కోహ్లీ క్లాస్ ఇన్నింగ్స్‌కి ముగ్ధుడైన వార్నర్: ప్రశంసల వెల్లువ

హైదరాబాద్: కేప్‌టౌన్ వేదికగా బుధవారం జరిగిన మూడో వన్డేలో విరాట్ కోహ్లీ సెంచరీతో చెలరేగడంతో టీమిండియా 124 పరుగుల తేడాతో ఘన విజయం సాధించిన సంగతి తెలిసిందే. కేప్‌టౌన్‌లో విరాట్ కోహ్లీ (160 నాటౌట్) ఇన్నింగ్స్‌పై ప్రశంసల వర్షం కురుస్తోంది. కోహ్లీ ఇన్నింగ్స్‌కి విదేశీ క్రికెటర్లు సైతం ముగ్ధులయ్యారు.

'ఈ ఇన్నింగ్స్‌తో విరాట్‌ కోహ్లీ మరో స్థాయికి చేరుకున్నాడు. వాట్‌ ఎ ప్లేయర్‌' అంటూ ఆస్ట్రేలియా క్రికెటర్ డేవిడ్ వార్నర్ ట్విట్టర్ వేదికగా కోహ్లీపై ప్రశంసల వర్షం కురిపించాడు. భారత్‌కు చెందిన పలువురు ప్రస్తుత, మాజీ క్రికెటర్లు సైతం కోహ్లీ క్లాసిక్ ఇన్నింగ్స్‌పై సోషల్ మీడియా వేదికగా ప్రశంసలు కురిపిస్తున్నారు.

మూడో వన్డేలో విరాట్ కోహ్లీ చేసిన సెంచరీ తన కెరీర్‌లో 34వ సెంచరీ కావడం విశేషం. ఈ సెంచరీతో కెప్టెన్‌గా అత్యధిక సెంచరీలు సాధించిన భారత కెప్టెన్‌గా కోహ్లీ అరుదైన ఘనత సాధించాడు. కోహ్లీకి కెప్టెన్‌గా ఇది 12వ సెంచరీ. ఈ క్రమంలో టీమిండియా మాజీ కెప్టెన్ సౌరవ్ గంగూలీ (11) సెంచరీల రికార్డుని కోహ్లీ బద్దలు కొట్టాడు.

తాజా విజయంతో ఆరు వన్డేల సిరిస్‌లో కోహ్లీసేన 3-0తో ఆధిక్యంలో ఉంది. భారత్ నిర్దేశించిన 304 పరుగుల భారీ లక్ష్యఛేదనలో దక్షిణాఫ్రికా 40 ఓవర్లలో 179 పరుగులకు కుప్పకూలింది. భారత మణికట్టు స్పిన్నర్లు చాహల్(4/46), కుల్దీప్ యాదవ్(4/23) సఫారీ బ్యాట్స్‌మెన్‌ను బెంబేలెత్తించారు.

దీంతో సఫారీ గడ్డపై కోహ్లీసేన చరిత్ర సృష్టించింది. దక్షిణాఫ్రికా గడ్డపై వన్డే సిరీస్‌లో వరుసగా మూడో విజయం అందించిన తొలి భారత కెప్టెన్‌గా కోహ్లీ అరుదైన ఘనత సాధించాడు. అంతేకాదు రెండున్నర దశాబ్దాల కల సాకారమయ్యే దిశగా ముందడుగు పడింది. దిగ్గజాలకు సాధ్యం కాని రికార్డును కోహ్లీసేన ఒడిసిపట్టుకుంది.