దస్ గుణ లగాన్ వసూల్: 350 ఛేజింగ్‌పై సెహ్వాగ్ ట్వీట్

హైదరాబాద్: పూణె వేదికగా జరిగిన తొలి వన్డేలో భారత జట్టు సంచలన విజయం సాధించడంలో కీలకపాత్ర పోషించిన కేదార్ జాదవ్‌పై సర్వత్రా ప్రశంసల వర్షం కురుస్తోంది. జాదవ్ ఆటతీరుపై ఇప్పటికే పలువురు మాజీ క్రికెటర్లు ప్రశంసలు కురిపించగా తాజాగా టీమిండియా మాజీ క్రికెటర్ సెహ్వాగ్ తనదైన శైలిలో ట్వీట్ చేశాడు.

కేదార్ జాదవ్ ఆడిన అద్భుత ఇన్నింగ్స్‌తో భారత్ గెలవడం ఒకేసారి పదింతల ట్యాక్స్ వసూలు చేసినట్లుందని సెహ్వాగ్ తన ట్విట్టర్ ఖాతాలో పేర్కొన్నాడు. ఇంగ్లాండ్‌పై భారత్ గెలుపు అనంతరం తొలి ట్వీట్‌లో జై జాదవ్ అని పేర్కొన్న సెహ్వాగ్ ఆ తర్వాత ట్వీట్‌లో 'దస్ గుణ లగాన్ వసూల్' అని పేర్కొన్నాడు.

ఆదివారం పూణెలో ఇంగ్లాండ్‌తో జరిగిన తొలి వన్డేలో టీమిండియా మూడు వికెట్ల తేడాతో విజయం సాధించిన సంగతి తెలిసిందే. 351 పరుగుల విజయ లక్ష్యంతో బరిలోకి దిగిన టీమిండియా 11 బంతులు మిగిలుండగానే లక్ష్యాన్ని అందుకుంది. ఈ లక్ష్య ఛేదనలో కోహ్లి 122 జాదవ్ 120 పరుగులతో సెంచరీలు చేసి భారత గెలుపులో ముఖ్యభూమిక పోషించారు.