38 పరుగులకే ఐర్లాండ్‌ ఆలౌట్‌.. ఇంగ్లండ్‌ ఘన విజయం

వోక్స్‌, బ్రాడ్‌ విజృంభణ:

ఐర్లాండ్‌ మూడో రోజు 182 పరుగుల ఛేదనకు దిగింది. తొలి ఇన్నింగ్స్‌లో 207 పరుగులు చేసిన ఐర్లాండ్.. రెండో ఇన్నింగ్స్‌లో ఏదైనా సంచలనం చేస్తుందేమో అని అందరూ అనుకున్నారు. కానీ ఇంగ్లీష్ బౌలర్లు అందుకు అవకాశం ఇవ్వలేదు. నాలుగో ఓవర్‌ చివరి బంతికి కెప్టెన్‌ పోర్టర్‌ఫీల్డ్‌ (2)ను వోక్స్‌ పెవిలియన్‌ పంపాడు. వెంటనే బాల్‌బ్రైన్‌ (5)ను బ్రాడ్‌ ఔట్ చేసాడు. స్వింగ్‌ను ఉపయోగించుకున్న వోక్స్‌.. స్టిర్లింగ్‌ (0)ను ఖాతా తెరవనీయలేదు. జేమ్స్‌ మెకల్లమ్‌ (11), విల్సన్‌ (0) లను మూడు బంతుల వ్యవధిలో వోక్స్‌ ఔట్‌ చేశాడు. దీంతో ఐర్లాండ్‌ 24 పరుగులకే 5 వికెట్లు కోల్పోయి కష్టాల్లో పడింది.

38 పరుగులకే:

ఈ సమయంలో బ్రాడ్‌ విజృంభించి మూడు వికెట్లు తీశాడు. ఇక ముర్టాగ్‌ (2) వోక్స్‌ బోల్డ్ చేసి ఆలౌట్ చేసాడు. 14 పరుగుల తేడాతో 7 వికెట్లు కోల్పోయిన ఐర్లాండ్‌ 15.4 ఓవర్లలో 38 పరుగులకే ఆలౌటైంది. ముగ్గురు డకౌటవగా.. మరొకరు సున్నా పరుగులతో నాటౌట్‌గా మిగిలారు. మెకల్లమ్‌ చేసిన 11 పరుగులే అత్యధిక స్కోర్. మూడో బౌలర్‌ ప్రమేయం లేకుండా ఐర్లాండ్‌ ఆలౌట్ అవ్వడం విశేషం. వోక్స్‌ (6/17), బ్రాడ్‌ (4/19) గణాంకాలు నమోదు చేశారు.

85 పరుగులకే ఆలౌట్:

ఓవర్‌నైట్‌ స్కోరు 303/9తో శుక్రవారం మూడో రోజు రెండో ఇన్నింగ్స్‌ కొనసాగించిన ఇంగ్లాండ్‌ అదే స్కోరు వద్ద ఆలౌట్ అయింది. ఇంగ్లండ్‌ తొలి ఇన్నింగ్స్‌లో 23.4 ఓవర్లలో 85 పరుగులకే ఆలౌట్ అయింది. ఐర్లాండ్‌ పేస్ బౌలర్ టిమ్ ముర్టాగ్ ఐదు వికెట్లతో విజృంభించడంతో ఇంగ్లండ్‌ కకలావికలం అయింది. అనంతరం ఐర్లాండ్‌ తమ తొలి ఇన్నింగ్స్‌లో 207 పరుగులు చేసి ఆలౌటైంది. బాల్బిర్నీ (55) అర్ధ శతకంతో ఆదుకున్నాడు. స్టిర్లింగ్ (36), ఓబ్రెయిన్ (28) పరుగులు చేశారు. జాక్‌ లీచ్‌కు 'మ్యాన్‌ ఆఫ్‌ ద మ్యాచ్‌' అవార్డు దక్కింది.