The Hundred: స్టన్నింగ్‌ క్యాచ్‌.. సీటు నుంచి కిందపడుతూ మరీ పట్టాడుగా! చూస్తే వావ్ అనాల్సిందే (వీడియో)!!

సిడ్నీ: జాంటీ రోడ్స్, యువరాజ్ సింగ్, మొహ్మద్ కైఫ్, బ్రెండన్ మెక్‌కల్లమ్, జాకబ్ ఓరమ్, రవీంద్ర జడేజా, స్టీవ్ స్మిత్, కిరన్ పోలార్డ్ ఇలా చెప్పుకుంటే పొతే ఎందరో పురుష క్రికెట్‌లో బెస్ట్ ఫీల్డర్‌లు ఉన్నారు. మహిళల క్రికెట్‌లో మాత్రం వేళ్లమీద ఉంటుంది ఆ జాబితా. ఇప్పుడిప్పుడే వుమెన్స్ క్రికెటర్లు కూడా ఫీల్డింగ్‌లో మెరుస్తున్నారు. ఇండియ‌న్ వుమెన్స్ క్రికెటర్లు ఇందులో కాస్త ముందువరసలో ఉన్నారు. అయితే క్రికెటర్లకు మేము కూడా ఏమాత్రం తీసిపోమని అభిమానులు సైతం నిరూపిస్తున్నారు. ఊహించని రీతిలో క్యాచులు పడుతున్నారు. తాజాగా హండ్రెడ్‌ టోర్నీలో ఓ అభిమాని పట్టిన సూపర్ క్యాచ్ ప్రస్తుతం నెట్టింట వైరల్ అయింది. విషయంలోకి వెళితే...

ఇంగ్లండ్‌ వేదికగా జరుగుతున్న హండ్రెడ్‌ టోర్నీ చివరి అంకానికి చేరుకుంది. ఇప్పటికే లియామ్‌ లివింగ్‌స్టోన్‌ సిక్సర్ల హోరుతో బర్మింగ్‌హమ్‌ ఫోనిక్స్‌ ఫైనల్‌కు గ్రాండ్‌ ఎంట్రీ ఇచ్చింది. ఈ మ్యాచ్‌లో లివింగ్‌స్టోన్‌ 10 సిక్సర్లతో ప్రత్యర్థి బౌలర్లను ఊచకోత కోశాడు. ఈ నేపథ్యంలో మ్యాచ్‌ సమయంలో ఒక ఆసక్తికర ఘటన చోటుచేసుకుంది. లివింగ్‌స్టన్‌ కొట్టిన ఒక భారీ సిక్స్‌ను మ్యాచ్‌ను చూడడానికి వచ్చిన ప్రేక్షకుడు స్టన్నింగ్ క్యాచ్‌గా అందుకున్నాడు. బంతి స్టాండ్స్‌లోకి రావడంతో ఆ వ్యక్తి లేచి దానిని అందుకునే ప్రయత్నంలో సీటు నుంచి పక్కకు పడిపోయాడు. అయినా పట్టువిడవకుండా డైవ్‌ చేస్తూ బంతిని అందుకున్నాడు.

వెనక వరుసలోని సీటు నుంచి ముందు వరుసలోని సీటుకు పడిపోతూ ఆ అభిమాని పట్టిన క్యాచుకు అక్కడి ఫాన్స్ ఫిదా అయ్యారు. కామెంటేటర్లు సైతం ఆ అభిమాని సాహసానికి వావ్ అన్నారు. ప్రస్తుతం దీనికి సంబంధించిన వీడియో సోషల్‌ మీడియాలో వైరల్‌గా మారింది. ప్రస్తుతం ప్రపంచాన్ని జయించానన్నట్లుగా అతను ఇచ్చిన హావభావాలు సూపర్‌గా ఉన్నాయని నెటిజన్లు కామెంట్లు చేస్తున్నారు. 'జాంటీ రోడ్స్, రవీంద్ర జడేజాను మించిపోయావ్', 'వావ్ ఫెంటాస్టిక్ క్యాచ్' అంటూ తెగపొగిడేస్తున్నారు ఫ్యాన్స్‌. ఇక ఆలస్యం ఎందుకు మీరూ ఆ వీడియోను ఓ లుక్కేయండి.

ఈ మ్యాచ్‌లో తొలుత బ్యాటింగ్ చేసిన నార్తన్ సూపర్‌ ఛార్జర్స్ మోస్తరు స్కోర్ చేసింది. జట్టుకు ఓపెనర్లు క్రిస్ లిన్ (25 బంతుల్లో 34; 2 ఫోర్లు, 2 సిక్సర్లు), టామ్ కోహ్లర్ (44 బంతుల్లో 71; 4 ఫోర్లు, 5 సిక్సర్లు) శుభారంభాన్ని అందించారు. వీరు మినహా జట్టు సభ్యులంతా విఫలం కావడంతో సూపర్ ఛార్జర్స్ జట్టు నిర్ణీత 100 బంతుల్లో 8 వికెట్ల నష్టానికి 143 పరుగులు చేసింది. డేవిడ్ విల్లి, జోర్డాన్ థాంప్సన్, డేన్ విలాస్, జె సింప్సన్ పూర్తిగా విఫలమయ్యారు.

అనంతరం 144 పరుగుల లక్ష్యాన్ని చేధించే క్రమంలో ఫీనిక్స్ జట్టుకు ఆదిలోనే భారీ షాక్‌ తగిలింది. ఓపెనర్ విల్ స్మీడ్ ఖాతా తెరవకుండానే అవుటయ్యాడు. అయితే అప్పుడే క్రీజులోకి వచ్చిన కెప్టెన్ లియామ్‌ లివింగ్‌స్టోన్ వచ్చీ రాగానే బౌలర్లపై విరుచుకుపడుతూ సిక్సర్ల వర్షం కురిపించాడు. అతనికి న్యూజిలాండ్ యువ ఓపెనర్ ఫిన్ అలెన్‌ (26 బంతుల్లో 42; 4 ఫోర్లు, 2 సిక్సర్లు) తోడయ్యాడు. వీరిద్దరూ కలిసి 51 బంతుల్లో 106 పరుగుల భాగస్వామ్యాన్ని నెలకొల్పడంతో ఫీనిక్స్ జట్టు కేవలం 74 బంతుల్లోనే 2 వికెట్లు కోల్పోయి లక్ష్యాన్ని చేధించింది. లివింగ్‌స్టోన్, టామ్ అబెల్ నాటౌట్‌గా నిలిచారు.