్పిన్ విభాగంలో పటిష్టంగానే కనిపిస్తోంది. ఉస్మాన్ తారిక్ నేతృత్వంలో షాదాబ్ ఖాన్, మొహమ్మద్ నవాజ్, అబ్రార్ అహ్మద్ వంటి నాణ్యమైన స్పిన్నర్లు ఇంగ్లాండ్ బ్యాటర్లను ఇబ్బంది పెట్టే అవకాశం ఉంది. పిచ్ నెమ్మదించే కొద్దీ పాక్ స్పిన్నర్లు మరింత ప్రమాదకరంగా మారుతారని విశ్లేషకులు భావిస్తున్నారు.

గణాంకాల్లో ఇంగ్లాండ్‌దే పైచేయి
టీ20ల్లో పాకిస్తాన్‌పై ఇంగ్లాండ్‌కు తిరుగులేని రికార్డు ఉంది. ఇప్పటివరకు ఈ రెండు దేశాల మధ్య 31 అంతర్జాతీయ టీ20 మ్యాచ్‌లు జరగగా.. అందులో ఇంగ్లాండ్ ఏకంగా 21 మ్యాచ్‌ల్లో విజయం సాధించింది. పాకిస్తాన్ కేవలం 9 మ్యాచ్‌ల్లో మాత్రమే గెలిచింది (ఒక మ్యాచ్ ఫలితం తేలలేదు).

లియామ్ డాసన్ మాటల్లో:
"గ్రూప్ దశలో నేపాల్, స్కాట్లాండ్‌పై గెలవడానికి మేము చాలా కష్టపడాల్సి వచ్చింది. వెస్టిండీస్ చేతిలో కూడా ఓడిపోయాం. కానీ ప్రస్తుతం మా జట్టు సరైన ఫామ్‌లో ఉంది. శ్రీలంకపై మా ప్రదర్శన చూశాక మేము చాలా పటిష్టంగా ఉన్నామని అర్థమవుతోంది." అని లియామ్ డాసన్ తెలిపాడు. సెమీఫైనల్ బెర్తు ఖాయం చేసుకోవాలంటే ఇంగ్లాండ్‌కు ఈ విజయం ముఖ్యం. అదే సమయంలో పాకిస్తాన్ ఓడిపోతే వారి సెమీస్ ఆశలు దాదాపు గల్లంతైనట్లే. ఈ 'డూ ఆర్ డై' మ్యాచ్‌లో గెలుపు ఎవరిని వరిస్తుందో చూడాలి!