కరోనా సెలవులు.. వార్నర్ ఏం చేస్తున్నాడంటే? (వీడియో)

టెర్రస్‌పై టెన్నిస్:

టోర్నీలు, ప్రాక్టీస్‌ సెషన్స్‌ లేకపోవడంతో ఆస్ట్రేలియా డాషింగ్ ఓపెనర్‌ డేవిడ్‌ వార్నర్‌ కూడా తన ఇంట్లో పిల్లలతో కలిసి ఆడుకుంటున్నాడు. మరోవైపు క్రికెట్ ప్రాక్టీస్ కూడా చేస్తున్నాడు. తన క్యాచింగ్ నైపుణ్యాలను మెరుగుపర్చడానికి వార్నర్ టెన్నిస్ ఆడుతున్నాడు. టెర్రస్‌పై ఉన్న వార్నర్.. ఒక చేతితో టెన్నిస్ రాకెట్‌తో బంతిని కొడుతూ మరో చేతితో క్యాచ్ పట్టుకుంటున్నాడు. వార్నర్ కొట్టిన బంతి పిట్ట గోడకు తాకి అతని వద్దకే వస్తుంటుంది. ఓ సారి బంతి మిస్ ఆవబోగా.. అద్భుతంగా ఒడిసిపట్టుకున్నాడు.

క్యాచ్‌లు ప్రాక్టీస్:

డేవిడ్ వార్నర్ తన కుమార్తెతో కలిసి టెన్నిస్ ఆడుతున్న వీడియోను మంగళవారం ఇన్‌స్టాగ్రామ్‌లో పోస్ట్ చేశాడు. 'ఒక చేత్తో క్యాచ్ పట్టుకోవడానికి ప్రయత్నం చేస్తున్నా. గుర్తుంచుకో మృదువైన చేతులతో' అని వార్నర్ కాప్షన్ రాసుకొచ్చాడు. వార్నర్ టెర్రస్‌పై టెన్నిస్ ఆడుతుంటే ఆ పక్కనే కూర్చున్న అతని కూతురు తెగ ఎంజాయ్ చేసింది. ప్రస్తుతం ఈ వీడియో నెట్టింట్లో వైరల్ అయింది.

హండ్రెడ్‌ లీగ్‌ నుంచి తప్పుకున్న వార్నర్:

డేవిడ్‌ వార్నర్‌ 'ది హండ్రెడ్‌' లీగ్‌ నుంచి తప్పుకున్నాడు. కరోనా మహమ్మారి కారణంగా లీగ్‌ నుంచి తప్పుకోలేదని.. జింబాబ్వేతో వన్డే సిరీస్‌కు అందుబాటులో ఉండాలనుకుంటున్నట్లు తెలిపాడు. ప్రారంభ ఎడిషన్ 'ది హండ్రెడ్‌' లీగ్‌లో వార్నర్‌ సదరన్‌ బ్రేవ్‌ జట్టు తరఫున ఆడాల్సి ఉంది. నెల రోజుల పాటు జరగనున్న ఈ టోర్నీకి 125,000 పౌండ్ల ఒప్పందం కుదుర్చుకున్నాడు. మే 28న ఈ టోర్నీ ఆరంభం కావాల్సి ఉన్నా.. కరోనా కారణంగా జూలై 17 నుండి ఆగస్టు 15 వరకు టోర్నీ జరగనుంది.

ఐపీఎల్ జరిగితే ఆడుతాడు:

కరోనా భయంతో ఐపీఎల్-13 జరుగుతుందా లేదా అనే సందిగ్ధం ఏర్పడింది. తాజా పరిస్థితుల నడుమ రద్దైయ్యే అవకాశాలే ఎక్కువగా ఉన్నాయి. వార్నర్ సన్‌రైజర్స్ తరఫున ఆడుతున్న విషయం తెలిసిందే. ఐపీఎల్ జరిగితే డేవిడ్ వార్నర్ ఆడుతాడని అతని మేనేజర్ జేమ్స్ తాజాగా స్పష్టం చేశాడు. జరగకపోతే మాత్రం పరిస్థితులు వేరేలా ఉంటాయన్నాడు.